“Al-Ayn” – “Nasaf” uchrashuvi oldidan o'tkazilgan matbuot anjumanining navbatdagi qismida jamoamiz bosh murabbiyi Ro'ziqul Berdiev hamda darvozabonimiz Eldorbek Suyunovlar ishtirok etishdi.
Ro'ziqul Berdiev: – Ertaga shubhasiz qiziqarli uchrashuv bo'ladi. Endigi vaziyat shundayki, ikkala jamoani ham faqat g'alaba qanoatlantiradi va bu g'alaba shu jamoani guruh bosqichidan olib chiqadi. Ikkinchi juftlik o'yini natijasi bizga nima beradi? O'ylaymanki, ertaga “Al-Jaish” o'zining eng yaxshi o'yinini ko'rsatadi va natija ham shunga monand bo'ladi. “Al-Ayn” klubi mamlakat chempionatida ikkinchi o'rin bilan cheklandi, raqibimiz Amirlikning eng kuchli jamoalaridan biri ekanligini hamma biladi. Ularning hamma harakatlari endi OChLga qaratilganini sezish qiyin emas. Hozir guruhimizda shunday vaziyatki, har qanday holat bo'lishi mumkin, hatto bizga g'alaba ham foyda bermasligi mumkin. Shundan kelib chiqib, ertaga faqat ijobiy natija uchun kurashamiz. “Al-Ayn” jamoasining hujum chizig'ida o'ynaydigan kuchli futbolchilari bor, bundan tashqari boshqa ampluadagi yaxshi o'yinchilari ham etarli. Biz “Al-Ayn” jamoasini etarlicha o'rganib chiqdik, ularning kamchiliklarini ham bilamiz, ertangi uchrashuvda raqibimizning kamchiliklaridan foydalanshishmiz kerak. To'g'ri, bizda oldingi o'yinda bo'lgani kabi, yo'qotishlar bor. Jamoamiz hujumchisi Ilhom Shomurodov afsuski ertaga ham bizga yordam bera olmaydi.
Eldorbek Suyunov: – Biz bu erga bitta maqsad bilan kelganmiz, u ham bo'lsa ertaga bo'ladigan uchrashuvda faqat g'alaba qozonish. Biz buni uddalashga tayyormiz, ya'ni yaxshi tayyorgarlik olib bordik. Endi Qarshida bo'lib o'tgan uchrashuv tarixda qoldi, shuning uchun bizning bor diqqat e'tiborimiz ertangi o'yinga qaratilgan. Bu erdagi ob-havo bizdagi bilan deyarli bir xil, biz uchun hech qanday noqulaylik tug'dirmaydi. Qolaversa ikkala jamoa ham ushbu ob-havoda o'ynaydi.
— deya xabar beradi uff.uz nashri.