Gollandiya chempionatida azaldan ko'plab iqtidorli futbolchilar etishib chiqadi. "Lolalar yurti"dan chiqqan bir nechta taniqli futbolchilarni misol qilib o'tishning o'zi kifoya. Hozir Eredevizida "ketmoni baland parvoz"ga shay turgan yoshlar haqida gap boradi. Keling, ular bilan tanishtirib o'tamiz:
Sebasten Aller
Davlati: Frantsiya
Klubi: «Utrext»
Tug'ilgan sanasi: 1994 yilning 22 iyun.
Pozitsiyasi: hujumchi
Aller qisqa vaqt ichida Parij markazidan 22 km uzoqlikda joylashgan Ri-Oranji kommunasida dunyoga kelib, frantsiyalik eng yaxshi hujumchilar ro'yxatigacha bo'lgan yo'lni bosib o'tdi. 2011 yilda o'zining ilk professional shartnomasini imzolagan futbolchining “Oser”dagi ishlari uchnchalik yurishmadi. 2 mavsumda bor yo'g'i 6 ta gol. Hujumchiga xos bo'lmagan natija nazarimizda. Gollandiyaning “Utrext” klubiga ijara asosida o'tgandan so'ng Sebasten o'zining iqtidorini aynan Eredivizida namoyish eta boshladi. Chempionatdagi ilk uchrashuvidayoq poker qayd etdi. Boshlanishi yaxshi, shunday emasmi? Yarim yil ichida 11 gol, 5 ta golli pas va jamoa muxlislari talqiniga ko'ra, mavsumning eng yaxshi futbolchisi sovrini Allerda. 21 yoshgacha bo'lgan Frantsiya terma jamoasida ham 10 uchrashuvda 6 gol urishga ulgurdi.
“Utrext” rahbariyati ikkilanmay qo'lidagi sayqallanmagan olmosni arzimagan narx, 750 ming evroga tezda xarid qildi. Misol uchun, “Lester” Riyad Marezni 400 ming evroga xarid qilgan edi. Riyadning endigi transfer narxini bir ko'ring. Fikrimizni tushundingiz. 2015 yilgi taqvim yakuniga ko'ra, Aller frantsiyalik to'purarlar ro'yxatida Jiru, Grizmann va Jinyakdan keyin 27 ta gol bilan 4-pog'onadan joy oldi.
Ayni vaqtga kelib uning jismoniy imkoniyatlari maqtovga loyiq. Ikkinchi qavatda faol, hujumchi bo'lishiga qaramay to'pni jamoadoshlaridan qizg'anmaydi. Kerak bo'lsa himoyada ham yordamga shay. To'p uchun yakkurashlardan qo'rqmaydi, driblingi ham chakki emas. Angliyaning bir qator klublari uni safida ko'rishni istayotganiga qaramay, Sebasten “Utrext”da o'zini yaxshi his qilyapti. Yana kim biladi deysiz, balki Venger uni ko'z ostiga olib qo'ygandir.
Sven van Bek
Davlati: Gollandiya
Klubi: «Feyenoord»
Tug'ilgan sanasi: 1995 yil 25 aprel
Pozitsiyasi: markaziy himoyachi
Gollandiya janubidagi Gáuda shahrida dunyoga kelgan Sven uchun futbolchilik faoliyatini Rotterdamda boshlash eng yaqin va qulay variant edi. Ma'lumot uchun Gáuda va Rotterdam orasidagi masofa 26 kmni tashkil etadi. Sven “Feyenord”dan avval mahalliy “Sparta”da Memfis Depay bilan bir jamoada to'p surishga ham ulgurdi. Keyin esa “lordlar”ning e'tiboriga tushgan yosh iqtidor “Feyenord”ning to'laqonli a'zosiga aylandi. 17 yoshida katta jamoada kimsan Ronald Kuman qo'l ostida PSVga qarshi o'yinda debyutini o'tkazdi. 2013 yilning yanvarida “Ayaks”ga qarshi gollandcha “el-klassiko”da asosiy tarkibda maydonga tushdi. Faoliyatidagi katta o'zgarish “Feyenord”dan Bruno Martins Indi va Stefan de Vrey ketganidan so'ng sodir bo'ldi.
Fred Ryutten uni markaziy himoyachi pozitsiyasiga o'tkazdi. Baland bo'yi ikkinchi qavatdagi kurashlarda jamoasi uchun katta yordam beradi. Van Bek De Vreyga nisbatan qattiqroq o'ynaydi. Misol uchun: o'tgan mavsumda Sven 6 marotaba ogohlantirilgan. U bilan intizom borasida suhbatlashish shart emas. Qanot himoyasidagi harakatlari futbolchining uslubida izsiz qolmadi: baland bo'yli bo'lishiga qaramay, Svenni qo'pol va beso'naqay deb bo'lmaydi. Uning to'p bilan muomilasi yaxshi. Uzatishlarining aniqligiga yarim himoyachilar xavas qilsa arziydi. Aniqlik 88 %. Har bir o'yinda uzoq masofaga paslarining 10 tadan 7 tasi aniq. Keyingi mavsumda Sven van Bekni Angliya yoki Germaniyaning TOP klubida uchratsangiz xayron bo'lmang.
Davomi Sports.Uz blogida.
— deya xabar beradi uff.uz nashri.