Oliy liganing 3-turidan o'rin olgan qiziqarli o'yinlardan biri Buxoro shahrida bo'lib o'tdi va unda amaldagi chempion «Paxtakor» ochko yo'qotdi. Kattagina byudjetga ega kamsonli jamoalardan biri bo'lgan «Buxoro» joriy mavsumda o'z oldiga jiddiy maqsadlarni qo'ymoqda.
Tarkib ham shunga monand tarzda kuchaytirildi. Shu bois, «Buxoro»-«Paxtakor» bahsiga turning markaziy o'yinlaridan biri, deya ta'rif berdik. Muxlislar tashrifi bo'yicha o'ziga xos rekordni qayd etgan ushbu uchrashuvda hisob ochilmadi. Biz o'yindan so'ng «Buxoro» hujumchisi Bahodir Pardaevdan intervyu oldik. E'tiborga molik jihati shundaki, Bahodir o'tgan yili «Paxtakor» tarkibida mamlakat chempioni bo'lgandi.
- Bahodir, «Buxoro»ga o'tishingiz qanday amalga oshdi? Chempion jamoani tark etishingizga nima sabab bo'ldi?
- So'zim avvalida birgalikda chempionlik shohsupasiga ko'tarilgan jamoadoshlarimga, klub rahbariyati, murabbiylar shtabi va muxlislarga minnatdorchilik bildirmoqchiman. Klubni tark etishimga kelsak, bunga etarlicha sabab va asoslar bor edi. Birinchi galda ko'proq o'yin amaliyotiga ega bo'lishim uchun shunday qarorga keldim. Shaxsan Tachmurod Agamurodovning o'zi meni «Buxoro» tarkibida ko'rish istagini bildirdi. O'ylab, yaqinlarim bilan maslahatlashganimdan so'ng har tomonlama yaxshi bo'lgan taklifga rozilik berdim. Qolaversa, jamoa menga begona emasdi.
- Har holda, «Paxtakor»dan ketish oson bo'lmagandir?
- Albatta. Yuragimning bir parchasi qolayotgandek taassurot qoldirdi. Bolalar bilan juda ahil edik. «Paxtakor» muxlislaridan uzr so'rayman. Ular meni to'g'ri tushunishadi, degan umiddaman. Futbolchining taqdiri shu. Bugun bu jamoada bo'lsangiz, ertaga boshqasidasiz.
- E'tiborlisi, O'zbekiston kubogining nimchorak final bosqichida ham aynan «Paxtakor»ga qarshi o'ynaysizlar. Vaziyatga real ko'z bilan qarasak, «sherlar»dan o'tishning iloji bormi?
- Nega iloji yo'q ekan? Bu futbol, unda har qanday natija qayd etilishi mumkin. Mavsumni yomon boshlamadik. Uchta o'yinda 5 ochko jamg'arildi. Raqobatbardosh tarkib jam bo'lgan. Safimizda milliy, olimpiya va yoshlar terma jamoalari safida o'ynab, katta tajriba to'plagan futbolchilar bor. Albatta, chempion jamoani mag'lub etib, keyingi bosqichga chiqish oson kechmaydi. Lekin harakat qilsak, bu vazifani uddalash mumkin.
- Avvalgi turda «Obod» bilan durang o'ynadinglar. O'sha uchrashuvda bir ochko qo'lga kiritildimi yoki ikki ochko yo'qotdinglarmi?
- Menimcha, ikki ochko yo'qotdik. Ochig'ini aytaman, o'sha o'yinda bizga oson bo'lgani yo'q. Bir narsani tan olish kerak, bizda hali jamoaviy o'yin to'liq shakllanmagan. Buning uchun vaqt kerak. O'tgan yilgi tarkib bilan taqqoslaganda, sezilarli darajada o'zgarish bor. Albatta, «Obod»ni mag'lub etishimiz kerak edi. Yuzaga keltirilgan xavfli vaziyatlarni gol bilan yakunlay olmadik. Bunga o'zimiz aybdormiz.
- O'z ampluangizdan kelib chiqqan holda qaysi hujumchining o'yinlarini kuzatib borasiz? Kimlarga havas qilgansiz?
- Yoshligimda argentinalik Gabriel Batistutaga havas qilganman. Keyin braziliyalik Ronaldoning o'yinlarini miriqib tomosha qilardim. Bugungi kunda Lionel Messi va Luis Suareslarning harakatlaridan rohat olaman.
- Tabiiyki, «Barselona» klubiga ham, muxlislik qilasiz, shundaymi?
- Ha, klublardan «Barselona» jamoasi ko'rsatayotgan hujumkor o'yin yoqadi.    
- Kataloniyaliklar chempionlikni naqd qilishdimi yoki hali bunday deyishga ertami?
- Menimcha, hali erta. Agar «el klassiko»da «Barselona» g'alaba qozonganida, shunday desak bo'lardi. «Real»ga imkoniyat boy berilganidan so'ng «Atletiko» bilan o'rtadagi ochko farqi qisqardi. Oldinda o'yinlar bor. Menimcha, har qanday holatda ham Luis Enrike shogirdlari bunday imkoniyatni qo'ldan chiqarmasalar kerak.
Davomi InterFUTBOL gazetasi blogida.
— deya xabar beradi uff.uz nashri.