Oliy Liga 4-turidan o'rin olgan “Sho'rtan” – “Bunyodkor” (0:1) uchrashuvidan keyingi matbuot anjumanining ikkinchi qismida g'uzorliklar ustozi Zoir To'raqulov ishtirok etdi. - Yigitlar harakat qilishdi. Afsuski vaziyatlardan foydalana olmadik. 2-3ta futbolchimiz jon kuydirib o'ynamayapti. “Bunyodkor” tajribali jamoa. Raqib futbolchilari maydonda nima qilishayotganini yaxshi bilishadi. Birinchi bo'limdagi vaziyatni golga aylantirganimizda uchrashuvning borishi tamomila o'zgarib ketardi. Afsuski shu vaziyatdan gol ura olmadik. “Bunyodkor” esa bitta imkoniyatdan foydalandi va yutib ketdi. “Sho'rtan”da o'yin bor. Bemalol ochkolar yig'ishga qurbimiz etadi. Jamoaga yuragi va ko'zi yonadigan futbolchilar kerak. Shartnoma tuzib bo'lingach, faqat oylik maosh uchun o'ynaydigan futbolchilar kerak emas. Butun jamoa manfaatini ustun qo'yadigan yigitlar qancha ko'p bo'lsa, birdamlik shuncha yaxshi bo'ladi. Oliy ligadagi hech bir o'yin oson o'tmayapti. Keyingi bahsni Namanganda “Navbahor”ga qarshi o'tkazamiz. Bu o'yin ham nihoyatda og'ir o'tadi, - deydi Zoir Narzullaevich.
— deya xabar beradi uff.uz nashri.