Nihoyat, uzoq kutilgan kun etib keldi - hafta boshida JCh-2018 saralashi so'nggi bosqichi uchun qur'a tashlash marosimi bo'lib o'tdi. Ushbu marosimdan so'ng kayfiyat ko'tarildi, qur'a biz uchun kutilganidan ham a'lo keldi. Hozir O'zbekiston terma jamoa­si shunday holatdaki, nihoyat, uzoq kutilgan mundialga chiqishi shart. Chunki omad bizga kulib boqayotgandek. Quyida JCh yo'llanmasi qo'lga kiritilishi uchun omil bo'la oladigan uchta eng asosiy sababni keltirib o'tsak.
1. QUR'A
O'zbekiston milliy terma jamoasi mana 20 yildirki, jahon chempionati uchun kurash olib boradi, ammo biror marta bunday qur'aga yo'liqmagan bo'lsa kerak. Kuala-Lumpurdagi marosim oldidan turli taxminlar bildirildi. Bu taxminlarning deyarli har birida birinchi va ikkinchi savatchadan Eron va Janubiy Koreyani raqib sifatida ko'rish istagi bor edi. Yakunda bu umidlar oqlandi va aynan shu jamoalar JCh-2018 yo'lida bizga raqiblik qilishadi.
Albatta, quyi savatchadagi raqiblar borasidagi fikrlar turlicha bo'lgandir, buni inkor eta olmaymiz. Ammo kim nima demasin, bir gapni albatta, ta'kidlab o'tishni istagan bo'lardik - bu jamoalarning birortasi O'zbekistondan kuchli emas. Bizning guruhga tushgani ham, tushmagani ham. Shunday ekan, to'rtinchi, beshinchi va oltinchi savatchalar borasida umidimiz oqlanmagan bo'lsa - hech zarari yo'q. Eng muhimi - Avstraliyadek dunyoning narigi chekkasidagi mamlakatga borib-kelish zahmatidan qutuldik. Evropaning ancha-muncha jamoasini o'ylantirib qo'yadigan Yaponiyaga qarshi maydonga tushmasligimiz ham aniq. Eron va Janubiy Koreya bilan esa o'ynasa bo'ladi. Buni JCh-2014 uchun o'tkazilgan saralash musobaqasida isbotlab qo'yganmiz. Endigi masala esa, o'sha omadsizlik intiqomini olishda qolmoqda, xolos. Umid qilamizki, futbolchilarimiz bu ishni uddalay oladilar...
2. TAQVIM
O'zbekiston terma jamoasi uchun omadli kelgan yana bir narsa esa - bu JCh saralashi taqvimi. Shu vaqtga qadar taqvim biz uchun noqulay kelishiga ko'nikib qolgandik. Ammo endi nolishga aslo haqqimiz yo'q. Aksincha, bundan yaxshirog'ini kunduzi chiroq yoqib ham topa olmasligimiz muqarrar.
O'zbekiston milliy terma jamoasi JCh-2018 saralashini 1 sentyabrda o'z maydonida Suriyaga qarshi kechadigan o'yin bilan boshlaydi. Raqibga bo'lgan hurmatni saqlagan holda aytamiz, Suriya - guruhdagi eng kuchsiz jamoa hisoblanadi. Shunday ekan, mundialga chiqishni istaydigan jamoa bunday uchrashuvda g'alaba qozonishi shart. Aksincha holatda esa, JCh haqida o'ylashga nima bor?
Shuningdek, ikkinchi tur ham biz uchun omadli kelayotgandek. O'zbekiston milliy terma jamoasi guruhdagi ikkinchi uchrashuvni safarda Qatarga qarshi o'tkazadi. Ushbu uchrashuv 6 sentyabrga belgilangan. Qatar - sporti tez rivojlanayotgan o'lka. Shunga monand futboli ham ko'tarilyapti. Ammo hamma gap shundaki, bu o'lka terma jamoasi ko'pincha mahalliylashtirilgan legionerlar xizmatiga suyanadi. Aynan shu erda O'zbekiston milliy terma jamoasining ustun jihatlari ko'zga tashlanishi lozim. Chunki bizning termamiz sharafini yollanma o'yinchilar himoya qilmaydilar. Bu jamoa safida yuragida o'ti bor yigitlar to'p suradilar. Magarki, futbolchilarimiz shuni isbotlay olsalar, JChga albatta, chiqishimiz turgan gap.
Ammo bu ham hali hammasi emas. Har qanday musobaqada ham oxirgi tur katta ahamiyat kasb etadi. O'zbekiston milliy terma jamoasi guruhdagi so'nggi bahsni o'z maydonida Janubiy Koreyaga qarshi o'tkazadi. Albatta, bir qarashda bu o'yin ancha qiyin ko'rinishi mumkin. Ammo raqib guruhdan chiqish masalasini hal qilib ulgurgan bo'lsa, oxirgi turda bor kuchi bilan kurasharmikan - mana shu jihatni ham o'ylab ko'rish kerak. Agar Janubiy Koreya JCh yo'llanmasi masalasini muddatidan avval hal qilsa, Toshkentda bo'ladigan bahsga bor-yo'g'ini tikmasligi turgan gap. Albatta, hozircha bu ehtimoliy tasavvur. Ammo juda ham ro'yobga chiqishi mumkin bo'lgan tasavvur.
3. TARKIB VA SPORT FORMA
Albatta, har qanday qur'a va taqvim ham futbolchilar kuchli bo'lmasa, hech narsaga arzimay qolishi turgan gap. Baxtimizga bu tomonlama O'zbekiston terma jamoasi ko'p ham nolimasa bo'ladi. Har holda, tarkibda dunyo darajasidagi yulduzlar bo'lmasa hamki, qit'a miqyosida o'z nomi va o'rniga ega bo'lganlar etarlicha.
O'zbekiston terma jamoasi hozir o'z tarixidagi eng yaxshi tarkiblardan biriga ega. Buni ko'p e'tirof etib o'tganmiz. Ayniqsa, legionerlar masalasida omadimiz kelib turibdi. Bizda Rossiya chempionatining etakchi jamoalarida to'p suradigan futbolchilar bor. Shuningdek, kundan-kunga kuchayib borayotgan Xitoy va Qatar chempionatlarida ham o'z vakillarimizga egamiz. JCh saralashi bahslari esa kuzda start oladi. Yaxshi bilamiz, yilning aynan shu vaqtida futbolchilarimiz eng yaxshi sport formasiga kirib ulgurgan bo'ladilar. Boisi - oliy ligada ham, legionerlarimiz to'p suradigan chempionatlarda ham kurash qizg'in tus olgan bo'ladi. Shunday ekan, 20 yillik orzuni ro'yobga chiqarish uchun bundan ortiq imkoniyat bo'larmikan?
YaKUNDA
Albatta, bu gaplarning barchasi hozircha faraz, xolos. Ammo juda ham amalga oshirsa bo'ladigan faraz. Biroz uddaburonlik ko'rsatsak kifoya, hamma orzular amalga oshadi. Faqat ishga to'g'ri yondoshish kerak. O'rtoqlik o'yinlari tashkil etishda uquvsizlik qilmaslik lozim, tarkib tanlashda esa har qanday manfaat va qarashlarni bir chetga surib qo'yib, faqat xolis ishlash shart. O'shandagina O'zbekiston milliy terma jamoasi mundial ta'mini totib ko'radi.
Bunday qur'a, bunday taqvim va bunday tarkib bilan totmaslik ham alam qilardi-da. Agar bu safar ham JCh bizga begona bo'lib qolsa, hammasi terma boshida turgan mutasaddi-yu murabbiylar vijdoniga havola bo'ladi.
Davomi InterFUTBOL gazetasi blogida.
— deya xabar beradi uff.uz nashri.