Futbol bahslarida raqibga o'ta qo'pollik qilgan futbolchiga hakam qizil kartochka ko'rsatib, maydondan chiqarib yuboradi. Bu jarayon ikki xil ko'rinishda bo'lishi mumkin: birinchisi - o'yinchiga uchrashuv davomida bir bor sariq kartochka, ya'ni ogohlantirish berilganidan so'ng  yana jiddiy ravishda qoidani buzsa, ikkinchisi raqibga jarohat etkazish mumkin bo'lgan darajadagi qo'pollik qilganida va boshqa vaziyatlarda to'g'ridan-to'g'ri alvon kartochka oladi.
Umuman olganda maydondan haydalishga olib keladigan bu holatning futbolchi va jamoa uchun oqibatlari yomon. O'zini tuta olmagan, qoidabuzar, asabiy va qiziqqon o'yinchini deb butun boshli jamoa bahsning qolgan qismida raqibdan bitta kam sonli bo'lib o'ynaydi, bundan tashqari o'sha futbolchi bir necha o'yinni maydon chetidan turib tomosha qilishga majbur. Professional va raqibini hurmat qilgan futbolchilar sport tamoyillariga rioya qilib, qoidalarni kamdan-kam holatda buzadilar. Lekin, bunday intizomli futbolchi bo'lish juda qiyin. Sababi, futbod yakkakurashlarga boy o'yin.    
E'tiboringizga,  o'tmish va hozirda referilar umuman maydondan haydamagan top-yulduzlar haqidagi ma'lumotlarni havola etsak.     
Mikael Laudrup
O'yinchilik faoliyati: 17 yil (1981-1998)
Daniyalik bu oliyjanob o'g'lon murabbiy sifatida o'zining qadrdon “Brondbyu” jamoasini milliy birinchilikda ko'p bora chempion qilib, “Suonsi” bilan Liga Kubogini ham qo'lga kiritgan. Uning futbolchilik faoliyati esa yanada samaraliroq kechgan edi. U Trappatoning “Yuventus”dagi oltin davrida jamoaning bir bo'lagi bo'lgan, “Barselona” bilan qo'lga kiritish mumkin bo'lgan barcha sovrinlar egasi, so'ng biroz vaqt “Real”da ham to'p surgan. Mikael o'z yurtida ikki bora yil o'yinchisi sovriniga egalik qilgan bo'lsa, Kataloniyada o'tkazgan ilk mavsumidan so'ng Ispaniyada ham shu martabaga erishishni uddalagan edi. Uning eng yodda qoladigan shohona tryuki “so'qir” pas bo'lib, ko'pchilik buni Ronaldino o'ylab topgan deb xato qiladi. U maydonning eng qizg'in bo'lagi bo'lgan o'rta chiziqda to'p surib, 17 yillik faoliyati davomida biror marta ham qizil kartochka olmagan. Mikael doim o'zining “toza” o'yini bilan boshqalarga o'rnak bo'lgan.  
Gari Lineker
O'yinchilik faoliyati: 16 yil(1978-1994)
Ayni paytda angliyalik bu shaxsning ismi sharifi futbol o'yinidan ko'ra Birlashgan Qirollik mediahududida ko'proq tilga olinadi. Linekerning ovozi BT Sport  tomonidan efirga uzatiladigan chempionlar Ligasi translyatsiyalarini tashrif qog'ozi bo'lib, u studiyadagi efirlarda ham ishtirok etib turadi. Uning Tvitterdagi sahifasini esa futbolchilarga nisbatan aytiladigan hazillar va original fikrlar arxivi deyish mumkin.
Televidenie ekranlarida paydo bo'lishdan ancha oldin Gari - Angliyaning saksoninchi yillardagi eng zo'r hujumchisi bo'lgan. 1986 yildagi jahon chempionatining eng zo'r to'purari sovrini, terma jamoa safida kiritgan gollari bo'yicha uchinchi o'rinda turishi, FIFA-100 ro'yhatidagi munosib joyni egallaganligi uning qanday futbolchi bo'lganligidan dalolatdir.  “Barselona”ning sobiq o'yinchisi 16 yillik faoliyati davomida biror marta maydonda qizil kartochka olmaganligi bilan bir vaqtda, hech qachon sariq kartochka ham olmagan ekan. Lineker o'zining intervyularidan birida bunday muvaffaqiyatga erishish unga qiyin bo'lmaganiga omil qilib, hakamlar u tomonidan sodir etilgan jiddiy qoidabuzarliklariga e'tibor bermaganliklarini aytgan.
Raul Gonsales
Futbolchilik faoliyati: 21yil (1994-2015)
Marca nashri talqini bo'yicha Ispaniyaning barcha davrlardagi eng zo'r futbolchisi ham faoliyati davomida biror marta maydondan haydalmagan. Bu statistikaga ayniqsa uning “Real”ning asosiy tarkibida 16 yil davomida to'p surib, yiliga ikki marta jahonning eng kuchli qarama-qarshiligi “El Klasiko”da qatnashgani alohida tus beradi. Bundan tashqari Raul uch bora chempionlar Ligasi, Ispaniya Superkubogi va UEFA finallarida ishtirok etgandi. Gonsales “qaymoqranglilar” safidan ketganidan so'ng “Shalke” “Al Saad” va “Nyu-York Kosmos” jamoalarida o'ynab, qizil kartochkaga tortadigan qoidabuzarlikka yo'l qo'ymagan.
David Trezege u haqda: “Raul faqat o'z jamoasi uchun emas, balki umumiy futbol obro'si uchun o'ynaydi”, –degan edi. Darhaqiqat, ispaniyalik hujumchi professional sportdagi faoliyati davomida xushxulqligini ko'rsata oldi, u maydonda o'zini ziyolilarcha tutar, shaxsiy hayotida ham oilaparvarligi va hayriya ishlarida faolligi bilan  boshqalarga o'rnak bo'lgan.
Demen Daff
Futbolchilik faoliyati: 19 yil (1996-2015)
 
Irlandiyalik futbolchi yoshi anchaga borib qolganida mashhur bo'lgan. Yarim himoyachi sifatida “Chelsi”da Kludio Raneri jamosining asosiga aylanganida u 27 yoshga kirgan edi. Mourino bilan ilk mavsum ham yomon kechmadi – Daff jamoadoshlari Gudonsen, Kejman, Lempard va Koullar bilan “ko'klar”ga chorak final yo'lida “Barselona”ni engishga va 50 yil davomida yagona bo'lgan milliy chempionat oltin medallarini qo'lga kiritishga ko'maklashdi. Joze jahon miqyosidagi yulduzlarni sotib olishni boshlashi bilan irlandiyalik futbolchi u jamoadan ketdi. Shundan so'ng u ikki marta “Nyukasl” va “Fulxem” bilan Chempionshipga tushib, Evropa Ligasi finalida ishtirok etdi. U o'z yurti jamoasiga qaytgach maoshdan ham voz kechgan. Qizig'i, Daff faoliyati davomida eng  dag'al va shijoat bilan o'ynaladigan top-chempionnatda ishtirok etib ham qizil kartochka olmagan.
Xavi va Inesta
Futbolchilik faoliyati: 1997-shu kungacha / 2001-shu kungacha
Zamonaviy ispan termasining eng omadli avlodi  safidagi ikki qoyaning ro'yhatda borligi hech kimni taajjublantirmasa kerak. Ko'pincha “Barselona” ma'suliyatli bahslar davomida bir o'yinchi kam bo'lib harakatlanishga majbur bo'ladi.  Bu hollarda maydonni himoya chizig'idagi biror-bir o'yinchi tark etadi. Xavi va Inestadagi harakatlar uyg'unligi va Messi bilan birga jahonning eng zo'r klubining asosi bo'lgan. Bu uyg'unlik to'p nazoratiga kafolat berib, ikkavlon o'yin mobaynida bir talay nozik va aniq to'p uzatmalar egasi bo'lishsada, hakamlar tomonidan qizil kartochka olish uchun asosli qoidabuzarlikka yo'l qo'yishmagan. Leo esa o'zining Argentina safidagi debyut uchrashuvidayoq  maydonni alvon qog'oz orqali tark etgandi.
Filipp Lam
Futbolchilik faoliyati: 2001-hozirgi kungacha
Kelajak avlod mana shu nemis o'yinchisidan professional futbolchi qanday bo'lishi kerakligining etaloni sifatida foydalanishi mumkin. Myunxenda ulg'aygan yigit 18 yoshida “Bavariya”ning bir bo'lagiga aylanib bo'lgandi. Uzoq yillar davomida suyukli klubiga xizmat qilgan Lam ko'plab sovrinlarni qo'lga kiritdi. U Germaniya termasi bilan sardor sifatida  Braziliyada asosiy sovrin egasi bo'lgach, mamlakatda mashhur insonga aylandi.  
Gvardiola Myunxenga kelgach jamoada to'pni nazorat qilish qoidalarini targ'ib etib, Lamdan markaziy yarim himoyachi sifatida foydalana boshladi.
"Lam jahondagi eng aqlli o'yinchilardan bo'lib, u har qanday pozitsiyada o'ynashni juda oson o'zlashtiradi", - degan edi Pep.
Filipp markazdagi rolga o'tmagan bo'lsada, murabbiy ishonchini to'la oqladi. 32 yoshli Lam shu paytgacha qizil kartochka olmagan. Elmurod ERMATOV tayyorladi
— deya xabar beradi uff.uz nashri.