Poytaxtimizda armrestling bo'yicha o'tkazilayotgan Osiyo chempionatida bevosita ishtirok etish maqsadida yurtimizga tashrif buyurgan Butunjahon armrestling federatsiyasi prezidenti Assen Xajitodorov hamda Osiyo armrestling federatsiyasi rahbari Jeenbek Mukambetov bugun kunning ikkinchi yarmida O'zbekiston Milliy olimpiya qo'mitasida bo'ldilar.
Mehmonlar dastlab Milliy olimpiya qo'mitasining muzeyini ko'zdan kechirdilar. Muzeydan joy olgan eksponatlar, kubok va medallar, Olimpiada o'yinlarida g'oliblik shohsupasiga ko'tarilgan sportchilarimiz fotosuratlari ularda katta qiziqish uyg'otdi.
Shundan so'ng, Butunjahon armrestling federatsiyasi prezidenti Assen Xajitodorov hamda Osiyo armrestling federatsiyasi rahbari Jeenbek Mukambetov O'zbekiston Milliy olimpiya qo'mitasi Bosh kotibi Oybek Kasimov bilan muzokara o'tkazdilar. Suhbat chog'ida mehmonlar sportning armrestling turini Paralimpiya o'yinlari, shuningdek, Osiyo o'yinlari va 2017 yili Ashxabod shahri (Turkmaniston)da bo'lib o'tadigan yopiq inshoatlardagi Osiyo o'yinlari dasturiga kiritish borasida olib borilayotgan sa'y-harakatlar haqida atroflicha so'z yuritdilar.
“Armrestling O'zbekistonda ham yildan-yilga ommalashib, xalqaro maydonlarda yuksak natijalarni qo'lga kiritayotgan yurtdoshlaringiz safi tobora ortib bormoqda, - dedi Jeenbek Mukambeotov. O'zbekiston terma jamoasi bugungi kunda Osiyoda etakchilardan biri hisoblanadi. Osiyo chempionatini to'rtinchi marotaba Toshkent shahrida o'tkazilayotgani ham bejiz emas. Fursatdan foydalanib, bu yilgi Osiyo chempionatini ham yuksak saviyada tashkil etilgani uchun barcha tashkilotchilarga o'z minnatdorchiligimni bildirmoqchiman. Shuni ishonch bilan ayta olamanki, serquyosh diyoringizda tashkil etilgan mazkur qit'a chempionati ham uning ishtirokchilari hayotida bir umrga yorqin sahifa bo'lib muxrlanadi”.
O'z navbatida O'zbekiston Milliy olimpiya qo'mitasining Bosh kotibi Oybek Kasimov mamlakatimizda sog'lom turmush tarzini qaror toptirish hamda kelajagimiz egalarini har tomonlama barkamol qilib voyaga etkazish Istiqlolning dastlabki yillaridanoq Davlatimiz siyosatining ustuvor vazifalaridan biri qilib belgilanganligini, o'tgan davr mobaynida bolalar hamda xotin-qizlar sportini rivojlantirish, sport infratuzilmasini yanada mustahkamlash, O'zbekistonda olimpiya harakatini rivojlantirish borasida Davlatimiz va xukumatimiz tomonidan qaratilayotgan alohida e'tibor haqida to'xtalib, bu ham o'z navbatida xalqaro maydonlarda qo'lga kiritilayotgan muvaffaqiyatlarimiz salmog'ini yil sayin yuksalib borayotganligida asosiy omil bo'layotganligini mamnuniyat bilan ta'kidlab o'tdi.
Tashrif so'ngida mehmonlarga esdalik sovg'alari topshirildi.
Ma'lumot uchun. Poytaxtimizda armrestling bo'yicha o'smirlar, yoshlar, kattalar, xotin-qizlar, faxriylar va jismoniy imkoniyati cheklangan sportchilar o'rtasida o'tkazilayotgan XV Osiyo ochiq chempionatida O'zbekiston, Yaponiya, Janubiy Koreya, Iroq, Indoneziya, Hindiston, Pokiston, Quvayt, Malayziya, Mo'g'uliston, Turkmaniston, Qozog'iston, Qirg'iziston, Tojikiston vakillari g'oliblik uchun kurash olib borishyapti.
Mazkur qit'a chempionatida Umidjon Ahmedov, Bobur Bekchonov, Islom Bahromov, Sardor Xudoyberdiev, Sirojiddin Kunishov, Humoyun Toshmuhamedov, Husniddin Mehmonov, Maftuna Davlatova kabi etakchi armrestlingchilarimiz bilan birga yosh iqtidorli sportchilarimiz Vatanimiz sharafini himoya qilmoqda. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.