“Nasaf” jamoasining Sloveniyalik legioner ximoyachisi Roy Rok ikkinchi davrada tibbiy ko'rik bilan bog'liq muoammolar sabab jamoaga yordam bera olmayapti.
Futbolchi ayni paytda o'z vatanida, o'z oilasi bilan birga. Biz futbolchining O'zbekiston kubogi finali va uning “Nasaf” haqidagi fikrlari bilan qiziqib ko'rdik:
-Roy avvalambor sizni jamoangizning kubok sohibi bo'lganligi munosabati bilan muborakbod etamiz!
– Raxmat, bundan to'g'risi juda sevindim, lekin…
-Finalni ko'rdingizmi? O'yin haqida fikrlaringiz qanday?
-Ha albatta, final o'yinini internet orqali ko'rdim. O'yin finalga xos bo'ldi, maydondagi jamoadoshlarimning harakatlaridan murabbiylar va futbolchilarning mehnatlari yaqqol sezilib turdi. Jamoam haqli ravishda g'alabaga erishdi.
-Ammo siz ham finalda maydonga tushishni xoxlagan edingiz…
-To'g'ri, hal qiluvchi uchrashuvda maydonga tushib jamoamga yordam berishni juda-juda qattiq istagan edim, ammo nasib etmadi. Bu juda alamli xolat.  Umid qilamanki, “Nasaf” bilan xali ko'plab finallarda o'ynaymiz.
“Nasaf”dagi keyingi taqdiringiz haqida nima deya olasiz?
-“Nasaf”da hammasi yaxshi: futbolchilar, murabbiylar shtabi, rahbariyat va hokazo. Jamoa allaqachon oilaga aylanib ulgurgan. Bosh murabbiyimiz esa men ko'rgan murabbiylar orasida eng yaxshisi deb ayta olaman. U inson jamoaning fidoiysi. Barchamizni tushunadi.
Endi jamoadagi taqdirimga kelsak, bu klub rahbariyati va murabbiylar shtabiga bog'liq. Agar ular jamoada qolishimni istashsa, men hech ikkilanmasdan qolaman. Hozir jamoa bilan birga bo'lmasamda, o'zim yakka tartibda mashg'ulotlar olib bormoqdaman. To'g'risini aytsam “Nasaf”dan ketgim yo'q!
“Nasaf” muxlislariga tilaklaringiz bo'lsa, uni etkazamiz.
-Men “Nasaf”ning barcha muxlislariga faqat va faqat g'alaba quvonchini tilayman, har doim jamoa yonida turishlariga tilakdoshman, chunki “Nasaf”ning har bir g'alabasida “12”-o'yinchilarning xizmatlari katta.
Sizga mazmunli suhbat uchun minnatdorchilik bildiramiz va faoliyatingizga muvaffaqiyatlar tilagan xolda Qarshida kutamiz.
-Nasib etsa boraman… Azamat Umarov suhbatlashdi
— deya xabar beradi uff.uz nashri.