Oliy Liga 5-turidan o'rin olgan “Navbahor”  – “Sho'rtan” (3:1) uchrashuvidan keyin o'tkazilgan matbuot anjumanining dastlabki qismida “Sho'rtan” ustozi Zoir To'raqulov ishtirok etdi. “Bugungi uchrashuv oldidan har ikki jamoa ham musobaqa jadvalida quyi pog'onalardan birini egallab turgandi. Aynan shu nuqtai nazardan olib qaraganda o'yinni keskin va shiddatli tarzda o'tishini kutgandim. Bu borada “Navbahor” o'z maydonida to'p surganligi sababli ustunlikka ega edi. Uchrashuvni borishi yomon bo'lmadi. Faqatgina o'zimizning xatolarimiz qimmatga tushdi. Mavsum arafasida selektsiya ishlarini ko'ngildagidek olib bora olmadik. Aslini olganda selektsiya ishlarini oldingi mavsum yakuniga etgach boshlash kerak. Aynan shu orqali asosiy tarkibda munosib tarzda to'p surishi mumkin bo'lgan 25 nafar futbolchi bilan tayyorgarlikni ko'ngildagidek olib borish imkoni yuzaga kelardi. Yil boshida yaxshi futbolchilar o'z jamoalarini topishga ulgurishadi. Shu sababli, tarkibni shakllantirish qiyin kechadi. Ixtiyorimizdagi yigitlar yomon tarzda harakat qilishayotgani yo'q. Lekin, boshqa jamoalar tezkor o'yin namoyish etishmoqda. Hozirda chiziqlar bo'yicha jamoamizda raqobat yo'q. Ichki imkoniyatlarimizdan kelib chiqqan holda ish yuritmoqdamiz. Davralar oralig'ida esa tarkibda ayrim o'zgarishlarni amalga oshirishimiz mumkin. Qanday holat bo'lishidan qat'iy nazar yaxshi natija qayd etish uchun harakat qilamiz. Jamoamiz oldiga kamida 10-o'rinni olish vazifasi qo'yilgan. Lekin, yanada yuqoriroqda bo'lish uchun bor imkoniyatlarimizni ishga solamiz. Volkovni jamoadan ketishiga kelsak. Ushbu mutaxassis bilan birgalikda deyarli bir oy ishladim. Albatta tajribali murabbiy bilan birga ishlashimiz yaxshi edi. Ammo, Volkov “Sho'rtan”dan ketishga qaror qildi. Nima sababdan ketganligi borasidagi savolga esa klub rahbariyati javob bersa to'g'riroq bo'lardi”, – deydi Zior To'raqulov.  
— deya xabar beradi uff.uz nashri.