Oliy liga bahslari tobora qizg'in pallasiga kirib bormoqda. O'tgan yili autsayderlar qatorida yurgan klublarning joriy mavsum yorqin o'yin ko'rsatib, turnir jadvalining yuqori qismidan joy egallashgani bu galgi chempionatning o'zgacha tarzda davom etayotganidan dalolat. Murosasiz uchrashuvlarga boy bo'lgan 5-turda jamoasining ochko to'plashiga munosib hissa qo'shganlar uchradi. Navbatdagi tur ramziy terma jamoasini tuzishda, odatdagidek, faolligi bilan alohida ajralib turgan futbolchilar nomiga murojaat etdik.
Darvozabon:
Temur G'aniev («So'g'diyona»)
Farg'onada kechgan bahsda «Neftchi»dan yuz o'girgan omad «So'g'diyona» vakillariga kulib boqdi. Qolgan pallalarda esa mezbonlar hujumchilari qarshisida Temur G'aniev paydo bo'ldi. Jizzaxliklar posboni o'z darvozasi daxlsizligini saqlab qolish orqali jamoasi g'alabasiga munosib ulush qo'shdi.
Himoyachilar:
Kamoliddin Tojiev («Paxtakor»)
Mazkur turda himoya vakillari to'p kiritish bobida hujumchilarga o'rnak bo'lishdi. Mehmonda «Qizilqum»ning jiddiy qarshiligiga uchragan «Paxtakor» Kamoliddin Tojievning goli evaziga muhim 3 ochkoga ega bo'lishi mumkin edi. Biroq...
Georgi Kvesieshvili («Qizilqum»)
...«Qizilqum» himoyachisi Georgi Kvesieshvili bunga yo'l qo'ymadi. Gruziyalik legioner mudofaa chizig'idagi faolligi bilan cheklanib qolmay, uchrashuvning so'nggi daqiqalarida jamoasini mag'lubiyatdan qutqarib qolgan gol muallifiga aylandi.
Sherzod A'zamov («Nasaf»)
Xuddi shunga o'xshash holat Qarshida ham kuzatildi. Farqli tomoni - «Nasaf» vakili Sherzod A'zamov urgan gol «ajdarlar»ga g'alaba keltirdi. Butun bahs davomida qo'qonlik hujumchilarni darvozaga yaqinlashtirmaslikni ajoyib tarzda uddalagan himoyachi haqli ravishda uchrashuvning eng yaxshi futbolchilaridan biri sifatida e'tirof etildi.
Aleksandr Merzlyakov («Buxoro»)
Chempionatni ko'tarinki kayfiyatda o'tkazayotgan «Buxoro» klubi mudofaa chizig'ining mustahkamligi bilan maqtansa arziydi. Xususan, «Andijon»ga qarshi kechgan bahsda Aleksandr Merzlyakov eng faol harakat qilganlardan biri bo'ldi. Mahoratli himoyachi hujumlarga tez-tez qo'shilib, aniq uzatmalari bilan ajralib turdi.
Davomi InterFUTBOL gazetasi blogida.
— deya xabar beradi uff.uz nashri.