Futzal bo'yicha O'zbekiston terma jamoasi Kolumbiyada bo'lib o'tadigan Jahon chempionatiga tayyorgarlikning dastlabki bosqichini davom ettirmoqda. Xose Mariya Mendez shogirdlari xalqaro o'rtoqlik turnirida ishtirok etish uchun 20 aprel kuni Yaponiyaga uchib ketdi. Safar oldidan kecha, 19 aprel kuni futzalchilar so'nggi mashg'ulotni o'tkazishdi. "Bunyodkor" jamoasi sport zalida o'tkazilgan mashg'ulotda barcha o'yinchilar ishtirok etdi. Terma jamoa delegatsiyasi 20 aprel kuni 10:00 da Toshkent - Bangkok - Nagoya yo'nalishida "Kunchiqar yurt"ga yo'l oldi. Eslatib o'tamiz, Yaponiyadagi turnir 22-24 aprel kunlari bo'lib o'tadi. Unda mezbonlardan tashqari, O'zbekiston hamda Vetnam milliy terma jamoalari ham ishtirok etishadi.
— deya xabar beradi uff.uz nashri.