Oliy liganing 5-turidan o'rin olgan «Buxoro»-«Andijon» uchrashuvida maydon egalari yirik - 5:2 hisobida zafar quchib, mag'lubiyatsiz seriyani davom ettirishdi. Aksincha, andijonliklar mavsumdagi to'rtinchi mag'lubiyatlarini tan oldilar. Baxtiyor Ashurmatov jamoasi hisobida hozircha bitta g'alaba bor, xolos. Biz Buxorodagi o'yindan so'ng o'z darvozasidan 5ta to'p olib chiqqan «Andijon» darvozaboni Akmal Tursunboevdan intervyu oldik.
- Akmal, yirik hisobdagi mag'lubiyatning sabablari nimada?
- Birinchi galda bunga o'zimiz sababchimiz. O'z kuchimizga ishonmadik. Imkoniyatlardan maksimal darajada foydalana olmadik. Nima ham derdik, futbolda hamma narsa bo'lishi mumkin. Qanday natija qayd etilishini oldindan aytish qiyin. Eng muhimi, har bir futbolchi Buxorodagi o'yinni tezroq unutishi shart. Aks holda, bu keyingi uchrashuvlarda bizga salbiy ta'sir qilishi mumkin. Xatolardan to'g'ri xulosa chiqarib olish kerak.
- Beshta gol o'tkazib yuborilgan o'yinda darvozabonga ham savol bo'lmay iloji yo'q...
- Ha, albatta. O'yinning qiziqarli, shu bilan birga, qiyin kechishini oldindan bilgandim. Aynan menga ko'p narsa bog'liqligini ham sezib turgandim. Ishonchli harakat qilib, jamoamga foyda keltirishni maqsad qilgandim. Lekin hamisha ham o'ylagan rejalaringiz amalga oshavermas ekan. To'g'ri, ayrim gollarni bartaraf etish qiyinchilik tug'dirdi. Ammo qaytarishim shart bo'lgan zarbalar ham yo'q emasdi. Har qanday holatda o'tkazib yuborilgan gollarda darvozabonning aybi katta bo'ladi. Bejizga kiperlarga yarim jamoa, degan ta'rif berilmaydi.
- Lekin himoyachilarga ham e'tiroz bo'lishi kerak. To'g'rimi?
- Hamma o'z ustida ishlashi lozim. Yigitlarga baribir, rahmat aytaman. O'yinning so'nggi soniyalarigacha kurashishdi. E'tiroz faqat murabbiyimizdan bo'lishi lozim. O'z o'yinimiz bilan ularni uyaltirib qo'ydik.
- Bu o'yin jamoada muhokama qilindimi?
- Albatta. Klub bazasida yig'ilish o'tkazildi. O'yinni qayta ko'rib chiqdik. Baxtiyor aka har bir futbolchiga yo'l qo'ygan xatolarini ko'rsatdilar. Murabbiyimiz professional tarzda, yotig'i bilan tushuntirdilar. Yigitlarning kayfiyati va ruhiyatini yana ham tushirib yubormaslik uchun kerakli so'zlarni aytdilar. Har birimiz o'zimiz uchun tegishli xulosalarni chiqarib oldik.
- «Andijon» beshta uchrashuvning to'rttasida mag'lubiyatga uchradi. Bu omadsizlikni taqvimning murakkab kelganligi bilan izohlash mumkinmi?
- Ehtimol shundaydir. Lekin har qanday holatda ham o'yinga tayyor holda chiqish kerak. Bu bahona bo'lmaydi. Qolaversa, omad ham yuz o'girsa, dardingizni kimga aytasiz?
- Jamoadagi muhit qanday?
- Hammasi yaxshi.
- «Andijon» oldiga oliy ligada qolish vazifasi qo'yilganmi?
- Yo'q. Agar shunday vazifa qo'yilsa, mavsum yakunida 1-divizionga tushib ketishimiz mumkin. Hech narsaga erisha olmaymiz. Jamoamizni qolgan klublardan sezilarli darajada kuchsiz, deya olmayman. Shunday qarash bilan maydonga tushsak, natija ijobiy ko'rinish kasb etaveradi. To'g'ri, kuchli beshlikka kirish haqida gapirish niyatim yo'q. Lekin oldimizga maksimal vazifalarni qo'yaverishimiz kerak.
- Bunga jamoaning salohiyati etadimi? Bugungi tarkib bilan ayni vazifani uddalash mumkinmi?
- Ilojsiz narsaning o'zi yo'q. Harakat qilsak, hammasi yaxshi bo'ladi.
Davomi InterFUTBOL gazetasi blogida.
— deya xabar beradi uff.uz nashri.