«Sautgempton» klubi va Irlandiya terma jamoasi hujumchisi Sheyn Long joriy mavsum kashfiyotlaridan biriga aylandi. U xususan, 2015 yilning 8 oktyabr kuni Germaniya termasiga qarshi kechgan o'yinning chinakam qahramoni bo'ldi.
Aniqroq aytsak, APL bahslarida tobora yorqinroq nur sochayotgan hujumchining Manuel Noyer darvozasiga urgan yagona goli irlandlarga «sensatsion» g'alabani taqdim etdi va kamtarin jamoa yakunda Evro-2016 yo'llanmasini rasmiylashtirdi. Tabiiyki, Long hozirda bo'lajak qit'a birinchiligi startini sabrsizlik bilan kutyapti. Futbolchi Britaniyaning The Guardian nashri jurnalistlari bilan suhbatlashish chog'i irlandlar Frantsiyada ham shov-shuvli yurishlarini davom ettirishga bel bog'lashganini yashirib o'tirmadi.
2015 yil 8 oktyabr. O'sha kuni Sheyn Long Germaniya termasi darvozasini ishg'ol qildi va bu yagona gol irlandlarga g'alaba keltirdi. U o'sha uchrashuvdan keyingi voqealarni quyidagicha eslaydi: «Nemislarga qarshi o'yin ko'p kuch oldi. Final hushtagi yangragach, jurnalist­larning bir necha savollariga qisqa-qisqa javob berdimda doping-test nazoratiga yo'l oldim. Jarayon yakunlagani bilan kiyinish xonasiga shoshildim, biroq bu vaqtda hamma ketishga ulgurgan ekan. Shunday qilib, jamoamiz joylashgan mehmonxonaga eng oxirida etib bordim va darhol uyquga ketdim. Qisqasi, u erda hech kim bilan ko'rishmadim. Ertasiga esa delegatsiyamiz Polsha safariga chiqdi. Nima bo'lishidan qat'iy nazar, o'sha oqshomni sira unutmayman - sehrli lahzalar. Afsuski, Polshada bizga g'alaba qozonish nasib etmadi. Agar u erda ham 3 ochko olganimizda edi, bu butun Irlandiya futboli uchun ideal hafta bo'lardi».
   Xo'sh, hammasi qanday ro'y bergandi? Kamtarin jamoa dahshatli bundestimni nimaning hisobiga engdi? Sheyn Longning tan olishicha, u buni tushuntirib berishga ojiz: «Ochiq aytaman, o'shanda ro'y bergan voqealarni anglolmay qolgandim. Boshqacha ifoda etganda, maydondagi ishlarni tushungunimcha o'yin yakuniga etdi. Faqat, oradan bir necha hafta o'tgach, barchasini yaxshilab miyamga singdirishga urinib ko'rdim. Ammo baribir, yutug'imiz mohiyatini aqlimga sig'dirolmadim. Albatta, Germaniya termasini mag'lub etganimizni hech qachon esdan chiqarmayman. Lekin bu faoliyatimdagi yagona mo''jizakor lahza emas. Misol uchun, termadagi debyut golimni mashhur «Uembli»da Angliya milliy jamoasi darvozasiga yo'llaganman - unutilmas voqea. O'shanda golni hattoki, qanday nishonlashni bilolmay, esankirab qolganim esimda. Shunchaki, baxtiyorlikdan ettinchi osmonda uchgandim, go'yo».
Long Frantsiyada o'tadigan bo'lajak Evropa chempionatida ikkinchi imkoniyatga ega bo'ladi - uning Irlandiya termasi tarkibidan joy olish ehtimoli katta. Hujumchiga birinchi chinakam imkoniyatni 4 yil oldin italiyalik mutaxassis Jovanni Trapattoni taqdim etgandi. Biroq Irlandiya termasi Ukraina va Polsha maydonlarida o'tgan chempionatning guruh bosqichida hech qanday karomat ko'rsatolmagandi - 3ta mag'lubiyat. Long esa Italiya va Xorvatiya termalariga qarshi bahslarda zaxiradan maydonga tushish bilan cheklangandi.
Mana, oradan shuncha vaqt o'tdi va irland futboli faxri Robbi Kin tobora faxriylikni tan olmoqda. Shunday ekan, Frantsiya-2016 guruh raundida  Belgiya, Shvetsiya va Italiya termalari bilan o'ynaydigan irlandlar o'tkir hujumchi rolini aynan «Sautgempton» vakiliga ishonib topshirsalar, ajabmas. «4 yil oldin Polshada ko'proq o'ynashni xohlaganim tushunarli. Biroq maydonda atigi 10-15 daqiqa harakatlandim, xolos. Ammo qit'a birinchiligiga borganimning o'zi yoqimli edi, —deydi Long. — Oxirgi saralash bosqichi davomida esa jamoaga kerak ekanligimni yaqqol his qildim. Chunonchi, etarli o'yinlarda maydonga tushib, bir nechta gol muallifiga aylandim. Umid qilamanki, termamizga hali ko'p yordam bera olaman. Evro-2016dagi birinchi vazifamiz - guruhdan chiqish. Davomini keyin ko'ramiz».
Davomi InterFUTBOL gazetasi blogida.
— deya xabar beradi uff.uz nashri.