RFPLning 23-turida TsSKA o'z uyida «Mordoviya»ni 7:1 natija bilan mag'lub etdi. Umuman olganda, 23-tur doirasidagi ko'plab o'yinlarda yirik hisoblar qayd etildi. «Krasnodar» — «Ural» (6:0), «Rubin» — «Dinamo» (4:1) «Spartak» — «Kuban» (2:2) bahslari shular jumlasidan. «Tafsilot.uz» sayti shu munosabat bilan Rossiya chempionatidagi eng yirik g'alabalarni yodga olishga qaror qildi.
03.11.2000. «Lokomotiv» – «Uralan» – 9:0
Rossiya chempionatidagi eng yirik g'alabani 2000 yilda «Lokomotiv» qo'lga kiritgan. To'qqizta gol farqi bilan bu ko'rsatkich hamon yagona bo'lib turibdi. Bo'lajak kumush medal sohiblari Yuriy Syomin boshchiligida serb Boris Bunyak murabbiyligidagi jamoani tor-mor etgan edi. Yarim himoyachi Dmitriy Loskov 32 daqiqada xet-trikni nishonlagan bo'lsa, Dmitriy Buliikin o'z hisobiga dublni yozib qo'ydi. Oleg Teryoxin, Vladimir Maminov, Vadim Evseev va hozirda jamoa murabbiyi Igor Cherevchenkolar bittadan gol urishdi.
O'sha mavsumda «Uralan» jadval oxirigi tushib ketgan va oliy ligani tark etgan edi.
26.07.1994. «Lokomotiv» – «Torpedo» – 8:0
Sakkizta gol farqi bilan erishilgan g'alaba ham «temiryo'lchilar»ga tegishli va jamoa bu g'alabasiga ham Yuriy Syomin boshchiligida erishgan edi. Bu 1994 yilda sodir bo'lgan va o'shanda «Lokomotiv» bronza medaliga ega chiqqan edi. Bu safar Syomin jamoasi omadsiz autsayderni emas, mavsumni 11-o'rin bilan yakunlagan «Torpedo»ni mag'lub etadi. Yuriy Mironov jamoasining o'yini boshidanoq qovushmagan, o'yinning boshidayoq himoyachi Gennadiy Filimonov o'z darvozasiga gol urib qo'ygan. Hech vaqt o'tmay Sarkis Oganesyan ikkinchi golni darvozaga joylab qo'ygan. Bu ham etmaganday. torpedochi Dmitriy Ulyanov o'yindan chetlatiladi. Tanaffusga chiqish arafasida Evgeniy Xarlachyov raqib darvozasiga uchinchi golni yo'llaydi. 70-daqiqadan keyin esa «Torpedo» darvozasi haqiqiy gollar yomg'iri ostida qoladi. Hujumchi Oleg Garin xet-trikni nishonlagan bo'lsa, Oleg Eliishev va Sergey Perepadenkolar bittadan gol bilan kifoyalanishadi.
31.05.1994. «Lokomotiv» – «Dinamo-Gazovik» – 7:0
Torpedochilarning tor-mor etilishidan biroz oldinroq Syomin shogirdlari dongdor murabbiy Eduard Malofeev boshchiligidagi Tyumenning «Dinamo-Gazovik» jamoasini ham yanchib tashlashgan edi. Aytgancha, «Dinamo-Gazovik» jamoasi o'sha mavsumda lapashang bolalardan iborat emasligini namoyon qilgan va marraga «Torpedo» bilan izma-iz etib kelgan edi. Bu o'yin ham Garinning xet-trikisiz o'tmadi: forvard birinchi taymda bitta, ikkinchi taymda ikkita gol muallifi bo'ldi.  
O'yinning ikkinchi daqiqasida Igor Chugaynov aniq zarbasi bilan o'z hisobiga birinchi golini yozdirib qo'ydi. Tanaffus arafasida u dublni nishonladi. Ulardan tashqari Aleksey Kosolapov ham «Dinamo-Gazovik»ni ikki goli bilan ranjitdi.
 
09.05.1995. «Rotor» – «Jemchujina» – 7:0
1995 yilgi mavsumni Viktor Prokopenko rahbarligidagi «Rotor» 7-o'rin, «Jemchujina» jamoasi esa 13-o'rin bilan yakunlagan edi.
Volgogradliklar uchun yaxshi, sochiliklar uchun yomon yakun topgan bu o'yin 9 may kuni bo'lib o'tgan edi. O'yinning birinchi taymi sal bo'lsa-da teng kurashlar ostida kechdi, Oleg Veretennikov va Vladimir Nidergausning gollaridan so'ng jamoalar tanaffusga 2:0 hisobi bilan chiqishdi.
Ammo hammasi ikkinchi taymda boshlandi: Veretennikov va Nidergauslar xet-trikni qayd etishdi. Ettinchi golni esa Igor Menshikov urib qo'ya qoldi. O'yin yakunida sochiliklar murabiyi Arsen Naydyonov uchrashuv haqidagi o'zining mashhur sharhini bergan edi: «Hakam bizga o'yin bermadi. Beshinchi va ettinchi gollar ofsayddan urildi».
Davomi Tafsilot.Uz blogida.
— deya xabar beradi uff.uz nashri.