Joriy yilning 5-21 avgust kunlari Braziliyaning Rio-de-Janeyro shahrida o'tkaziladigan XXXI yozgi Olimpiada o'yinlarining boshlanishiga roppa-rosa 100 kun qoldi.
Ma'lumki, 21 aprel kuni qadim Olimpiyada XXXI yozgi Olimpiada o'yinlari mash'alasining yoqilishiga bag'ishlangan marosim o'tkazildi. Shundan so'ng, Olimpiya mash'alasi olti kun davomida Gretsiya bo'ylab olib o'tildi va bugun, 27 aprel kuni mash'ala “Rio-2016” tashkiliy qo'mitasi delegatsiyasiga beriladi. Braziliya bo'ylab mash'alani olib o'tish estafetasi 3 maydan boshlanadi va 5 avgust kuni Rio-de-Janeyro shahrida Olimpiada o'yinlarining tantanali ochilish marosimida nihoyasiga etadi.
Bugungi kunga kelib Olimpiada o'yinlari o'tkaziladigan sport saroylari hamda sport delegatsiyalari istiqomat qiladigan shaharchada tayyorgarlik ishlari qizg'in olib borilyapti.
XXXI yozgi Olimpiada o'yinlarida 206 davlatdan 10500 nafar sportchini ishtirok etishi kutilmoqda. Ular Olimpiada o'yinlari dasturiga kiritilgan sportning 28 turida sovrinli o'rinlar uchun kurash olib boradilar.
Bugungi kunga kelib XXXI yozgi Olimpiada o'yinlarida qatnashish xuquqini beruvchi yo'llanmalarni 51 nafar sportchimiz qo'lga kiritgan. Bundan tashqari 7-18 sentyabr kunlari Rio-de-Janeyro shahrida o'tkaziladigan XV yozgi Paralimpiya o'yinlariga 25 nafar sportchimiz yo'llanmalarni naqd qilib qo'yishgan.
Oldinda har ikki eng yirik sport anjumanlariga litsenziyalar o'ynaladigan qator musobaqalar mavjud va umid qilamizki “Rio-2016” o'yinlariga yo'l oladigan delegatsiyamiz a'zolarining safi yanada kengayadi. Bu yo'lda hamyurtlarimizga omad va zafarlar tilab qolamiz.
Shavkat Jalilov
O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.