"UzReport TV" telekanali Evropa Chempionlar ligasi 1/4 finalidan o'rin olgan ikkita uchrashuvni "jonli" efirda namoyish qiladi. 12 aprel seshanba kuni Madridning "Real" klubi o'z maydonida Germaniyaning "Volfsburg" jamoasini qabul qiladi. Chorak finalning dastlabki o'yinida "bo'rilar"dan 2:0 hisobida mag'lubiyatga uchragan "Qirollik klubi" vakillari yarim finalga yo'l olishlari uchun javob o'yinida kamida 3:0 hisobida g'alaba qozonishlari kerak. Bu esa oson bo'lmasligi aniq. 13 aprel chorshanba kuni "Barselona" klubi chorak finaldan o'rin olgan uchrashuvda Madridning boshqa bir jamoasi "Atletiko" mehmoni bo'ladi. Dastlabki o'yinda 2:1 hisobida mag'lubiyatga uchragan "Atletiko" futbolchilari javob o'yinida kataloniyaliklarga qarshilik ko'rsatishga urinib ko'rishadi. "UzReport TV" telekanali yuqoridagi ikkita uchrashuvni to'g'ridan-to'g'ri efirda namoyish qiladi. Har ikki o'yin ham Toshkent vaqti bilan soat 23:45da boshlanadi. Shuningdek, chorak finaldan o'rin olgan yana ikkita o'yinda "Manchester Siti" - "PSJ" va "Benfika" - "Bavariya" jamoalari o'zaro to'qnash kelishadi. Eslatib o'tamiz, 15 aprel kuni Toshkent vaqti bilan soat 14:30da Chempionlar ligasi yarim finaliga qur'a tashlash marosimi bo'lib o'tadi.
— deya xabar beradi uff.uz nashri.