1news.uz — Mamlakatimiz ilk bor kattalar o'rtasidagi Osiyo chempionatiga mezbonlik qilmoqda. To'g'ri, O'zbekiston xalqaro musobaqalar tashkil etish bo'yicha ulkan tajribaga ega. Hozirgacha birgina og'ir atletika bo'yicha diyorimizda 7ta xalqaro musobaqa uyushtirilgan. Uch bor qit'a kubogi, ikki marta yoshlar va o'smirlar o'rtasidagi Osiyo chempionati, bir marotaba Afro-Osiyo chempionati va nihoyat 2013 yil II o'smirlar Olimpiya o'yinlariga yo'llanma beruvchi jahon chempionatini o'tkazish bizga ishonib topshirilgan va O'zbekiston har gal bu ishonchni to'liq oqlagan. Demak kattalar o'rtasidagi Osiyo chempionatiga Toshkent shahri mezbonlik qilayotgani tasodif emas. O'zbekiston og'ir atletika federatsiyasi bunday darajaga bosqichma-bosqich chiqib kelgan. Shu bilan birga o'tgan yillar davomida o'zbekistonlik og'ir atletikachilarning xalqaro maydondagi natijalari ham o'sib bordi. Bizda jahon chempioni va rekordchisi, jahon chempionatlari sovrindorlari bor. O'zbekiston Mustaqil davlat sifatida qatnashgan Olimpiadalarda og'ir atletikachilar muntazam ishtirok etishgan. Barcha Osiyo o'yinlarida esa atletlarimiz uzluksiz ravishda shohsupadan o'rin olishgan. Ammo bu safargisi shu paytgacha yurtimizda uyushtirilgan musobaqalar orasida eng muhimi desak, xato bo'lmaydi, chunki Olimpiya o'yinlariga yo'llanma beruvchi kattalar o'rtasidagi qit'a chempionatlari har to'rt yilda bir marta, faqat Olimpiada yilida o'tkaziladi. Ana shu holatning o'ziyoq, poytaxtimiz mezbonlik qilayotgan Osiyo chempionatiga qiziqish naqadar yuqori ekanligini isbotlashi mumkin.
Bu yilgi qit'a chempionatiga 32 davlatdan 300 nafarga yaqin sportchi, 200 nafarga yaqin murabbiy, hakam, milliy federatsiyalar vakillari, mas'ul mutaxassislar tashrif buyurishgan. Gap faqat sonda emas, albatta. Toshkentda to'plangan atletlar orasida 20dan ziyod Olimpiada ishtirokchilari borligi bahslar naqadar keskin, murosasiz o'tishidan dalolatdir. London Olimpiadasi g'olibi, xitoylik King Fen Lin, shu musobaqada shohsupaga ko'tarilgan KXDR sportchisi Chun Xva Ryang, indoneziyalik Triatnolarni jahon og'ir atletikasi darg'alari deyish mumkin. «O'zbekiston» sport majmuasida o'z mahoratini namoyish etishi kutilayotgan jahon chempionatlari g'olib va sovrindorlarini sanash uchun esa barmoqlarimiz etmasa kerak. Yaxshisi, 30 aprel kunigacha davom etadigan musobaqamizni kuzatib borsangiz, bunga o'zingiz ham guvoh bo'lasiz.
Osiyo chempionati medallari uchun bahslar 24 aprel kuni ertalab “O'zbekiston” sport majmuasida boshlanadi. Ungacha 21 apreldan boshlab qit'a federatsiyasi yig'ilishlari rejalashtirilgan. Shu kuni texnik, tibbiy, xotin-qizlar, ilmiy va murabbiylar qo'mitalari tegishli masalalar muhokamasiga to'planishadi. 22 aprel ertalab Osiyo OAF Ijroiya qo'mitasi yig'ilishi o'z ishini boshlaydi. 23 aprel kuniga tashkilotning yillik kongressi belgilangan.
Osiyo chempionati munosabati bilan Toshkentga bir qator martabali mehmonlar ham tashrif buyurishgan. Bular – Xalqaro og'ir atletika federatsiyasi prezidenti  janob Tamash Ayan, Osiyo og'ir atletika federatsiyasi prezidenti janob Muhammad Yusuf Al Mana, Osiyo og'ir atletika federatsiyasi Bosh kotibi janob Muhammad Hasan Jolud va boshqalardir. Mazkur Osiyo chempionati yakunlariga ko'ra, Xalqaro og'ir atletika federatsiyasi tomonidan erkaklar uchun 7ta, ayollar uchun 6ta Olimpiada yo'llanmasi eng munosib jamoalarga taqsimlab beriladi. Shu bilan birga 15 to'plam (odatdagidek, erkaklar 8ta, ayollar esa 7 ta  vazn toifasi bo'yicha kuch sinashadilar) – jami 45ta medal eng kuchli sportchilarga taqdim etiladi.
Mazkur musobaqa odatdagilaridan keskin farq qiladi, sababi Toshkent shahrida Xalqaro og'ir atletika federatsiyasi Rio-de-Janeyro shahrida bo'lib o'tadigan Olimpiya o'yinlarining so'nggi yo'llanmalarini o'z egalariga tarqatadi. To'g'risi, Osiyo miqyosidagi musobaqalarga har doim ham bunday jiddiy e'tibor qaratilavermaydi, chunki qit'a chempionatlari har 4 yilda bir marta, faqat Olimpiada yillaridagina eng nufuzli sport anjumaniga litsenziya beradi. Shu munosabat bilan O'zbekiston og'ir atletika federatsiyasi matubot xizmati ushbu federatsiya birinchi vitse-prezidenti, Osiyo OAF vitse-prezidenti, O'zbekistonda xizmat ko'rsatgan murabbiy Shahrillo Sharipovich Mahmudovga bir necha savol bilan murojaat qildi.
Davomi 1News.Uz blogida.
— deya xabar beradi uff.uz nashri.