Yaqinda «Rostov» bosh murabbiyi Qurbon Berdiev bildirgan fikrni o'qib qoldim. Unda turkmanistonlik mutaxassis o'z vatanida faoliyat olib borgan kezlari tajriba almashish uchun kelgan yaponiyalik mutaxassis bilan bo'lgan suhbatni aytib bergan. Berdievning hikoya qilishicha, u Turkmaniston futbolida infratuzilma masalasida muammolar katta ekani va maydonlar sifati juda yomonligidan shikoyat qilar, yaponiyalik hamkasbining javobidan hayron qolgan ekan. Bilasizmi, o'shanda yaponiyalik mutaxassis nima deb javob qilgan? «Bu hech narsa emas, muhimi - bolalar murabbiylari kuchli bo'lsin. Shundagina iqtidorlarni taqir maydonda ham tarbiyalasa bo'ladi!»
Qurbon Berdiev qay darajada kuchli murabbiy ekanini Rossiya chempionatida bir yo'la ikki klubdagi faoliyati bilan isbotlab bera oldi. U «Rubin» boshqaruvida ishlaganda dunyoda birinchilardan bo'lib «Barselona»ni mag'lub etish sirini ocha olgan edi. Ko'rgan bo'lsangiz, o'tgan hafta «Atletiko» klubi EChL chorak finalida «Barselona»dan ustun keldi. Madridliklar o'yiniga nazar tashlasak, besh yil burun «Rubin» asos solgan uslubni ilg'ab olish qiyin emas. Kim biladi deysiz, balki Diego Simeone «Barselona»ga qarshi kechadigan o'yin oldidan qozonliklar g'alaba qozongan o'sha uchrashuvni ham o'rganib chiqqandir.
Nima bo'lganda ham Qurbon Berdiev - malakali mutaxassis. Uning eng kuchli jihatlaridan yana biri shundaki - turkmanistonlik murabbiy qaerda faoliyat yuritmasin, albatta, bolalar futboliga katta e'tibor qaratadi. Masalan, Qozonda u asos solgan ulkan akademiya bor va ko'plab yosh iqtidorlar tarbiyalanib kelmoqda. Shu jumladan, yurtimizdan ham bir qator bolalar o'sha erda tahsil olib keldilar.
Maqola boshida yaponiyalik mutaxassis bilan bog'liq holatga bejiz to'xtalib o'tmadik. Qurbon Berdievdek inson yigirma yil oldin bo'lib o'tgan suhbatni shunchaki yodga olmagan. Yaponiya - futboli shiddat bilan rivojlanayotgan va eng muhimi, rivojlanishdan to'xtab qolmayotgan mamlakat. Yuqoridagi misol esa bu rivojlanish sababini to'liq ochib bera oladi. Kunchiqar o'lkada, eng avvalo, bolalar futboli va murabbiylar saviyasiga e'tibor beriladi.
Shu sababli, Xidetoshi Nakata faoliyatini tugatar-tugatmas Nakamuralar etishib chiqaveradi. Shinji Ononing yoshi o'tgani hamono Kagava, Xonda va Okazakilar termaga tirgak bo'ladilar. Biz hali Nakazava-yu Takaxaralar haqida gapirmadik. Bir so'z bilan aytganda, yapon futboli hech qachon iqtidorlar masalasida faqir bo'lib qolmagan. Boisini tushunib turibsiz...
Davomi InterFUTBOL gazetasi blogida.
— deya xabar beradi uff.uz nashri.