Trampolin bo'yicha O'zbekiston ayollar terma jamoasi a'zolari Ekaterina Xilko hamda Anna Gasparyan Braziliyaning Rio-de-Janeyro shahrida o'tkazilayotgan litsenzion musobaqada ishtiroklarini boshlaydilar.
Har ikki sportchimiz ham mazkur musobaqaga so'nggi o'quv-mashg'ulot yig'inini AQShda o'tkazishdi.
Eslatib o'tamiz, Ekaterina Xilko hamda Anna Gasparyan 2015 yili Daniyada bo'lib o'tgan jahon chempionatida kuchli 20talikdan o'rin egallab, XXXI yozgi Olimpiada o'yinlariga yo'llanmalar o'ynaladigan musobaqalarning ikkinchi bosqichida qatnashish huquqini qo'lga kiritishgan edi.
Rio-de-Janeyro shahrida bo'lib o'tadigan ikkinchi saralash bosqichida 1-8 o'rinlarni band etgan trampolinchilar XXXI yozgi Olimpiada o'yinlariga yo'llanma oladilar.
Har ikki sportchimizga bo'lajak mas'uliyatli musobaqada omad va zafarlar tilab qolamiz.
Ma'lumot uchun. Ekaterina Xilko 2000, 2004, 2008, 2012 yillari o'tkazilgan yozgi Olimpiada o'yinlarida ishtirok etib, 2008 yili Pekin shahri (Xitoy)da bo'lib o'tgan Olimpiadada bronza medali sovrindori bo'lgan.
Bugungi kunga kelib dunyoda sportning ushbu turi bo'yicha to'rt nafar sportchiga to'rt marotabadan Olimpiada o'yinlarida qatnashish nasib etgan. Ular orasidan hamyurtimiz Ekaterina Xilko ham o'rin egallagan. Agarda bugun bo'lib o'tadigan saralash musobaqasida ham hamyurtimiz muvaffaqiyatli ishtirok etib, Olimpiada o'yinlariga beshinchi marotaba yo'llanmani qo'lga kiritsa, bu borada yakka peshqadamga aylanib oladi. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.