"Paxtakor" – "Metallurg" o'yinidan keyingi matbuot anjumanida har ikki jamoa vakillari o'yin haqida fikrlarini bildirib o'tishdi.

Grigoriy KOLOSOVSKIY ("Paxtakor" murabbiyi): - O'yin har ikkala jamoa uchun qiyin kechdi. Zich taqvim bizning o'yinimizga o'z ta'sirini ko'rsatmoqda. Bugungi g'alaba juda katta mehnat evaziga qo'lga kiritildi. Shu bilan birga "Paxtakor" haqli g'alabani qo'lga kiritdi. Kamoliddin Tojiev "Bunyodkor"ga qarshi o'yinni o'tkazib yuboradi. Bu jamoamiz uchun yo'qotish, ammo futbolda almashtirib bo'lmas futbolchilar bo'lmaydi. Uning o'rnini to'ldirishga harakat qilamiz. Bugungi g'alabada Tojievning xizmati juda katta bo'ldi. Masharipovning zaxirada qoldirilgani zich taqvim bilan bog'liq. Unda jarohat yo'q edi.

Shavkat SAIDOV ("Metallurg" jamoasi boshlig'i): - Birinchi bo'limda himoyada tartibli o'ynadik. Hujumda esa texnik xatolarga yo'l qo'ydik. Dastlabki 45 daqiqa ichida golli vaziyatlar yarata olmadik. Tanaffusdan so'ng hujumda tezkorlik paydo bo'ldi. Himoyada esa ikki vaziyatda Sergeev va Karimovni bo'sh qoldirdik, bu bizga pand berdi. H Shu bois bugun uch ochkoni qo'ldan boy berdik. "Paxtakor" jamoasining bir nechta o'yinlarini kuzatgandik. Sergeev, Masharipov, Karimov singari futbolchilarni qanchalik xavfli ekanligini bilardik. Ammo Karimovning goli vaqtida himoyachimiz o'z futbolchisini yopishga kech qoldi.
— deya xabar beradi uff.uz nashri.