Braziliyaning Rio-de-Janeyro shahrida badiiy gimnastika bo'yicha o'tkazilayotgan litsenzion musobaqada mamlakatimiz sportchilari jamoaviy bahsda ham muvaffaqiyatli ishtirok etib, XXXI yozgi Olimpiada o'yinlariga yo'llanmani qo'lga kiritdilar.
Avvalo shuni ta'kidlash joizki, badiiy gimnastika bo'yicha jamoaviy bahslarda shu paytga qadar mamlakatimiz sportchilari Olimpiada o'yinlariga yo'llanma olishmagan edi. Demak, terma jamoamiz a'zolari bu borada O'zbekiston sporti tarixida yangi sahifani ochdilar.
Jamoaviy bahslarda Vatanimiz sharafini himoya qilgan Samira Amirova, Valeriya Davidova, Luiza Ganieva, Zarina Qurbonova hamda Marta Rastoburova hal qiluvchi final musobaqasida umumiy hisobda 32.832 ochko jamg'arib, Germaniya terma jamoasidan keyin ikkinchi o'rinni band etdilar va “Rio-2016” Olimpiada o'yinlariga yo'llanmani qo'lga kiritdilar.
Eslatib o'tamiz, jamoaviy musobaqada 1-3 o'rinlarni band etgan jamoalar Olimpiada o'yinlariga yo'llanma olishdi. Hamyurtlarimiz hal qiluvchi final bahslarida Gretsiya, Finlyandiya, Braziliya, Ozarbayjon va Janubiy Koreya terma jamoalarini ortda qoldirishga muvaffaq bo'ldilar.
Shunday qilib, 17-22 aprel kunlari Rio-de-Janeyro shahrida sport gimnastikasi, trampolin va badiiy gimnastika bo'yicha bo'lib o'tgan litsenzion musobaqalarda jami 9 nafar sportchimiz XXXI yozgi Olimpiada o'yinlariga yo'llanma oldilar.
Dastlab, sport gimnastikachimiz Anton Fokin “Rio-2016” o'yinlariga yo'llanmani qo'lga kiritgan bo'lsa, oradan bir kun o'tib Oksana Chusovitina faoliyatidagi ettinchi Olimpiada o'yinlariga yo'llanma oldi (bunday ko'rsatkichga dunyoda hech bir sport gimnastikachi erisha olmagan).
Shundan so'ng trampolin bo'yicha bo'lib o'tgan musobaqalarda terma jamoamiz etakchisi Ekaterina Xilko faoliyatidagi beshinchi Olimpiada o'yinlariga yo'llanma oldi (bunday ko'rsatkichga dunyoda hech bir trampolinchi erishmagan). Maqolaning to'liq qismi bilan O'zbekiston Milliy Olimpiya qo'mitasi rasmiy saytida tanishib olishingiz mumkin.
— deya xabar beradi uff.uz nashri.