Bu futbolchilar bo'lmaganida, Angliya, Uels hamda Shimoliy Irlandiya termalari Evropa chempionati yo'llanmasini qo'lga kiritolmasliklari ham hech gap emasdi. Mazkur beshlik Britaniya imperiyasi ordeniga chindanda loyiq ekanliklarini yana bir karra isbotladilar.
Josh Majennis  (Shimoliy Irlandiya)
Britaniyalik mahoratli darvozabon. Reaktsiyasi yomon emas, sakrash borasida yaxshi ko'rsatkichga ega, to'pga chiqishda sifatga e'tibor qaratadi. Aynan Majennis 19 yoshida «Liverpul»ga qarshi o'yin «zayavka»siga kiritilgan!
Afsuski, Joshning kiperlik salohiyati vaqtida qadrlanmadi. «Kardiff Siti»da o'ynayotgan kezlari muvaffaqiyatsizlik girdobida qolib ketdi. «Dastlabki bir necha kun mobaynida ichkilikka ruju qo'ydim. Go'yoki, men uchun hayot to'xtab qolgandek edi. Keyinchalik esa maydonda boshqa amplualar ham borligini angladim», - degandi o'shanda futbolchi. Hammasi oddiy. Majennis dastlab himoya, keyinchalik markaz, so'ngra esa hujum chizig'ida o'zini sinab ko'rdi...
Nihoyat, Josh sof forvard sifatida ko'rinish bera boshladi. O'tgan mavsum «Kilmarnok»ning eng yaxshi to'purariga aylangan futbolchi terma jamoasining Gretsiyaga qarshi bahsida hal qiluvchi gol muallifiga aylandi. Natijada mazkur g'alaba Shimoliy Irlandiyani rasman Evropa chempionatiga olib chiqdi.
Garet Beyl (Uels)
Beyl chindan ham superyulduzmi? «Real» uni 100 mln. evroga sotib olib to'g'ri yo'l tutdimi? Axir bu pulga o'nlab o'yinchilarni xarid qilishi mumkin edi-ku! Bu borada har qancha tortishsa bo'ladi. Shunisi ayonki, ushbu futbolchi Uels termasi safida yuqori darajadagi o'yinni namoyish qilmoqda. Bu isbot talab qilmas haqiqat.
Beyl etakchilikni o'z zimmasiga olishga ko'nikkan. «Tottenxem»da o'ynagan kezlari aynan shu rolda APLning har qanday himoyasini yorib o'tgan. «Eng yaxshilardan biri» emas, «yaqqol etakchi» bo'lgan kezlari u maydonda mo''jiza yarata oladi.
Bu galgi saralash bahslarida Beyl 6ta gol urdi, aynan shu natija Uelsni Evro-2016ga olib chiqdi. E'tiborlisi, uning termadagi hech bir jamoadoshi ikkitadan ortiq to'p kiritmagan. Beyl bor ekan, boshqalarga ish qolarmidi?
«Bizning termamizda buyuk futbolchi o'ynaydi. Shunchaki o'ynamaydi, balki Uels uchun jonini berishga tayyor. Shunday ekan, bizning qit'a chempionati yo'llanmasini qo'lga kiritishimiz hech kimni ajablantirmasligi kerak. Ha, Garet bilan Evropa chempionatida ham g'alaba qozonish mumkin», - jamoa bosh murabbiyi Kris Koulmenning optimistik ruhdagi ushbu fikrlariga qo'shilmay iloj yo'q.
Ueyn Runi (Angliya)
Tanishtirish shart bo'lmagan yana bir futbolchi. Runining darajasi borasida ham turli qarashlar mavjud. Mazkur masalada futbolga aloqador shaxslardan biri - Jon Terrining gaplariga quloq tutsak:
«Ueyn bilan o'ynash rohat bag'ishlaydi. Menimcha, u Angliya terma jamoasi tarixidagi eng yaxshi futbolchi. Runi to'p bilan shunday harakatlarni amalga oshiradiki, bunaqasini avvallari ko'rmaganman. Unda g'oliblik ruhiyati va etakchilik salohiyati mujassam. Angliya termasi - hayotining mazmuni. Milliy jamoaga aynan shunday sardorlar kerak».
2015 yilning 8 sentyabr kuni «Uembli» stadioni suxandonining xabaridan so'ng muxlislar olqishi yanada kuchaydi: «Hozirgina tarixga guvoh bo'ldingiz...» Chindan ham, Shveytsariyaga qarshi bahsda penaltidan to'p kiritgan Runi terma jamoa safidagi 50-golini nishonlab, bu borada Bobbi Charlton (49ta gol)ni ortda qoldirdi.
Ueyn saralash bosqichining 8ta o'yinidagi golQpas ko'rsatkichlari bo'yicha 8 ochko to'pladi. U raqib darvozasini 7 marta ishg'ol qilgan bo'lsa, shulardan to'rttasi penaltidan amalga oshirilgan. Gap statistika yoki rekordlarda emas - e'tiborlisi, Runi bunga qadar Angliya termasida etakchi sanalmasdi. Avlodlar almashinuvi jarayoni qiyin kechmoqda, ammo vaziyatni o'nglashda har qaysi karvon tajribali sarbonga ehtiyoj sezadi.
Aynan bu galgi saralash bahslarida Ueyn Runi yosh jamoadoshlarini o'z ortidan ergashtirishni uddaladi. Angliya termasining ushbu hujumchi bilan 9ta bahsda 100 foizlik natija qayd etishi ko'p narsadan dalolat.
Stiven Devis (Shimoliy Irlandiya)
Ayrim futbolchilar ko'pincha e'tibordan chetda qolishadi. Har holda, moda jurnallari muqovasida ularning suratlariga joy ajratilmaydi, internet saytlarida ular ishtirokidagi videoroliklar tarqalmaydi, jurnalistlar esa uzoq muddat davomida ular bilan suhbat uyushtirmaydilar. Bunday o'yinchilar shunchaki shartnoma shartlarini bajarishadi, xolos. Jimgina, hech kimga sezdirmay, ammo foydali tarzda.
Stiven Devis aynan shu toifa futbolchilardan. Hozirgacha uning mahoratiga etarlicha baho berilmagan, faoliyati davomida grand klubda o'ynamagan, yuqori natijalarni qo'lga kiritmagan. Ammo Devis har qaysi jamoaning markazdagi o'yinini kuchaytira oladi. Stiven raqib hujumini buzadi, maydonda astoydil ter to'kadi, zargarona to'p uzatmalarini bajaradi, har qanday nuqtadan gol urishga tayyor turadi. Devis muntazam ravishda Ronald Kuman bosh murabbiyligidagi yorqin futbolchilarga boy «Sautgempton»ning asosiy tarkibida maydonga tushadi.
Shimoliy Irlandiyada ham shunday holat. Stiven bir gal shunday degandi: «Rossiya bilan taqqoslaganda, biz mayda baliqchamiz». Bu - Devis, bu - Shimoliy Irlandiya. Minimum takabburlik, maksimum mehnatkashlik.
Ha, Kayl Laferti mazkur saralash bosqichida 7ta goldan iborat kollektsiya to'pladi. Devis atigi ikkita to'p bilan cheklandi, ammo aynan Stiven -Britaniya jamoasining yuragiga aylangan. Usiz Shimoliy Irlandiya boshqacha ko'rinish olishi muqarrar.
Davomi InterFUTBOL gazetasi blogida.
— deya xabar beradi uff.uz nashri.