(Davomi. Boshlanishi "InterFutbol"ning o'tgan sonlarida).
FIFA|OFK murabbiy-instruktori Islom Ahmedovning bu galgi tavsiyalari asosan, bolalar futbolida e'tibordan chetda qolayotgan ayrim jihatlarni o'z ichiga qamrab oladi. Bu maslahatlar yashil maydonga asta-sekin qadam qo'yayotgan futbolchilarni shug'ullantirishni o'z zimmasiga olgan murabbiylar faoliyatida qo'l kelsa, ajabmas.
Men buyuk futbol mutaxassisi, afsonaviy murabbiy B. Arkadevning so'zlaridan parcha olishni ma'qul ko'rdim. Kelgusida ham uning tajribalariga tayanish niyatim yo'q emas.
Mahoratning futboldagi o'rni qanday?
E'tibor bersangiz, aksariyat o'yinchilar faoliyatlarining so'nggi pallalaridagina haqiqiy futbol namoyish etishni boshlaydilar. Boshqalar esa masalaning asl mohiyatini tushunmagan holda butsalarini mixga ilishadi. Hech nimani tushunib ulgurmay, o'zlarini murabbiylikka urishadi, hech nimani tushunmay, yosh avlodni shug'ullantirishadi.
Futbolchilar jismoniy holatlari yomonlashgan paytdagina astoydil o'ynashga intiladilar. Bu masalaga ke­yinroq batafsil to'xtalamiz. Hozir esa futboldagi mahoratning o'rni xususida gaplashsak.
O'quv-mashg'ulot jarayoniga o'zgartirish kiritishdan maqsad - har bir o'yinchi yaxshi sifatlarini faoliyatining so'nggi pallalarida emas, balki eng porloq davrida namoyish eta olsin.
Biz bolalar, o'smirlar va yoshlar bilan ishlash chog'ida shunday yo'l tutaylikki, keyingi mashg'ulot jarayonida, o'yindan-o'yinga ularning MAHORATlari oshaversin.
Fikrlarimni o'qiyotgan barcha murabbiylar hamda futbol ixlosmandlariga shuni aytmoqchimanki, futboldagi MAHORAT tushunchasini aniq ang­lab olish lozim. Xo'sh, aslida bu nima o'zi? Bir so'z bilan aytganda, bu futbolni TUShUNISh degani!
Vaqt o'tgani sayin futbolchi o'yin amaliyotiga ega bo'lib boraveradi. Buni o'sha sportchining bir necha yildan so'ng maydonda namoyish etgan o'yiniga qarab anglab olish qiyin emas. Kimdir buni ertaroq anglaydi, kimdir kechroq, ayrimlar esa ayni xususiyatdan umrbod mosuvo bo'ladilar. Xo'sh, bu nimaga bog'liq? Futbolchi aynan kuchga to'lgan paytida shu tushunchani anglashi uchun qaysi jihatlarga ko'proq e'tibor qaratishimiz kerak?
Sir emaski, futbolda to'rtta omil muhim ahamiyat kasb etadi - texnika, taktika, jismoniy va ruhiy tayyorgarlik. Ammo nimadir o'xshamasa, hamma futbolchining jismoniy holati yomonligini ro'kach qiladi. Yomon tomoni, mahoratli o'yinchilar tayyorlash xususida gap ketganda, bor e'tiborni jismoniy tayyorgarlikka qaratamiz.
Axir ilmiy asoslangan, raqamlarga tayangan, aniq tavsiyalarga ega boshqa uslublar ham bor-ku.  Qachonki shogirdlarimizning futbolni to'g'ri tushunishlarini ta'minlay olsak, haqiqiy futbol guvohiga aylanamiz. To'g'ri, turli jismoniy sifatlarni rivojlantirish lozimligini inkor etolmaymiz, ammo ularni amalga oshirish uchun ma'lum davr bo'ladi. Futbolda ikkita muhim sifatlar bor - kuch va aerobik imkoniyatlar.
Davomi InterFUTBOL gazetasi blogida.
— deya xabar beradi uff.uz nashri.