Xabaringiz bor, jamoamiz 15 aprel juma kuni oliy 5-turi doirasida Qo'qon shahrining “Qo'qon-1912” jamoasini qabul qiladi. So'zimiz boshida, bo'lajak raqibimiz “Temiryo'lchi” nomi bilan faoliyat olib borganini eslatib qo'ymoqchimiz. Jamoamiz o'tgan to'rt turda 10 ochko jamg'arib, turnir jadvalining 2-pog'onasini band etib turibdi. “Qo'qon-1912” jamoasi esa 6 ochko jamg'argan holda 8-o'rinni band etgan. Mazkur jamoalar oliy ligada 12 marta tuqnash kelishgan. Shundan 8 uchrashuvda jamoamiz g'alaba qozongan, 4 uchrashuvda qo'qonliklar zafar quchishgan. Jamoalarning o'zaro uchrashuvlarida hali biron marta durang natija qayd etilmagan. To'plar nisbatida ham ustunlik jamoamiz tomonida 27:17. “Nasaf” jamoasi “Qo'qon-1912” jamoasiga qarshi so'nggi uchrashuvni o'tgan yili Qo'qonda o'tkazgan edi va 3:1 hisobidagi g'alabani nishonlashgan. Jamoamizning o'zaro uchrashuvlarda qozongan eng yirik g'alabasi – 4:0ga teng. “Qo'qon-1912”da bu ko'rsatkich 3:0ga teng. Tarixda qolgan bu uchrashuvlar 2003 yili bo'lib o'tgan, “Nasaf” – “Temiryo'lchi” 4:0 uchrashuvida jamoamizning o'tmishdagi to'purari – Zafar Xolmurodov xet-trik qayd etgan va Dilshod Mavlanov bir marta gol muallifi bo'lgan. Ikkinchi davrada Qo'qonda bo'lgan uchrashuvda esa Shuhrat Rahmonqulov dubl qayd etgan, Shuhrat Yusupov esa darvozamizga bitta to'p yo'llagan. O'tgan yili birinchi davradagi Qarshida bo'lib o'tgan uchrashuvda jamoamiz yirik 3:0 hisobida g'alaba qozongan edi. Ushbu uchrashuvdagi gollarni Shohruh Gadoev, Bahrom Abdurahimov va Oleksandr Koblashlar kiritishgan. Ikkinchi davradagi Qo'qonda bo'lgan uchrashuvda ham jamoamiz g'alaba qozongan. Unda 3:1 hisobi qayd etilgan, bu uchrashuvdagi jamoamiz gollariga Azamat Allaniyozov (2) va Ilhom Shomurodov (1)lar mualliflik qilishgan. Qo'qonliklarning bitta golini Jalil Kimsanov kiritgan. Mazkur jamoalarning navbatdagi uchrashuvi 13-uchrashuv sifatida tarix sahifasidan joy oladi: O'zPFL 5-tur. 15.04.2016 y.
«Nasaf» (Qarshi) – «Qo'qon-1912» (Qo'qon)
Qarshi sh., “Markaziy” stadion. Soat 18:30da
Bosh hakam: Aziz Asimov (Toshkent),
Qanot hakamlari: Jalgasbay Sarsenov , Bektursin Kannazarov (Nukus),
Zaxira hakami: Dauletbay Jalimov (Nukus).
Nazoratchi: Marat Ismoilov (Toshkent).
O'zPFL vakili: Bobur Haydarov.
— deya xabar beradi uff.uz nashri.