Futbol olamida qiziqarli voqealar ko'plab uchrab turadi. Shu bois,  to'plangan, ayrim qiziqarli, g'aroyib va kulguli voqealarni sizga havola qilmoqchiman. Marhamat, o'qing va zavq oling.
1999 yili braziliyalik Edmundo ishtirokida eng shov-shuvli mojaro bo'lib o'tdi. O'g'lining tug'ilgan kuni sharafiga ziyofat uyushtirgan futbolchi o'z villasida o'tayotgan tadbirga masxarabozlar va maymunlardan iborat ko'chma tsirk vakillarini taklif etadi. Buni qarangki, «hayvon» laqabli futbolchi (tabiiyki shirakayf holatda)ga maymunlardan biri juda yoqib qoladi. U o'sha jonivor bilan «qittak-qittak» qilishga ahd etib, maymunga shampan vinosi va pivoning aralashmasidan quyib beradi. Natijada jonivorning ko'ngli aynib, tobi qochib qoladi. Keyinchalik Edmundo jonivorlar bilan shafqatsizlarcha, munosabatda bo'lganlikda ayblanib, 100 000 dollar miqdorida jarima to'laydi.
80-yillar oxirida Kolumbiyaning «Atletiko Nasonal» jamoasi «Milonarius»ni hech yuta olmasdi. Shunda «Atletiko» futbolchilari Rene Igita va Karles Perea birgalikda folbin ayolga borishadi. Folbin jamoaning har bir futbolchisini nomma-nom aytdi va barcha ko'k matodan tikilgan ichki kiyim kiyishi lozimligini ta'kidladi. Shundan keyin omadi yurishgan jamoa birin-ketin g'alaba qozona boshladi. Yakunda esa Libertadores kubogida g'olib chiqishdi (1989 yil).
Kolumbiyalik mashhur posbon Rene Igita odam o'g'irlashda ayblanib qamoqqa tushgan. Aslida esa u o'z do'stining qizini garovdan qutqarishda asosiy ro'lni bajargan. Ya'ni vositachi bo'lib, 64 ming dollar miqdorida mukofot olgan. Bu esa Kolumbiya qonunlariga ziddir. Butun mamlakatda uning yonini olganlar ko'p edi. Igita esa o'zini oqlash uchun qamoqxonada ochlik e'lon qildi. Oqibatda, ozodlikka chiqarilgan. Ammo shu voqealar tufayli u 1994 yilgi AQShda bo'lib o'tgan jahon chempionatiga bora olmagan.
2008 yili Gruziya va Argentina faxriylar terma jamoalari o'rtasidagi bellashuvni stadionda oilasi bilan birga ko'rishni xohlagan bitta muxlis Opel Vestra mashinasini sotishga majbur bo'ldi. Chunki, u Maradonani ko'rishni xohlagandi. «Boshqa ilojim yo'q edi. Men Maradona «bilan» ulg'ayganman», - deydi ashaddiy muxlis.
Evrokuboklardagi uchrashuvlardan birida Eysebio «Sh-de-Fon» darvozasini uchta raqibini aldab o'tib, to'rtinchisining ustidan to'pni oshirib tashlaydida, erga tushirmasdan darvoza tomon zarba berib, gol kiritadi. Gol bo'lgach, Eysebioning ortidan raqib darvozaboni «Eysebio, Eysebio» deya baqirib kelayotgandi. O'sha paytda darvozabon Eysebio bilan urushib ketsa kerak deb o'ylab turishgandi, ammo – u shunchaki chiroyli gol bilan tabriklamoqchi bo'lgan ekan. Ilgari mana shunday mard darvozabonlar ham uchrab turardi.
Davomi Furqat Yusupov blogida.
— deya xabar beradi uff.uz nashri.