Gollandiyalik yosh iqtidor sohibi Vinsent Yanssen hozircha biror-bir yorqin natija bilan maqtana olmaydi, Jeymi Vardi yoki Mahrez kabi shov-shuv sababchisi ham emas. Ammo bu futbolchining bosib o'tgan yo'li shunchalik hayratlanarliki, taniqli yulduzlar ham havas qilsalar arziydi.
Futbol olamiga Rud van Nistelroydek hujumchini tortiq etgan mo''jazgina Oss shaharchasi (Brabant viloyati) tez orada Vinsent Yanssen bilan faxrlansa, ajabmas. Futbolchi uyining yo'lagidagi bir jihat u erga tashrif buyurgan kishining e'tiborini tortadi. Kiyim ilgichlar va poyabzallarga mo'ljallangan shkaf o'rtasidan Gollandiya yoshlar terma jamoasining ko'k rangdagi futbolkasi joy olgan. Vins o'zining termadagi debyutini Ingolshtadtda nishonlab uyiga qaytgach, ma'shuqasi Shaklin safar anjomlarini tartibga keltirishga urindi: «Jomadon ichidagi buyumlar orasidan kir bo'lgan futbolkani olib, kir yuvish mashinasi yoniga tashladi. Men uni yuvishni mo'ljallagandim, biroq Vinsning hayratomuz nigohidan bildimki, «9» raqamli libos uning uchun muhim ahamiyatga ega». Ko'zi futbolkaga tushganda Yanssenning yuzi yorishib ketadi.
«Terma jamoa ixtiyoridan uyga qaytib kelganimda uning safida to'p surish qanchalik maroqli ekanligini to'liq his etdim. Bundan atigi 1,5 yil avval «Feyenoord»da meni «chiqindi»ga chiqarishgandi. Endi esa «Yonxorane»da to'p suryapman. Shunday bo'lishini kim ham o'ylabdi, deysiz? Faqat bitta ko'ngilni xira qiladigan jihat bor - afsus, futbolka lola rangda emas, ko'k».
Sport - Yanssenlar oilasidagi bosh mavzu. Vinsning onasi - Anna-Mariya Ferstappen - mashhur suzuvchi, JCh va Los-Anjeles Olimpiadasida oltin medallarga sazovor bo'lgan. Opasi - Frederika ham ona izidan borib, Bokuda o'tkazilgan Evropa chempionatida shohsupaga ko'tarildi. Anna-Mariya o'zining sovrinlarini chordoqda saqlaydi, maqtanishni yoqtirmaydi. Lekin farzandlaridan qimmatli maslahatlarini ayamaydi.
«Yuksak sport formani saqlash sirlari - o'z vaqtida uxlash, kun tartibiga rioya qilish, ovqatlanish va musobaqalarga puxta tayyorgarlik ko'rishni aynan undan o'rganganmiz», deydi Vins. Biroq bundan atigi bir yil muqaddam u Gollandiya 2-ligasining kamtarin jamoasi - «Almere Siti» tarkibida, muxlislar soni 1,5 mingdan oshmaydigan mo''jaz stadionda to'p surar, onasi va opasi erishgan natijalar hatto tushida ham yo'q edi. Yoshlar terma jamoasiga tez-tez chaqirib turishsada, Karim Rekika, Toni Vilena va Jan-Poel Boetius kabi mahorat sohiblari orasida o'zini ko'rsatolmayotgandi. Endi esa u afsonaviy «Uembli»ning tribunalarosti yo'lagida maydonga tushish tadorigini ko'rmoqda.
Hatto, tushida kiyishga ham jur'at etolmaydigan «lolaranglilar» libosida. Yo'lak devoridagi Jeff Xerst, Garri Lineker, Alan Shirer va boshqa yulduzlar siymolari uni qandaydir sinchkovlik va ajablanish bilan kuzatayotgandek tuyuldi. Bu Vinsent Yanssenning bosh jamoadagi ikkinchi uchrashuvi edi. Terma safida ilk marta bir necha kun muqaddam Amsterdamda maydonga tushgan, Dani Blind o'shanda yosh hujumchiga so'nggi 10 daqiqada to'p surish imkonini bergandi. Londonda esa murabbiy Yanssenni boshlang'ich tarkibga kiritdi, 82000 muxlis ko'z o'ngida.
Buni qarangki, kuchli raqibga qarshi kechgan safardagi o'rtoqlik uchrashuvi Vinsentning «benefis»i­ga aylandi. Avvaliga Denni Rouz o'z jarima maydonchasi ichida to'pni qo'l bilan o'ynaganida, yosh hujumchi dadillik bilan «nuqta»ga yaqinlashdi. Zarbani shunchalik kuchli va aniq yo'lladiki, har qanday mohir darvozabon uni qaytarishga qodir emasdi. Shu tariqa, muvozanatni tiklagan Yanssen bir necha daqiqadan ke­yin Fil Yagilkadan ustunlik qilib, to'pni qulay vaziyatda turgan Lusiano Narsingxga oshirdi - 1:2. Terma jamoadagi ertaknamo debyut, shunday emasmi? Aslini olganda, Vinsentning so'nggi bir yil ichidagi faoliyati chindan ertaknamo bo'ldi. Har holda, Jeymi Vardi ertagidan qolishmaydi.
Angliya termasiga qarshi uchrashuv yakuniga etgach, echinish xonasida telefonini yoqqan Vine ekranda ko'plab tabriklarni ko'rdi. Ular orasida eng qadrlisi Fred Grimdan kelgan tabrik edi: «Golni ajoyib tarzda urding, Vins! Endi hammasini to'g'ri bajarayotganingga o'zingni ishontir». Grim - «Feyenoord» Yanssenga ishonch bildirmagan pallada uni o'z jamoasiga taklif etgan murabbiy. To'g'ri, Rotterdamda Vins goh shvetsiyalik noyob iqtidor sohibi Yon Gvidetti, goh Italiya terma jamoasining a'zosi Gratsiano Pelle soyasida qolib ketib, Ronald Kumanning ishonchini qozona olmagandi. Oxir-oqibat, bosh murabbiy va texnik direktor Martin van Gel 19 yoshli hujumchi bilan shartnoma imzolamaslikka qaror qilishdi.
Shunda Fred Grim uni «Almere Siti»ga taklif etdi. Hujumchi quyi divizion mashaqqatlaridan cho'chimay taklifni qabul qildi. Ana shu kamtarin jamoada juda ko'p narsalarni o'rgandi, jismoniy quvvatni oshirish borasida tinmay mashq qildi, jarima maydonchasi ichida hukmronlik qilishga odatlandi. «Undagi mehnatsevarlik juda kam uchraydi. O'zi tinib-chinchimasdan mashq qilishiga qaramay, yanada ko'proq topshiriqlar berishimizni so'raydi. Ishtiyoqi juda baland. Ammo salbiy jihatlari ham yo'q emas. Almeredagi 2 yil ichida Vins 20ta sariq kartochka oldi. Hujumchi uchun bu juda ko'p», - dedi Grim.
Darhaqiqat, uning nomini hakamlar tez-tez qayd etib turishadi. Biroq stadion suxandonlari Yanssenni ulardan ancha ko'proq tilga olishadi. Ana shu ikki mavsumda Vins 34ta gol urdi. E'tiborli jihati shundaki, hujumchi ajoyib barqarorlikni namoyish etmoqda. Ayrim kasbdoshlari singari bir uchrashuvda «xet-trik» yoki «poker»ni qayd etib, keyin oylar davomida gol urolmaslik uning odati emas. Har safar u hech bo'lmaganda bitta gol uradi. Aynan shu sababli «Yanmar» stadionida uning o'yinlarini kuzatadigan mutaxassislar soni ko'paya boshladi. Gollandiyadan tashqari, Belgiya va Germaniya jamoalari ham unga qiziqmoqdalar. Qisqasi, Yanssen mahalliy yulduz maqomiga ko'tarilib oldi. Shogirdidagi ijobiy o'zgarishlarni diqqat bilan kuzatib borayotgan Grim uni yoshlar terma jamoasiga tavsiya etdi. Shuningdek, Alkmaarning «AZ» klubiga ham Yans­sen aynan ustozining ko'magi bilan yo'l oldi. «Pishloqchilar»ning o'yin falsafasidan yaxshi xabardor bo'lgan murabbiy shogirdining aynan shu jamoada muvaffaqiyat qozonishiga shubha qilmagandi.
Milliy terma jamoadan kelgan chaqiruvdan Vins «AZ»dagi mashg'ulotlar payti xabardor bo'ldi: «Soat 12:00ga 5 daqiqa qolganida menejerimiz mashg'ulot maydonchasiga kelib Ron bilan menga bosh barmog'ini ko'rsatdi. Tushundimki, bizga termadan taklif kelgan. Bosh murabbiy Yon van der Brom bizni samimiy tabrikladi. Quvonchdan o'zimni ettinchi osmonda his etdim. Lekin tez orada o'zimni qo'lga olib, «Tvente»ga qarshi bahsga hozirlana boshladim».
To'g'ri, Yanssenning Alkmaardagi ishlari ham osonlikcha yurishib ketmadi. Yangi jamoa bilan til topishgunga qadar kutilgan sermahsullikni ko'rsatolmadi. Aksiga olib, ayni omadsiz pallalarda Fox Sports studiyasi uni muloqotga taklif etganida, hujumchi Gollandiya terma jamoasi xususidagi savollarga chek qo'ydi: «Kimlardir «lolaranglilar» safida samarali o'yin ko'rsatmoqda. Biroq men hozircha ularga «yo'q», «yo'q», deya javob beraman. «Apelsin» iborasini ishonch bilan tilga olishim uchun hali anchagina ter to'kishim lozim». Taqdirning qaltis hazilini qarangki, TVdagi o'sha intervyudan keyin Vins Bilbaoda 2 nafar himoyachini aldab o'tib, to'pni unga qarshi yugurib chiqqan darvozabon ustidan «parashyut» usulida oshirgan holda darvozani zabt etdi!
Undan keyingi bir-ikki nursiz uchrashuvlar va qishki ta'tilni hisobga olmaganda, hujumchini hech kim to'xtata olmayapti. Erediviziyaning yangi yildan keyingi 11ta uchrashuvida Yanssen 10ta gol urdi. Faqat «NEK» darvozabonini ranjitolmadi. Ayniqsa, Alkmaarga Vinsni «chiqindi»ga chiqargan «Feyenoord» tashrif buyurganida, hujumchi bor alamini «xet-trik» or-qali to'kib soldi. Yakunda mezbonlar kuchli raqibni 4:2 hisobida mag'lub etishdi. Boz ustiga, Yanssenning gollari bir-biridan chiroyli tarzda chiqdi. Umuman, Vins darvozani chiroyli tarzda ishg'ol etishni yoqtiradi. Buning uchun bor kuchini sarflaydi, izlanadi. Darvoza tomon zarba yo'llash borasida (har bir uchrashuvda o'rtacha 4ta zarba) u erediviziyada faqat Hakim Ziexadan ortda. «AZ»ning kombinatsion uslubi ham Yanssenning sermahsul to'p surishiga ijobiy ta'sir etmoqda. Natijada, yosh hujumchi chempionat to'purarlari bahsida etakchilik qilmoqda.
Davomi InterFUTBOL gazetasi blogida.
— deya xabar beradi uff.uz nashri.