Yaxshi murabbiy va juda yaxshi murabbiy o'rtasidagi farq qanday bo'lishini bilasizmi? Bilmasangiz, «Barselona» va «Real» o'rtasida kechgan «klasiko» bahsiga boqing. Yo'q, bu o'rinda gap Luis Enrike yoki Zayniddin Zidan haqida ketmayapti. Aytish lozim, ularning ikkisi ham juda yaxshi murabbiy hisoblanishadi. Bizning muqoyasamiz Benites va Anchelottiga ataladi. Ispaniya chempionatiga mutlaqo aloqasi qolmagan bu murabbiylarni qanday qilib «klasiko» bilan bog'lash mumkin? Bu savol javobini quyidagi mulohazadan olasiz.
Yaxshi murabbiy uchun taktik ishlanmalar, tajriba va mahorat katta ahamiyatga ega. Juda yaxshi murabbiy esa futbolchilar bilan til topishishni ham uddalashi lozim. Yulduzlarga to'lib toshgan grand klublarni boshqarish uchun shunchaki yaxshi murabbiy bo'lish kifoya emas. Buning uchun juda yaxshi murabbiy bo'lish kerak. Masalan, Karlo Anchelotti hech qachon o'rtamiyona jamoalarda ishlamaydi. Unga «Nyukasl» yoki «Valensiya»dan taklif tushsa, shirinsuxanlik bilan rad etadi. Chunki biroz kutsa, albatta, «Bavariya»ga o'xshash superklubga chorlashlariga ishonadi. Rafael Benites esa «Nyukasl»ni ham boshqarib ketaveradi. Chunki uning qismatiga o'rtamiyona klublar bilan ishlash yozilgan. «Real»ga chaqirilgani esa - shunchaki, Florentino Peresning futbolni tushunmasligiga yana bir dalil, xolos.
Anchelotti «Real»ni boshqargan vaqt davomida Ispaniya chempionati doirasida «Barselona» bilan to'rt marta to'qnash keldi. Ushbu to'qnashuvlardan faqat bittasida g'alabaga erishdi, qolgan uchtasini esa boy berdi. Ammo hatto mag'lubiyatga uchragan o'yinlarida ham haqiqiy jang bo'lgan edi.
Rafael Benites bilan esa unday bo'lmadi. U faqat bir marta «Barselona»ga qarshi o'yin o'tkazdi va... 0:4 hisobida mag'lubiyatga uchradi. Xo'sh, bunga sabab nimada? Murabbiyning uquvi pastmi? Yoki taktik ishlanmalar noto'g'ri olib borilganmi? Aslo. Benites aynan shu masalada juda kuchli murabbiy hisoblanadi. Ishonmaganlar «Napoli»da olib borgan ishiga boqsinlar. Ammo uning katta bir nuqsoni bor edi - futbolchilar bilan yaxshi munosabat o'rnata olmasdi. «Napoli» va «Nyukasl»da buning ahamiyati katta bo'lmasligi mumkin. Chunki o'rtamiyona klublarda futbolchilarni boshqarish osonroq. Ammo «Real»dek klubda yulduzlarga gap uqtirish mushkul.
Bu gapimizni so'nggi «el-klasiko» ham isbotlaydi. O'z maydonida kechgan bahsni yirik hisobda boy bergan madridliklar bu safar ovga chiqqan sher misol jang qildilar va kimsan «Barselona»ni «Kamp Nou»da mag'lub etdilar. Vaholanki, maydonda bir kishi kam bo'lib qolgandilar. Xo'sh, bu yutuq nimaning evaziga qo'lga kiritildi? Chunki bu safar «Real»ni Benites emas, Zidan boshqargan edi. Frantsiyalik murabbiyning bir ustun jihati bor: uni futbolchilar juda hurmat qiladilar. Zizu uchun maydonning har bir qarichini tirnab chiqishga tayyorlar.
Bular - «klasiko» va murabbiylar haqida bildirgan fikrimiz edi. Endi gapni o'zbek futboli tomon bursak. «Real» va «Barselona» jahon futboli uchun qanday ahamiyat kasb etsa, o'zbek futbolining toji - terma jamoa hisoblanadi. Uni boshqarishni hamma murabbiy ham eplayvermaydi. Bosh jamoada faqat eng yaxshilar ish olib borishlari lozim. O'zbek futboli darajasida, albatta.
Shu tomonlama olib qaralsa, termani hozirga qadar eng yaxshi murabbiylar boshqarganini aytish mumkin. Yaxshi bilamiz, avvalgi saralashda termamiz JCh-2014 ostonasidan qaytib ketdi. Ko'pchilik bu omadsizlikni so'nggi turlarda Janubiy Koreya va Qatarga qarshi kechgan o'yinlar bilan bog'ladi. Aks holda, jahon chempionatiga chiqardik.
O'zimga qolsa, O'zbekiston milliy termasi JCh yo'llanmasini ancha ilgari - guruhning ikkinchi turida, Livanga qarshi safarda kechgan uchrashuvda boy berib ulgurgan edi, degan bo'lardim. O'sha o'yinda 1:1 hisobi qayd etilgani hammaning yodida. Aslida esa, Livanni 2:0, 3:0 va hattoki, 4:0 hisobida mag'lub etish ham mumkin edi. Agar futbolchilar yuzaga kelgan ko'plab imkoniyatlarning jilla qursa, yarmidan foydalanganlarida yana qo'shimcha ikki ochko cho'ntagimizda bo'lardi. Mundialga chiqish uchun Koreyada boy berilgan uch ochko va yoki Qatarga urilmay qolgan bitta gol emas, aynan o'sha - Livan maydonlariga tashlab kelingan ikki ochko etmay qolgan edi, deb hisoblayman.
Davomi InterFUTBOL gazetasi blogida.
— deya xabar beradi uff.uz nashri.