Joriy mavsum «Lester»ning ajoyib o'yin namoyish qilayotgani va Angliya chempioni bo'lishga yaqin turgani xususida ko'p gapirildi. Bunda Jeymi Vardi, Riyod Mahrez va N~Golo Kante kabi futbolchilarning hissasi katta bo'layotgani haqida barcha bong urmoqda.
Ammo yana bir o'yinchi borki, uning ham xizmatlari beqiyosdir. Bu - jamoa sardori Ues Morgan. Yaqinda Daily Mail nashri ushbu futbolchi bilan suhbat uyushtirdi. Quyida ana shu intervyuni o'qiysiz.
- Kelgusi mavsum Chempionlar Ligasida ishtirok etasizlar. Hissiyotlar qanday?
- Bu ajoyib. Faoliyatimning asosiy qismini chempionshipda o'tkazganman. Premer-ligadagi dastlabki uchrashuvim o'tgan yili bo'lgandi. Avvalgi mavsumda quyi divizionga tushib ketishimizga oz qolgandi. Albatta, «Real» yoki «Barselona»ga qarshi o'ynash ajoyib. Ammo biz shundoq ham Evropaning eng kuchli klublaridan bo'lgan «Manchester Siti», «Chelsi», «Arsenal»larga qarshi o'ynayapmiz.
- Joriy mavsum ko'p narsaga erishdinglar. Faqat chempionlik sovrinini qo'lga kiritish qoldi, xolos...
- Ha, bu oxirgisi emas. «Sanderlend»ga qarshi uchrashuvda muxlislarimiz «chempionlar» degan sovrin ko'tarishdi. Lekin biz har qanday holatda ham hushyorlikni yo'qotmasligimiz kerak. Hali qiladigan ishlarimiz ko'p. To'g'ri, barchasi o'z qo'limizda. Ammo mavsum oxirida har narsa bo'lishi mumkin. Shunday ekan, oldindan bir nima deyish yaramaydi.
- Siz Medousda ulg'aygansiz. Bolaligingiz haqida gapirib bering.
- U paytlarda pul nimaligini bilmasdik. Faqatgina boriga xursand bo'lardik. Men onam va singlim bilan yashardim. Otamni kam ko'rardim. Maktabdagi baholarim ham yomon emasdi. Pulimiz etishmasdi, lekin baxtli edim. Onam biz uchun barchasini muhayyo qilardi. Buning uchun undan minnatdorman. Nottingemda Medous qanday joy ekanligini hamma yaxshi biladi. Bu juda xavfli tuman: narkotika, kriminal. Ayrim og'aynilarim shu yo'ldan ketishgan. Lekin mening xayolimda hamisha futbol bo'lgan. Biz mashina to'xtash joylarida, parklarda, umuman, imkoni bor joyda futbol o'ynardik. Bunday bolalik meni haqiqiy erkak qilib tarbiyaladi. Kelib chiqishimdan uyalmayman.
- O'shanda ham baland bo'yli bola bo'lganmisiz?
- Ha. Tabiatan gavdaliman. Shuning­dek, o'sha paytlarda har narsani eyaverardim.
- Kollejda boshqa sohaga o'qigansiz va futbolni tashlashga ham tayyor bo'lgansiz. Ammo 18 oydan so'ng «Nottingem Forest»ning ko'rigiga borgansiz. O'shanda nima o'zgargandi?
- Nimagadir erishish uchun yaxshi imkoniyat yuzaga keldi, deb o'ylaganman. Dyunkirkdagi do'stlarim skautlar e'tiborini qozonishim uchun yangi butsa olib bermoqchi bo'lishgan. Chunki eskisi yirtilib ketgandi. Onam bundan xijolat chekkan va yangi butsalar uchun otamdan pul olib bergan. Bir haftalik ko'rik avvaliga yarim oyga, keyin bir oyga cho'zilib ketgan. Shunday so'ng mavsum oxirigacha qolishim lozimligini aytishgan. Ularning menga aytgan birinchi gapi shunday bo'lgandi: «Ues, dastlab formangni joyiga keltirib olishing kerak». O'shanda 13 kg. ozishim lozim bo'lgan. Har kun yugurardim va parhez qilishga majbur edim. Aynan shu omil meni ko'p narsaga o'rgatdi. Esimda, faqat o'zim aylana bo'ylab yugurardim. Mendan kichiklar esa o'ynashardi.  «Lester» bilan shartnoma imzolaganimda ham biroz vazn yo'qotishim kerakligini aytishgan. Hozir bo'sh vaqtimni sport zalida o'tkazaman va optimal vaznimni ushlab turaman.
- «Nottingem Forest» safida 400dan ortiq o'yin o'tkazgansiz. Quyi divizionda qiyin vaqtlar ham bo'lgan. Shundan keyin APLdagi birinchi o'rin juda xursand qilsa kerak?
- Qaysidir ma'noda shunday. Qanchalik uzoqqa bora olganimni endi tushundim. Aynan o'sha qiyin kunlarda haqiqiy futbolchi bo'lib etishdim, deya olaman. Oldinlari APLda o'ynashni orzu ham qilolmasdim. «Lester»ga o'tishga rozilik berganimning sabablaridan biri - o'z kuchimni oliy divizionda sinab ko'rmoqchi bo'ldim. «Forest»da ko'p yillar o'ynadim. Ammo yangi shartnoma borasida kelisha olmadik. Chunki jamoaning moliyaviy muammolari bor edi. Ular transferim uchun 1 million funt sterling olishgan. Bu pul jamoaga juda zarur edi. Men esa APLda o'ynash imkoniga ega bo'ldim.
- «Lester» safida ancha o'sishga erishdingiz. Buni qanday uddaladingiz?
- To'g'risi, hozir bunga o'zim ham ishona olmayman. Nima bo'layotganini tushuntirib berish qiyin. Balki mavsum yakunlanganidan so'ng tahlil qilib ko'rarmiz. Lekin biz maqtovlarga mast bo'lmayapmiz. Aksincha, oldimizga qo'yilgan vazifani a'lo darajada uddalashga urinyapmiz. Nottingemdagi futbol maktablarining biri bilan aloqa qilib turaman. Yaqinda u erga borgandim. Bolalar va ularning ota-onalari mashinadan tushib, «Ues, siz bilan suratga tushsak bo'ladimi?» deyishdi. To'g'risi, oldinlari bunday holatlarga tushmaganman. Lekin bu men uchun qiyin emas. Odamlar uchun yoqimli. Shunchaki, bunga hali o'rganmaganman.
Davomi InterFUTBOL gazetasi blogida.
— deya xabar beradi uff.uz nashri.