Hayot nainki ilgarilanma harakat yoki olg'a borish, balki goho ortga chekinishdan ham iborat. Barchaga ma'lum bu haqiqat ba'zan butun jozibasi bilan futbol olamida ham ko'zga tashlanadi, undagi maromni o'zgartirib yuboradi. Shu tariqa futboldagi ko'nikilgan ayrim me'yorlar nari suriladi, zalvorli taxminlar tanazzulga yuz tutadi.
Muxlislar «Barselona» misolida mazkur jarayonni yana bir bor kuzatishdi. Kimdir Kataloniya klubi depsinishini shunchaki, nafas rostlash, tin olishga yo'ydi, boshqa birov 500-golini urishga qiynalgan Messi, Ispaniya primerosida ketma-ket ochko yo'qotgan, EChLni tark etgan Luis Enrike shogirdlari uchun iztirob chekdi. Bularning bari tabiiy hol, mantiqqa mos. Zero, futbol muxlislarni iztirobga solishi, zavqlantirishi, kutilmagan haqiqatlari tufayli hayajonlantirishi bilan go'zaldir. Aks holda, «Barselona» kabi mahobatli san'at ham muxlislarni zeriktirardi.
«Barselona» EChL yarim finalidan mahrum bo'lish barobarida La-ligada  «Real Sosedad» va «Valensiya»dan ketma-ket mag'lubiyatga uchradi. Ayni superklub mavqei nuqtai nazaridan ortga chekinish masofasi shugina edi. Bundan ortig'i primeroda yuzaga kelgan qizg'inlikni ko'kragidan itarardi. Futbol tabiati ham bundan ortiq chekinishni hazm qilolmasdi. Shundoq o'zi turli nag'­malar millionlar o'yini kayfiyatini buzmoqda va endi «Barselona» ham bu muvozanatni parchalasa, muxlislarning buyuklikka bo'lgan ishonchiga darz ketardi.
Shu boismi, jamoa ortga boshqa chekinish mumkin emasligini vaqtida tushundi. Mana shu shafqatsiz haqiqatni anglash «Barsa»ni o'ziga keltirdi. Ta'bir joiz bo'lsa, toliqqan va ko'zi ilingan buyuklik birdan uyg'ondi. O'z vaqtida uyg'onish, g'alaba qozonish zarurat ekanligini qalban his qilish va salobatli salbiy bosimni uloqtirib tashlash hamisha olqishlarga munosibdir. Nazarimizda, xalqaro uchrashuvlarda ishtirok etayotgan terma jamoalarimiz va etakchi klublarimizda aynan shu xususiyat etishmayapti.
Oddiy misol: «Volfsburg» maydonidan mag'lub holda qaytgan «Real»ning javob uchrashuvida kerakli hisob qayd etishiga juda ko'pchilik ishondi. Nega? Negaki, «Real» bosimni bilmaydigan, tan olmaydigan jamoa. Bu klub muxlislari ko'z o'ngida to'p surishdan yayraydi. Bizning futbolimizda esa aksincha, xalqaro bosim illati mavjud. Yo'q, milliy chempionatimizdan xavotirga tushmasak ham bo'ladi. Oliy liga jamoalari uy va safar uchrashuvlarida bir maromda o'ynashni o'rniga qo'ymoqdalar.
Ularga na hayajon va na bosim xalaqit beryapti. Mana, ochko zarurati, g'alaba qozonish shartligi sababli, «Andijon» o'z maydonida, «Neftchi» esa safarda bu ishni uddaladi. Chunki har ikki jamoa uchun chekinish masofasi tugagandi. Ha, qaysidir klubning chekinish masofasi birinchi ligaga qadar cho'ziladi, boshqasida esa 2-3ta mag'lubiyat bilan nihoyasiga etadi. «Andijon» va «Neftchi» shunday jamoalar toifasiga kiradi. «Obod» haqida esa hozircha bunday xulosa aytishga erta. To'g'ri, debyutant dastlab «Bunyodkor»ga jiddiy qarshilik ko'rsatdi. Afsuski, sal o'tmay, jamoadagi ishtiyoq so'nib qoldi. «Obod»dagi ishtiyoqni balki Hasan Ro'zievning harakatlari so'ndirgandir. Ehtimol. Har holda, Pavel Solomonning hakamga atalgan istehzoga to'la tabassumi bejiz emasdir. Lekin hakamlik bilan bog'liq xato va kamchiliklarga Hasan Ro'ziev harakatlari nuqta qo'ymaydi. Biz hakamlarning xato va kamchiliklariga guvoh bo'lishda davom etaveramiz.
Demak, ulardan arazlab, zarda qilib, raqibga osongina qo'l ko'tarish futbol mantig'iga zid. Mag'lubiyat onlarida ham oxirigacha mardona kurashadigan jamoagina muxlislar mehrini qozonadi. «Obod» shu yo'ldan borsa, albatta, uni yorug' manzillar kutadi. Ko'rinib turibdi, klub oliy liga havosidan bahra olish baxt ekanligini yanada chuqurroq his qilsa, ochkolar jamg'arishga qodir. Xo'sh, «Obod»ga qarshi hech bir bosimsiz o'ynagan «Bunyodkor» safarda «Lahviya» bilan qanday to'p suradi? Safar uchrashuvida «qaldirg'ochlar»da hech qanday bosim sezilmaydi.
Chunki o'yin OChL doirasida, bosim esa ular bilan xayrlashdi. Endi Sergey Lushan xalqaro bosim illati bilan kurashmaydi. Ochig'i, avval ham shu ishga tuzukroq  bel bog'lamagandi. Mana, avvalgi mavsum kabi hammasi o'z joyiga tushdi. Yana eski hammom, eski tos! Qisqasi, vaziyat o'zgarmadi, ishonchlar takror oqlanmadi, nish urgan umid kurtaklari yana ko'karolmadi. Osiyoning eng yaxshi yosh futbolchilari tarkibida ekanligi bilan mag'rurlanadigan «Bunyodkor» yana xalqaro bosim va raqobat qarshisida bosh egdi.
Davomi InterFUTBOL gazetasi blogida.
— deya xabar beradi uff.uz nashri.