1news.uz — 24 aprel kuni ertalabdan poytaxtimizdagi “O'zbekiston” sport majmuasida og'ir atletika bo'yicha Osiyo chempionati bahslari boshlanib ketdi. Dastlab 48 kg (ayollar) va 56 (erkaklar) vazn toifalari “V” guruhi ishtirokchilari supachada o'z mahoratlarini sinovdan o'tkazishdi. Musobaqaning tantanali ochilish marosimi esa tushdan keyin, 15.00da boshlandi. Dastlab musiqa sadolari ostida qit'a vakillari maydonga chiqib kelishdi.
Mamlakatimizda sportni rivojlantirish bo'yicha keng ko'lamli ishlar qilinmoqda. Yurtimizda bir necha bor xalqaro musobaqalar o'tkazilgan. Olimpiya zaxiralari kollejlarida etuk sportchilar tayyorlash ishlari yaxshi yo'lga qo'yilgan, uch bosqichli sport tizimi o'yinlarida iste'dodli sportchilarni saralab olish bo'yicha ijobiy tizim shakllangan. Bunday ijobiy holatlar bevosita og'ir atletikaga ham tegishli. Mazkur Osiyo chempionatini Toshkentda o'tkazilayotganligi ham bevosita shu jarayon bilan bog'liq deyish mumkin.
Ochilish marosimida Xalqaro og'ir atletika federatsiyasi prezidenti Tamash Ayan, Osiyo og'ir atletika federatsiyasi bosh kotibi Muhammad Hasan Jolud, O'zbekiston Respublikasi Bosh vaziri o'rinbosari, mamlakat og'ir atletika federatsiyasi raisi Botir Irkinovich Zokirov so'zga chiqdilar.
– Mamlakatingiz xalqaro sport musobaqalarini tashkil etish bo'yicha o'ziga xos tajribaga ega, – deydi Tamash Ayan. – Buning misoli sifatida 2013 yilgi yoshlar o'rtasidagi jahon chempionatini aytishim mumkin. O'sha musobaqa o'smirlar Olimpiya o'yinlariga yo'llanmalar bergan edi. Bu galgi Osiyo chempionati ham Rio-de-Janeyro Olimpiadasiga yo'llanma berishi bilan ham ahamiyatlidir. Ushbu turnirni yuqori saviyada tashkil qilishda bosh-qosh bo'lgani uchun O'zbekiston hukumatiga o'z minnatdorchiligimni bildiraman.
– Davlatimiz rahbari tomonidan O'zbekistonda barcha sport turlari qatori og'ir atletikani rivojlantirish bo'yicha keng ko'lamli ishlar amalga oshirilmoqda, – deydi O'zbekiston OAF raisi B.Zokirov. – Izchil amalga oshirilayotgan ishlar natijasida sportchilarimiz xalqaro musobaqalarda o'zlariga bildirilgan ishonchni oqlab kelishmoqda. O'ylaymanki, ushbu Osiyo chempionati ham ishtirokchilar qalbida uzoq vaqt yodda qoladigan xotiralarga boy bo'ladi. Osiyo chempionatiga tashrif buyurgan barcha jamoalarga omad tilagan holda, musobaqa ishtirokchilariga omad tilayman!
Shundan so'ng, sahnalashtirilgan musiqiy chiqishlar ochilish marosimiga yanada fayz qo'shdi.
Musobaqa yakunlariga ko'ra, Xalqaro og'ir atletika federatsiyasi tomonidan erkaklar uchun 7ta, ayollar uchun 6ta Olimpiada yo'llanmasi eng munosib jamoalarga taqsimlab beriladi. Shu bilan birga 15 to'plam (odatdagidek, erkaklar 8ta, ayollar esa 7 ta  vazn toifasi bo'yicha kuch sinashadilar) – jami 45ta medal eng kuchli sportchilarga taqdim etiladi. Bu yilgi qit'a chempionatiga 32 davlatdan 300 nafarga yaqin sportchi tashrif buyurgan.
Toshkentda o'tayotgan Osiyo chempionatining tantanali ochilish marosimidan so'ng supachaga 48 kg vazn toifasi “A” guruhi ishtirokchilari chiqib kelishdi. Ushbu vaznda jami 17 nafar sportchi qiz ro'yxatga olingan edi. Ular orasida London Olimpiadasi bronza medali sovrindori, KXDR vakili Ryang Chun Xva, 2013 yil Vrotslavda bo'lib o'tgan jahon chempionati g'olibi Tan Yayun kabi bir qator nomdor atletlar bor edi. Bundan tashqari Osiyo chempionatining bir necha g'olib va sovrindorlari ham kuchli guruhdan o'rin olishgandi. Mana shu jihatlarning o'ziyoq bu galgi qit'a musobaqasi saviyasi haqida tasavvur berishi aniq.
Kutilganidek, medallarga da'vogarlar soni ko'pchilik edi va bahslar ham shunga yarasha shiddatli ko'rinish oldi. Masalan, dast ko'tarish mashqida 1-9-o'rinlarni egallagan atletlar ko'rsatgan natijalar orasidagi farq atigi 7 kgni tashkil qildi. G'oliblik uchun asosiy kurash esa Xitoy, Vetnam va Xitoy Taypeyi sportchilari o'rtasida kechdi. Chinlik Tan Yayun barcha urinishlarni muvaffaqiyatli yakunladi, so'nggi buyurtmaga ko'ra, 88 kg li toshni o'ziga bo'ysindirdi.
Ikkinchi o'rin xitoylik raqibidan bir kilogramm farq bilan bahslarni yakunlagan vetnamlik Ti Xuen Vuongga nasib etdi – 87 kg. Bronza medal egasi Xitoy Taypeyi vakili Vey-Ling Chen 85 kg bilan dast ko'tarishni yakunladi.
Siltab ko'tarishda Yayun birinchi urinishda 110 kg toshni ko'tarishga muvaffaq bo'ldi, ammo keyingi urinishlari zoe ketib, 113 kglik buyurtmani amalga oshirolmadi. Uning natijasi bor-yo'g'i bronza medal uchun etarli bo'ldi. Shunday bo'lsa-da, u ikkikurashda baribir yuqori natija qayd etdi va Osiyo chempioni deb e'lon qilindi – 198 kg.
Ikkinchi mashq bo'yicha eng yuqori ko'rsatkichni Ryang Chun Xva qayd etdi – 111 kg. Ikkikurash natijasiga ko'ra 196 kg jamg'argan Olimpiya o'yinlari sovrindori bu safar qit'a chempioantida kumush medalga loyiq topildi.
Siltab ko'tarishda ikkinchi o'rinni egallagan Tailand vakilasi Panida Xamsri (110 kg) ikkikurashdagi 194 kg lik natijasi bilan umumiy hisobda shohsupaning uchinchi pog'onasiga ko'tarildi.
Davomi 1News.Uz blogida.
— deya xabar beradi uff.uz nashri.