Oilaviy sulola - bu ibora futbol uchun ham begona emas. Olma olmadan rang olgani kabi futbolchi akaning ortidan ukasi ergashishi odatiy hol. Ba'zi oilalarda hattoki, ukalar shunday qilishadi. Faqat, ulardan eng mashhuri jamoatchilik e'tiboriga tushadi, qolganlari esa o'sha yulduz aka yoki uka soyasida yurishga majburlar. Xullas, quyidagi hikoyamiz kasbdosh aka-ukalar haqida.
Serxio Aguero va Gaston del Kastilo (Argentina)
«Kun» laqabi bilan ham tanilgan hujumchining to'liq ism-sharifi - Serxio Lionel Aguero del Kas-tilo. «Manchester Siti» a'zosi barchaga yaxshi tanish. Ammo uning 18 yoshli ukasi - Gastonni faqat  vatandoshlari bilishadi, xolos. Vaholanki, yosh futbolchi o'yin uslubi, bo'y-basti va boshqa jihatlari bilan akasini eslatadi. Gaston hozircha vaqtida akasi to'p surgan «Independ-ente» o'rinbosarlar jamoasidan yuqoriga ko'tarila olganicha yo'q. To'g'ri, iyun oyida 19 yoshga to'ladigan kenja Aguero hamon umidli yigitlar davrasida. Taqqoslash uchun aytsak, Serxio 17 yoshida Argentina chempionatida gol ura boshlagandi. Xullas, Gaston akasidan ancha ortda qolmoqda. Lekin unda risoladagidek saviyaga ko'tarilish imkoniyati yo'q emas.
Mats va Yonas Xummels (Germaniya)
Sobiq futbolchi Xerman Xummels va  Germaniyada o'yinni sharhlab borgan dastlabki ayol Ulla Xolxoff oilasida dunyoga kelgan Mats va Yonas uchun kasb tanlash masalasida o'zga variant yo'q edi. Axir ularning volidalari keyinchalik sport telekanali bosh muharriri lavozimiga ko'tarilib, «Nemis futboli onasi» e'tirofini olgandi. Mana, chinakam  futbol oilasidan jahon chempioni chiqdi. Biroq kenja Xummels akasidek yuksak natijalarga erisholmadi. 17 yoshida «Bavariya»ni tark etgan himoyachi salkam 10 yildan buyon kamtarin «Unterxaxing» sharafini himoya qilish bilan cheklanmoqda.
Xose va Xuanmi Kalexon (Ispaniya)
«Napoli» hujumchisi egizaklardan biridir. Xose va Xuanmi vaqtida «Real» kanterasida birgalikda to'p surishgan. Keyinchalik Xose «Espanol»ga yo'l oldi, Xuanmini esa «Malorka» 1 mln. evro evaziga sotib oldi. Balear orollarida o'z o'rnini topolmagan futbolchi ispan klublaridagi sayohatlardan so'ng Gretsiyada ham o'ynab ko'rdi. Lekin chinakam muvaffaqiyatga uzoq Boliviyada erishdi. Aytgancha, egizaklar o'tgan mavsumning ma'lum bosqichida o'zlari to'p surayotgan chempionatlar bosh to'purari maqomida yurishdi. Xususan, «Bolivar» sharafini himoya qilayotgan Xuanmi 104ta uchrashuvda 49ta gol urdi. U endilikda Boliviya fuqaroligini qabul qilib, mamlakat milliy jamoasida to'p surish niyatida.
Mario, Fabian va Feliks Gyottse (Germaniya)
So'nggi JChda g'alaba goliga mualliflik qilgan Marioning akasi va ukasi ham futbolchi. 25 yoshli Fabian «Borussiya» D. akademiyasida tahsil olgan bo'lsada, klubning asosiy tarkibida maydonga tushish baxtidan bebahra qoldi. «Maynts» va «Boxum» klublaridagi qisqa faoliyatdan so'ng esa Yonas Xummels bilan «Unterxaxing»­da o'ynadi. Ushbu himoyachi bir yildan buyon ishsiz. Gyottselarning eng kichigi - 18 yoshli Feliks ham hali o'z so'zini aytgani yo'q. U «Bavariya» yoshlar jamoasida markaziy himoyachi rolini bajarmoqda.
Uesli va Rodni Sneyder (Gollandiya)
Kichik Sneyder ham «Ayaks» tarbiyasini olgan, biroq hattoki, Gollandiyaning o'rtamiyona jamoalarida ishonchli to'p surolmayapti. U yaqindagina «Dandi Yunayted» bilan 2 yillik shartnoma tuzgandi. Bir oydan so'ng esa kelishuv tomonlarning o'zaro roziligi bilan bekor qilindi. Sabab - futbolchining salomatligini saqlab qolish.
Davomi InterFUTBOL gazetasi blogida.
— deya xabar beradi uff.uz nashri.