Vardi «dubl» qayd etdi, «Barselona»«real sosdad»ga imkoniyatni boy berdi, «yuventus» iroda ko'rsatib, «milan»dan g'alabani tortib oldi. demak, o'tgan dam olish kunlari ko'hna qita yashil maydonlarida ro'y bergan eng muhim voqealarga nazar tashlaymiz.
«MYu» tor-mor etildi
«Uayt Xart Leyn» stadioniga yig'ilgan tomoshabinlar «Lester»ni ta'qib etayotgan sevimli jamoalari va ularning Manchesterdan tashrif buyurgan raqiblari maydonga tushishidan avval ishqibozlarga xos tarzda shovqin-suron ko'tarishdi. Ammo tribunalardagi holat bilan uchrashuvning birinchi bo'limidagi sur'at mutlaqo mos kelmadi.
«Tottenxem» va «MYu» dastlabki 45 daqiqalikda to'pni asosan maydon markazida ushlab, deyarli xavfli vaziyatlarni yaratishmadi. To'g'ri, bir safar Erik Lamelada darvozani ishg'ol qilish uchun ajoyib imkoniyat tug'ilgandi, biroq u zarba berishda biroz adashdi.
Mankunianliklar ikkinchi bo'limni ham xuddi shunday kayfiyatda boshlashgan bo'lsa, «shporlar» aksincha, o'yinni kuchaytirishdi. Natijada, dastlabki 20 daqiqa mobaynida faqatgina David de Xeaning mahorati mehmonlarni goldan saqlab qoldi. «Qizil iblislar»ning tobora sustlashayotgan mudofaa chizig'i tez orada hujumlarga bardosh berolmaydigandek tuyuldi. 70-daqiqada shunday ham bo'ldi - Keyn Eriksenni ajoyib «pas» bilan ta'minlagach, u «MYu» himoyachilarini aldab o'tib, Dele Allini qulay vaziyatga chiqardi. Mazkur kombinatsiya gol bilan yakunlandi. Shundan so'ng «Tottenxem»ning o'yini qovushaverdi - dastlab Tobi Alderveyreld Lamelaning uzatmasini samarali yakunlagan bo'lsa, oradan ikki daqiqa o'tgach, argentinalikning o'zi ham gol muallifiga aylandi. 3:0 va «shporlar» «Lester»ni quvishda davom etishadi.
Qalaydan yasalgan askarlar
«Lester», o'z navbatida, Pochchettinoning jamoasiga turnir jadvalida yaqinlashish imkonini bermadi. «Tulkilar» autsayderlar safida yurgan «Sanderlend»ni mag'lubiyatga uchratishdi. Agar Jermeyn Defo birinchi bo'lim oxirida o'z imkoniyatidan unumli foydalana bilganida, voqealar umuman o'zgacha rivoj topishi hech gap emasdi. Biroq Kasper Shmeyxel afsonaviy otasi singari jamoasi joniga oro kirdi. Defo eplolmagan ishni Jeymi Vardi uddaladi. APL to'purarlaridan biri o'z hisobiga yana ikkita gol yozib qo'ydi. Raqib jamoa himoyachilari uning qarshisida xuddi qalaydan yasalgan askarlardek qotib qolishdi. Shu tariqa, «Lester» eng yaqin ta'qibchisi bilan oradagi 7 ochkolik farqni saqlab qoldi. Endilikda Klaudio Raneri shogirdlari chempionlikka erishish uchun qolgan beshta o'yinida 9 ochko jamg'arishsa kifoya.
Omadsiz yulduzning benefisi
«Arsenal»ning deyarli har bir o'yini keskin kurashlar va diqqatga molik voqealarga boy o'tishiga ko'nikkanmiz. Aynan shuning uchun jahondagi ko'plab futbol muxlislari ushbu klubga mehr qo'yishgan. Slaven Bilich boshqaruvidagi «Vest Xem» joriy mavsum hujumkor o'yin namoyish etayotganini inobatga olsak, «Bolen Graund»da qanday bahs kechishi mumkinligini oldindan taxmin qilish qiyin emasdi. «To'pchilar» o'yin tizginini o'z taraflariga og'dirib, 35-daqiqaga kelib Ozil va Sanchesning sa'y-harakatlari evaziga 2:0 hisobida oldinga chiqib olishdi. Biroq tanaffusga yaqin tarixda Angliyaning ikkinchi raqamli eng qimmat futbolchisi - Endi Keroll katta sahnaga chiqdi. Mahoratli hujumchi jarima maydoniga etkazib berilgan ikkita uzatmani ham golga aylantirdi.
15 daqiqalik tanaffus ham «bolg'achilar» forvardidagi ishtiyoqni so'ndirmagan ko'rinadi. Keroll kiyinish xonasidan chiqiboq «xet-trik» qayd etib, quvonchini tribunadagilar bilan baham ko'rdi. Keyingi daqiqalar ham tomoshabop tarzda kechdi. David Ospina to'rtinchi to'pni o'tkazib yubormaslik uchun bor kuchini sarfladi. Adrian esa Loran Koselnining zarbasini qaytarolmagach, 70-daqiqada yakuniy hisob o'rnatildi - 3:3.
Davomi InterFUTBOL gazetasi blogida.
— deya xabar beradi uff.uz nashri.