Oliy liga 7-turidan o'rin olgan “Navbahor” va “Obod” (2:1) jamoalari o'rtasidagi uchrashuvdan keyin o'tkazilgan matbuot anjumanining ikkinchi qismida Aleksandr Volkov jurnalistlarning savollariga javob qaytardi. “O'yin borasida gap ketganida nima deyish mumkin. “Obod” jamoasining bir qator uchrashuvlarini ko'rib tahlil qilib chiqqandik. Toshkentliklarni ham qishki yig'inlar chog'ida chempionatga jiddiy tarzda tayyorgarlik ko'rganiga guvoh bo'lgandik. Bobur Zuhriddinovni yaxshi bilaman. Negaki qo'l ostimda shug'ullangan. Afsuski iqtidorli futbolchi sog'lig'i bilan bog'liq muammo tufayli faoliyatini ertaroq yakunlashga majbur bo'lgandi. Yosh bo'lishiga qaramay yaxshi jamoani shakllantirib to'g'ri yo'ldan ketayotganligini namoyish etmoqda. Uchrashuvdan oldin futbolchilarga oson bo'lmasligi haqida ogohlantirgandim. Kichik xotirjamlikka berilishdan ham ular samarali foydalanishlari mumkinligi xususida uqtirgandim. Amalda ham shunday bo'ldi. Imkoniyat yaratib berishgani uchun raqib yagona javob to'pini kiritishga erishdi. Ikkinchi bo'limdagi qizil kartochka esa o'yinni borishini buzib yubordi. Birinchi bo'limdagi o'yinimizdan qoniqish hosil qilmaganligimiz sababli tanaffusda ayrim o'zgarishlarni amalga oshirgandik. Lekin, qizil kartochka bahsni o'ylaganimizdek kechishiga to'sqinlik qildi. Kamchilikda qolganimizdan keyin himoyaga e'tibor qaratishga majbur bo'ldik. Shunday sharoitda ham gol urish uchun uchta yaxshigina vaziyatlarni ko'kka sovurdik. Xullas bahs kutilganidek, qiyin ruhda o'tdi. E'tiborli jihati qiyinchiliklarni yuzaga kelishiga o'zimiz sababchi bo'ldik. Vaziyatlardan foydalanishdagi kamchiliklarimizni hanuzgacha bartaraf eta olganimizcha yo'q. Mashg'ulotlarda ushbu kamchilikni bartaraf etish borasida ishlayotgan bo'lsakda, buning samarasi unchalik ko'rinmayapti”, – deydi Volkov. 
— deya xabar beradi uff.uz nashri.