Poytaxtimizagi “O'zbekiston” sport saroyida og'ir atletika bo'yicha o'tkazilayotgan Osiyo chempionatida bugun oltinchi kun musobaqalari o'tkaziladi.
Bugun bo'lib o'tadigan bahslarda xotin-qizlar o'rtasida -75 kg. va +75 kg. vazn toifalarida, erkaklar o'rtasida esa -94 kg. hamda -105 va +105 kg. vaznlarda musobaqalar o'tkaziladi. Bugun -75 kg. hamda -94 kg. vazn toifalarida g'olib va sovrindorlar nomi ma'lum bo'lsa, +75 kg. va -105 kg. hamda +105 kg. vaznlarda “A” guruhidagi bahslar 30 aprel kuni bo'lib o'tadi. Shu kuni terma jamoamiz etakchilari Ruslan Nurudinov, Ivan Efremov, Sardor Do'stmurodov, Rustam Jangabaev va Omadoy Otaqo'zieva ishtirokidagi bahslarni guvohi bo'lamiz.
Bugun o'tkaziladigan musobaqada esa hamyurtlarimizdan Dina Tojieva (-75 kg) va Manzura Mamasolieva (-75 kg) bahs yuritadilar. Dina Tojieva “V” guruhidan o'rin olgan bo'lsa, Manzura “A” guruhida qayd etilgan.
Eslatib o'tamiz, 28 aprel kuni o'tkazilgan bahslarda yurtdoshlarimizdan Muhammad Begaliev (-85 kg) dast ko'tarishda 160 kg, siltab ko'tarishda esa 190 kg. toshni o'ziga bo'ysintirib, ikkikurash yakuniga ko'ra 350 kg. natija bilan 5-o'rinni egalladi. Xuddi shu vazn toifasida bahs yuritgan Ulug'bek Alimov dast ko'tarishda 150 kg, siltab ko'tarishda 186 kg. natijani qayd etib, umumiy 336 kg. ko'rsatkich bilan 7-o'rinni egalladi. Xotin-qizlar musobaqasida ishtirok etgan Gulnoza Axmadova (-69 kg) dast ko'tarishda 65 kg, siltab ko'tarishda esa 85 kg. natija ko'rsatib, ikkikurash yakunlariga ko'ra 150 kg. ko'rsatkich bilan 10-o'rinni band etdi. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.