Mana, milliy jamoalarning o'yinlari sabab, qisqa tanaffus olgan milliy chempionatlarda hal qiluvchi palla boshlandi. Buyog'iga har bir ochkoning qadri oltinga teng, ayniqsa, evrokuboklar yo'llanmasi yoki ligada «jon» saqlab qolish uchun kurash olib borayotgan klublar uchun. Quyida «SE» ma'lumotlari asosida Evropaning kuchli 5ta birinchiligiga nazar solib, qaysi ishtirokchilar nimaga da'vo qilishayotganini alohida ko'rib chiqamiz.
ISPANIYa
Chempionlik uchun da'vogarlar: «Barselona», «Atletiko», «Real»
Madrid klublari futbolchilari oltin medal taqdiri hali hal etilmaganini aytishdan charchamayaptilar, biroq fakt shuki, kataloniyaliklar va ularning ta'qibchilari  o'rtasidagi ochkolar farqi hamon («El-klasiko» natijasidan keyin ham) katta. Boz ustiga, taqvim «Barselona» uchun ancha engil. Deylik, Luis Enrike jamoasi oxirgi 7ta turda asosan ayni payt turnir jadvalining 10-pog'onasidan pastda borayotgan klublarga qarshi to'p suradi.
Chempionlar Ligasiga da'vogarlar: «Barselona», «Atletiko», «Real», «Vilyarreal», «Selta», «Sevilya», «Atletik»
Evropa klub futbolining asosiy turniriga yo'l ochuvchi 4ta chiptadan 3tasi chempionlik uchun kurashayotgan klublar tomonidan «bron» qilingan, hisob. Demak, qolgan bittagina yo'llanmaga naq 4ta ishtirokchi ko'z olaytirmoqda. Shuning barobarida «Vilyarreal», «Sevilya» va «Atletik» jamoalari ChLga ikkinchi yo'l orqali chiqishdan ham umidvorlar - ular ELda g'oliblik uchun kurashni davom ettirishyapti.
Evropa Ligasiga da'vogarlar: «Vilyarreal», «Selta», «Sevilya», «Atletik», «Malaga», «Eybar»
Ispaniya primerosi uchun Evropaning kenja turniridan 3ta joy ajratilgan. Lekin «Sevilya»ning mamlakat kubogi finaliga chiqqani va endi sovrin uchun «Barselona» bilan o'ynashini unutmaslik lozim. Xullas, bu klub chempionat orqali ChL yoki ELga yo'l ololmagan taqdirda milliy kubok sohibi sifatida evroarenaga chiqishi ham mumkin. Xullas, andalusiyaliklar finalni boy berishsa yoki primeroda 4-o'rinni egallay olishmasagina evrokubok chiptalari taqdiri to'liq chempionatda hal qilinadi. Umuman, oddiy aytganda, La-ligada kuchli to'rtlikka kirish kurashida engilgan trioning EL o'tishi ehtimoli ancha baland.
Ligadan tushib ketishga «da'vogarlar»: «Las-Palmas», «Rayo Valekano», «Granada», «Xetafe», «Sporting», «Levante»
Aslida o'zini xotirjam sezmayotgan klublar soni ancha ko'p - turnir jadvalining butun ikkinchi yarmidagilar. Lekin aynan shu oltilik imkoniyati haminqadar. Umuman, Ispaniyada har doim elitada qolish uchun kurash so'nggi turga qadar davom etadi. Bugungi manzaraga qarab taxmin qilsak, joriy mavsum ham xuddi shunday bo'ladi, chog'i.
Kubok finali: «Barselona» - «Sevilya» (22 may)
Unai Emeri «Barselona»ni engishni o'rganib olgan, shunday ekan, ko'pchilik aytayotganidek, kubok taqdiri unchalik oydin emas. Ushbu jamoalar finalda Evropa superkubogi uchun kechgan o'yindagi kabi gollar festivalini uyushtirishsa, bunga hech kim qarshi chiqmaydi.
GERMANIYa
Chempionlik uchun da'vogarlar: «Bavariya», «Borussiya» D.
Dortmund superklubi joriy mavsum avansahnaga qaytdi va bu hol ko'pchilikni quvontirdi. Xususan, «Bavariya»ni ham. Axir ichki arenada munosib raqobatchiga duch kelishning xalqaro maydonda foydasi bor. Endi taxminga kelsak, myunxenliklar baribir, yaqqol favorit hisoblanishadi. Misol uchun, Winline «Gollivud» FKning bundesligadagi g'alabasini 1,02 koeffitsient ko'rinishida baholayapti.
Chempionlar Ligasiga da'vogarlar: «Bavariya», «Borussiya» D., «Gerta», «Shalke», «Borussiya» M., «Bayer», «Maynts», «Volfsburg»
ChLning 2ta yo'llanmasi qaysi klublarga nasib etishi tushunarli. Yana 2tasiga esa naq 6ta talabgor bor. Bu ro'yxatda bundesligadagi «Lester» - «Gerta»ning joy olgani e'tiborga molik. 2 yilcha oldin elitaga qaytgan klubning avvalgi mavsum pastga sho'ng'ishiga sal qolgandi. «Volfsburg» esa aksincha, o'tgan mavsumga solishtirganda, sezilarli darajada pasaydi. Lekin joriy ChL chorak finalchisi hali yuqori to'rtlikka kirishdan umid uzmagan.
Evropa Ligasiga da'vogarlar: «Gerta», «Shalke», «Borussiya» M., «Bayer», «Maynts», «Volfsburg», «Verder» (kubok orqali)
Asosiy da'vogarlar o'sha-o'sha. «Verder» oldida esa «Bavariya»ga qarshi kechadigan kubok yarim finali turibdi. Demak, bremenliklarning imkoniyatlari uncha ko'p emas. Boz ustiga, «musiqachilar» bundesligada qolish masalasini ham hal qilishlari lozim va bu vazifa muhimroq.
Ligadan tushib ketishga da'vogarlar: «Kyoln», «Ingolshtadt», «Shtutgart», «Gamburg», «Darmshtadt», «Verder», «Augsburg», «Xoffenxaym», «Ayntraxt», «Gannover»
Germaniya chempionatining ajoyibligi shundaki, finishga atigi 6ta tur qolgan bir paytda ham har bir ishtirokchi nimadandir umidvor, nimagadir real kurash olib boryapti. Hattoki, turnir jadvalining birinchi yarmida ketayotgan «Kyoln» ham ligadan tushib ketmaslikni hali kafolatlagani yo'q.
Kubok finali: «Bavariya»|«Verder» - «Gerta»|«Borussiya» D. (21 may)
Bir yil oldin Germaniya kubogi «Volfsburg» mulkiga aylangan edi. Navbatdagi final yo'lida «Bavariya» o'z maydonida «Verder» qarshiligini engishga «urinib» ko'rsa, «Borussiya» mehmonda «Gerta» bilan olishadi. Xullas, har qanday holatda ham kubok sohibi yangilanadi.
ANGLIYa
Chempionlikka da'vogarlar: «Lester», «Tottenxem», «Arsenal»
APLning bosh mukofoti uchun asosiy talabgorlar - «Lester» va «Tottenxem». «Arsenal» esa har qadamda poygadan chetga chiqib ketishi mumkin, lekin baribir, ozgina imkoniyati yo'q emas. Deylik, Winline Arsen Venger jamoasining muvaffaqiyat qozonish imkoniyatini 6,75 koeffitsient darajasida belgilamoqda.
ChLga da'vogarlar: «Lester», «Tottenxem», «Arsenal», «Manchester Siti», «Vest Xem», «Manchester Yunayted», «Sautgempton», «Stok Siti», «Liverpul»
Bundan 2 oy oldin birinchi to'rtlik yaqqol ajralib turgandi, biroq hozirda hattoki, «Liverpul» ham ijobiy yakundan umidvor. Chunonchi u boshqalarga nisbatan kam o'yin o'tkazgan. Joriy mavsumda kuzatilayotgan kutilmaganlikni nazarda tutib, Evropa klub futbolining asosiy turniri yo'llanmasiga «Stok Siti» ham chang solishini taxmin qilish mumkin.
ELga da'vogarlar: «Manchester Siti», «Arsenal», «Vest Xem», «Manchester Yunayted», «Sautgempton», «Stok Siti», «Liverpul», «Chelsi», «Kristal Pelas» (kubok orqali), «Uotford» (kubok orqali), «Everton» (kubok orqali)
Angliya klublari ELni tan olishmaydi, garchi buning aksini ta'kidlashsada. Eng yorqin misol - «Vest Xem». «Bolg'achilar»ga  turnir yo'llanmasi «Feyr-pley» reytingidagi yuqori o'rin mukofoti tariqasida berilgandi. Biroq ular bundan foydalanishmadi, ya'ni guruh bosqichi startga chiqmasdanoq kurashni to'xtatishdi. Aytgancha, «Manchester Siti» kamida EL yo'llanmasini oladi - «shaharliklar» fevralda Liga kubogini yutishgandi.
Ligadan tushib ketishga «da'vogarlar»: «Suonsi», «Kristal Pelas», «Norvich», «Sanderlend», «Nyukasl», «Aston Villa»
«Aston Villa»ga qiyin-ov, uni endi mo''jizakor o'yin ham qutqarolmasa kerak. Qolganlar esa finishga qadar jon olib, jon berishsa, ajabmas.
Kubok finali: «Everton»|«Vest Xem»-«MYu» - «Uotford»|«Kristal Pelas» (21 may)
Hal qiluvchi bahs ishtirokchilari aniq emas. Yarim finalda «Everton»ga kim raqiblik qilishini «Vest Xem» va «Manchester Yunayted» klublari  takroriy o'yinda o'zaro qal etishadi. Ikkinchi yarim finalda esa «Uotford» va «Kristal Pelas» qarama-qarshiligi kuzatiladi.
Davomi InterFUTBOL gazetasi blogida.
— deya xabar beradi uff.uz nashri.