Trampolin bo'yicha O'zbekiston ayollar terma jamoasi Ekaterina Xilko hamda Anna Kasparyan joriy yilning 17-20 aprel kunlari Braziliyaning Rio-de-Janeyro shahrida o'tkaziladigan litsenzion musobaqada ishtirok etadilar.
Ayni paytda har ikki sportchimiz ham bo'lajak nufuzli musobaqaga qizg'in hozirlik ko'rishmoqda. Sportchilarimiz mazkur musobaqaga tayyorgarlikning so'nggi bosqichini 10-16 aprel kuni AQShda o'tkazishadi. 17 aprel kuni vakillarimiz Rio-de-Janeyro shahriga etib boradilar.
Eslatib o'tamiz, Ekaterina Xilko hamda Anna Kasparyan 2015 yili Daniyada bo'lib o'tgan jahon chempionatida kuchli 20talikdan o'rin egallab, XXXI yozgi Olimpiada o'yinlariga yo'llanmalar o'ynaladigan musobaqalarning ikkinchi bosqichida qatnashish huquqini qo'lga kiritishgan edi. Umid qilamizki tajribali sportchilarimiz bo'lajak nufuzli musobaqalarda ham munosib ishtirok etadilar va “Rio-2016” Olimpiada o'yinlariga yo'llanma olgan sportchilarimiz safi yanada kengayadi.
Rio-de-Janeyro shahrida bo'lib o'tadigan ikkinchi saralash bosqichida 1-8 o'rinlarni band etgan trampolinchilar XXXI yozgi Olimpiada o'yinlariga yo'llanma oladilar.
Ma'lumot uchun. Ekaterina Xilko 2000, 2004, 2008, 2012 yillari o'tkazilgan yozgi Olimpiada o'yinlarida ishtirok etib, 2008 yili Pekin shahri (Xitoy)da bo'lib o'tgan Olimpiadada bronza medali sovrindori bo'lgan.
Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.