JCh-2018 yo'llanmalari taqdiriga oydinlik kiritiladigan uchinchi saralash bosqichidagi eng asosiy raqiblarimizdan biri -  bu shubhasiz, Janubiy Koreya terma jamoasi. Zero, koreyslar milliy termasining bizga mudom katta muammolar tug'dirib kelgani barchaga ayon.
Ayni payt koreyalik futbolchilarga germaniyalik taniqli murabbiy - Uli Shtilike ustozlik qilmoqda. Bundan 18 oy ilgari ushbu mutaxassis terma jamoa boshqaruvini qo'lga olganida, mamlakat futbol federatsiyasi umumiy natijalardan unchalik qoniqmayotgandi. Hozirga kelib esa, koreyslar qit'ada avvalgi obro'larini to'la tiklab olishdi, hisob. Jamoaning eng muhim palla yaqinlashgan sari yuqori sport formasiga kirayotgani va natijalarning keskin yaxshilanganida tabiiyki, nemis mutaxassisining katta o'rni bor. Shu boismi, FIFA.com sayti ijodkorlari 12 aprel kuni Malayziyada JCh saralashi uchinchi bosqichiga qur'a tashlash marosimi oldidan Uli Shtilikedan maxsus intervyu olishdi.
- Jamoangiz JCh-2018 uchinchi saralash bosqichiga so'nggi 8ta o'yin­dagi 8ta g'alaba bilan etib keldi. Bu davrda shogirdlaringiz raqiblar darvozasini naq 27 marta ishg'ol qilish barobarida birorta gol qo'yib yuborishmadi. Xullas, hayratlanarli natija.
- Bilasizmi, biz erishilgan natijalarni qanday bo'lsa, shundayligicha qabul qilishga o'rganganmiz. Masalan, mehmonda Livan termasini 20 yildan buyon yutolmayotgandik. Bu gal safardan 3:0 hisobidagi ishonchli g'alaba  bilan qaytdik. Quvayt termasi esa har doim biz uchun noqulay raqib sifatida gavdalangan. Albatta, jamoamning ikkinchi saralash bosqichida o'z guruhi favoriti ekanligini bilardim. Lekin ochig'ini aytsam, hammasi bu qadar silliq kechishini xayolimga ham keltirmagandim.
- Nima deb o'ylaysiz, Janubiy Koreya termasi bo'lajak jahon chempionati final raundiga ham chiqa oladimi?
- Menimcha, 2015 yilni a'lo kayfiyat va ajoyib natijalar bilan o'tkazdik hamda mundial yo'lidagi hal qiluvchi saralash bosqichiga boshimizni tik tutgan holda etib keldik. Ayniqsa, so'nggi o'yinlar jamoamizning nimalarga qodirligini yaqqol ko'rsatib berdi. Umid qilamanki, Rossiyaga albatta, boramiz va u erda ham o'z so'zimizni ayta olamiz.
- Mana, Janubiy Koreya terma jamoasini 18 oydan buyon boshqarib kelmoqdasiz. O'tgan davrni tahlil qilib, qanday xulosalar bildirasiz?
- Lo'ndasini aytganda,  hammasi ajoyib. Ayni payt meni nafaqat natijalar, balki murabbiy rolidagi barcha vazifalarim to'la qoniqtirmoqda. Qolaversa, futbolchilar bilan munosabatim ham a'lo. To'g'ri, o'zaro muloqot vaqti hali-hamon tarjimon yordamidan foydalanyapman. Lekin muhimi shuki, bir-birimizni kutilganidan-da ortiqroq darajada tushunyapmiz.
- Qo'l ostingizdagi jamoa Shar-qiy Osiyo kubogida g'oliblikni tantana qildi, 2015 yilgi Osiyo chempionatida esa kumush medalni yutdi. Bu natijalardan nechog'li qanoat hosil qildingiz?
- To'g'risini aytsam, qit'a chempionati finalida avstraliyaliklarga qo'shimcha bo'limlarda yutqazganimiz biroz alam uyg'otdi. Chunki musobaqada faqat bitta maqsad - chempionlikni ko'zlagandik.
- Taxminingizcha, Janubiy Koreya termasi ayni hozirgi holatda Osiyo miqyosida qanchalik kuchli?
- Shu paytgacha qo'lga kiritilgan g'alabalarni hisobga olib aytsam, darajamiz Yaponiya termasiniki bilan teng, menimcha. Qisqasi, OFK miqyosidagi etakchilar - aynan biz va yaponlar. Zero, bu e'tirofga mos yutuqlarimiz bor. O'xshashlik tomonlarining yana biri shuki, har ikki  jamoa tarkibidagi ko'plab futbolchilar xorijda, aniqrog'i, Evropaning kuchli chempionatlarida to'p surishmoqda. Bu har qanday terma jamoa uchun foydadan xoli emas. Ayniqsa, mas'uliyati o'ta yuqori katta o'yinlarda legionerlar yordami juda asqotadi. Mahalliy chempionatdagi futbolchilar esa ko'p hollarda kuchli bosimga to'liq tayyor bo'lishmaydi. Shu o'rinda yana bir narsani ta'kidlashni istardim, o'tgan yili terma jamoaga nomzod sanalgan jami 45 nafar futbolchining o'yinini ko'rib, ularni atroflicha o'rgandik. Deylik, Osiyo chempionatida «K»-ligadagi iste'dodlardan ham unumli foydalandik. Qolaversa, mamlakat olimpiya terma jamoasi ham saralash bosqichlaridan muvaffaqiyatli o'tib, Rio-2016 Olimpiadasi yo'llanmasini qo'lga kiritdi. Olimpiyachilar safidagi  bir-ikki ajoyib futbolchini ko'z ostimga olib qo'yganman. Mavridi kelsa, ularni milliy jamoaga  jalb etaman, albatta.
- Biroq J.Koreya yoshlar termalari qayd etayotgan natijalar milliy jamoa yutuqlariga uncha mos tushmaydi. Boshqacha aytganda, yoshlarning harakatlari nisbatan sustroq...
- Ochig'ini aytsam, o'smirlar va yoshlar jamoalari futbolchilarining jismoniy tayyorgarliklari u qadar maqtovga loyiq emas. Xususan, koreyalik yoshlar bu borada Janubiy Amerika yoki afrikalik tengdoshlari bilan raqobat qilolmaydilar. Demak, mahalliy mutaxassislar avvalo, jismoniy jihatga e'tibor qaratishlari zarur.
- Bu noxush holatdan chiqib ketishning qo'shimcha yo'llari ham bordir.
- Ha, albatta. Masalan, mamlakatda yoshlar futbolga ertaroq qiziqishlari uchun milliy jamoa o'yini sifatini tobora yaxshilashga harakat qilyapmiz. Hammasi oddiy: bola futbolga qancha erta mehr qo'ysa, shuncha yaxshi. Deylik, jiddiy darajadagi mashg'ulotlarni vaqtida boshlaydi. Mashqlar qancha erta boshlansa, jismoniy faollik shuncha yaxshi rivojlanadi. Aslini olganda, milliy jamoa tarkibida o'ynayotgan barcha futbolchilar ham jismoniy tomondan mukammallikka ega emaslar. Lekin ular azbaroyi mamlakat sha'ni uchun shunchalik mehnat qilishadiki, buni ko'rib, hayron qolmay ilojing yo'q.
- Ixtiyoringizdagi futbolchilar butun dunyoga tarqalib ketishgan. Jumladan, terma jamoaga nomzod aksariyat o'yinchilar Germaniya, Angliya, Xitoy, S.Arabistoni va Qatarda faoliyat yuritishadi. Ularni talab darajasida  kuzatib borish, zarur payt bir joyga to'plash qiyinchilik tug'dirmaydimi?
- Ha, bu chindan ham dunyo bo'ylab sayohat uyushtirish bilan teng. Ba'zida futbolchilar terma jamoa ixtiyoriga 12 soatlik parvozdan so'ng etib kelishadi. Lekin eng muhimi, har bir shogirdim milliy jamoa chorlovini mamnun holda qabul qiladi va katta quvonch bilan keladi. Ular bir maqsad yo'lida birlashish qanchalik muhim ekanligini juda yaxshi tushunishadi. Buni men hattoki, kattakon bir oilaning to'planishiga qiyoslagan bo'lardim.
- Baribir, uzoq muddatli parvozlar yig'inni ko'ngildagidek tashkil etishga xalaqit beradi-ku, to'g'rimi? Shunday qisqa muddatda o'yin uslubini futbolchilar ongiga qanday singdirasiz?
- Chindan ham, terma jamoaning optimal tarkibi bilan shug'ullanish doimo muammo. Lekin hozircha bizga bir-ikkita umumiy mashg'ulot kifoya qilyapti. Albatta, bu gapim aytaylik, saralash doirasidagi ma'lum o'yinlarga tegishli. Katta turnirlar arafasida esa, ixtiyorimizda to'laqonli shug'ullanish uchun kamida ikki hafta vaqt bo'ladi. Ana shu muddatda o'z g'oyalarimni shogirdlarimga batafsil tushuntirish imkoniyatiga ega bo'laman.
- Umumiy  o'yin falsafangiz boshqalarnikidan nimasi bilan farqlanadi?
- Bilasizmi, qandaydir odatiy uslublar emas, ixtiyorimdagi futbolchilarning qobiliyatlari va imkoniyatlariga qarab, ish yuritishga moyilman. To'g'ri, ko'pincha       4-2-3-1 shaklidagi o'yin sxemasidan foydalanamiz. Lekin bu vaziyatlarga qarab, ba'zida 4-1-4-1 ko'rinishini oladi. Asosiysi, tanlanayotgan taktik echimlar hozirgacha men yoki terma jamoaga pand bermadi. Men uchun futbolchilarning o'z ishlaridan zavqlanishlari va qoniqishlari muhimroq. Jumladan, maydonga tushgan har bir yigit zimmasiga yuklatilgan vazifadan rohat olishi lozim. Shundagina kerakli natijaga umid bog'lash mumkin.
- Faoliyatingiz davomida ko'plar klublar va terma jamoalarda ishlagansiz. Ular orasida Janubiy Koreya termasining o'rni qanday?
- O'ylashimcha, bu jamoadagi davr hayotimning eng unutilmas lahzalari bo'lib qoladi. To'g'ri, Janubiy Koreyada jahon darajasidagi yulduzlar yo'q, hisobi. Lekin ulardagi g'alabaga ishtiyoq, o'yinga chanqoqlik va albatta, mehnatsevarlikni dunyoning boshqa nuqtalarida ko'rish mushkul. Shogirdlarim orasida «K»-liga vakillari ham bor va ular bilishadiki, terma jamoa - bu Evropaga yo'l ochish uchun o'ziga xos tramplin. Aynan shunday yondashuv ularni yanada faolroq bo'lishga undaydi.
- Mamlakatda futbolga nisbatan umumiy qiziqishni qanday baholash mumkin?
- Terma jamoa miqyosida olsak, nolishga o'rin qolmaydi - muxlislarimizga gap yo'q. Lekin «K»-liga xususida bunday deyolmayman. Mahalliy chempionatga qiziqish va muxlislar tashrifi bo'yicha Yaponiya yoki Xitoy ligalaridan biroz ortdamiz.
- Dunyoning ko'pgina mamlakatlarida ishlab ko'rdingiz. Balki endi o'z salohiyatingizni Germaniyada sinab ko'rish vaqti ham yaqinlashgandir...
- Amaldagi shartnomam 2018 yilgacha mo'ljallangan. O'shanda 64 yoshga to'laman. Oldin ham aytganman, nasib etsa, 70 yoshgacha ishlayman, keyin murabbiylik kursisi bilan xayrlashaman. Ungacha nimalar ro'y berishini vaqt ko'rsatadi.
Davomi InterFUTBOL gazetasi blogida.
— deya xabar beradi uff.uz nashri.