2016 yilning 16-20 aprel kunlari Filippin poytaxti Manila shahrida Taekondoning WTF yo'nalishi bo'yicha Olimpiada o'yinlarining yo'llanmasi o'ynaladigan saralash musobaqasi, XXII Osiyo chempionati hamda Parataekvondo bo'yicha II Osiyo chempionati o'tkaziladi.
Dastlab, 16-17 aprel kunlari “Rio-2016” o'yinlarining yo'llanmalari o'ynaladigan saralash turniri bo'lib o'tadi. Mazkur nufuzli musobaqada Vatanimiz sharafini Nikita Rafalovich, Nigora Tursunqulova va Zariya Qosimova himoya qiladilar.
Mazkur musobaqada har bir vazn toifasida 1-2 o'rinni egallagan sportchilar "Rio-2016" Olimpiada o'yinlariga yo'llanmani qo'lga kiritadilar.
 
18 aprel kuni Parataekvondo bo'yicha qit'a chempionati bahslari bo'lib o'tadi. Ushbu musobaqada ikki nafar hamyurtimiz Sanjarbek Muxtorov va Sarvarjon Abidjonov g'oliblik uchun kurash olib boradilar.
Shu o'rinda ta'kidlash joizki, parataekvondo sport turi 2020 yili Tokio shahri (Yaponiya)da o'tkaziladigan XVI yozgi Paralimpiya o'yinlari dasturiga kiritilgan. Mazkur Paralimpiya o'yinlarida ishtirok etish uchun sportchilar 2015 yildan boshlab reyting ochkolarni  jamg'arib borishmoqda. Manilada o'tkaziladigan Osiyo chempionatida ham "Tokio-2020" Paralimpiya o'yinlarining yo'llanmalari uchun reyting ochkolar o'ynaladi. Bu esa o'z navbatida doyanda kechadigan har bir bahsni yanada murosasiz ruxda o'tishiga xizmat qiladi.
19-20 aprel kunlari esa Osiyoning kuchli taekvondo ustalari ishtirokida qit'a chempionati o'tkaziladi. XXII bor tashkil etilayotgan mazkur nufuzli musobaqada Dmitriy Shokin, Jasur Boyqo'ziev, Nikita Rafalovich, Maksim Rafalovich, Temurbek O'rolov, Shahboz Shofayziev, Dinaraxon Mamadibragimova, Zarya Qosimova hamda Nigora Tursunqulova yurtimiz sharafini himoya qiladilar. Shavkat Jalilov
O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.