2016 yilning 15-17 aprel kunlari poytaxtimizdagi “O'zbekiston” sport saroyida dzyudo kurashi bo'yicha Osiyo chempionati o'tkaziladi.
Qit'aning 31 davlati vakillari ishtirokida o'tkaziladigan mazkur nufuzli musobaqada “Rio-2016” o'yinlarining yo'llanmalari uchun reyting ochkolar ham o'ynaladi.
Jumladan, oltin medal sohibi 400 ochkoga, kumush medal sovrindori 240 ochkoga, uchinchi o'rinni egallagan sportchilar esa 160 reyting ochkoga ega bo'ladilar. Bu Gran Pri turkumiga kiruvchi turnirlarda beriladigan ochkolardan ancha yuqori hisoblanadi (300-180-120).
Bunga qadar poytaxtimizda ikki bor (2005 va 2012 yillarda) qit'a chempionati o'tkazilgan. Osiyo chempionatini uchinchi bor yurtimizda o'tkazilishi 2014 yili Gonkongda bo'lib o'tgan Osiyo dzyudo federatsiyasining ijroqo'm yig'ilishida e'lon qilingan.
Toshkent shahri mezbonlik qiladigan bu galgi Osiyo chempionatiga Xalqaro dzyudo federatsiyasi prezidenti Marius Vizer va Osiyo dzyudo federatsiyasi rahbari Obeyd Al Anzi boshchiligida har ikki tashkilotning ko'plab etakchi mutaxassislari tashrif buyuradilar. Musobaqada, shuningdek, har ikki tashkilotning ijroqo'm a'zolari ham bevosita ishtirok etadilar.
Osiyo chempionatining tantanali ochilish marosimi 15 aprel kuni soat 16:30da boshlanadi. Saralash bellashuvlariga har kuni soat 10:00dan start berilsa, final bahslari soat 17:00dan boshlanadi.
Ma'lumot uchun. So'nggi yillarda O'zbekiston dzyudo kurashi bo'yicha yirik musobaqalarni o'tkazish markazlaridan biriga aylanib bormoqda. Xususan, 2013, 2014 va 2015 yillarda Toshkentda Gran Pri turkumiga kiruvchi turnirlar o'tkazilgan bo'lsa, 2005 va 2012 yillarda Osiyo chempionati o'tkazildi. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.