«Milan»ning sobiq darvozaboni Nelson Dida ayni payt­da murabbiylik kurslariga qatnamoqda. U La Gazzetta dello Sport nashriga bergan intervyusida qachonlardir «rossoneri» bosh murabbiyi bo'lish istagi borligini aytib o'tdi.
Braziliya terma jamoasining sobiq posboni milanliklar safida 10 yil faoliyat olib bordi. Bu vaqt oralig'ida bir nechta sovrinlarni qo'lga kiritdi. Ular orasida ikkita Chempionlar Ligasi bosh sovrini ham bor.  Shuningdek, u «Internasonal» sharafini himoya qilgan. Ayni paytda 42 yoshli darvozabon biror-bir klub bilan shartnoma imzolashga qarshi emas. Ammo Braziliya oliy divizioni jamoasi bo'lishi shart.
- Kelajakda «Milan»ni boshqarishga nima deysiz?
- Hammasini vaqt ko'rsatadi. Ayni paytda Terezopolisdagi kurslarga qatnayapman. Kelgusi yilda esa Koverchanoda o'qiyman. Eng avvalo, buni istash yoki istamasligimni tushunib olishim kerak. Ayni istak meni futbolda ushlab turibdi. Albatta, oson bo'lmasligi aniq. Ammo buyuk o'qituvchilardan saboq olganman. Xususan, Karlo Anchelottidan. Agar o'zimga ishonsam, yaxshi murabbiy bo'lishim mumkin. Italiyada ishlashni istayman. Shunday ekan nimaga «Milan»ni boshqarmasligim kerak?
- Yaqinda Klarens Zeedorf va Filippo Inzagilar shu ishni qilishdi. Ularning jamoa bosh murabbiylari bo'lishlarini kutganmidingiz?
- Bundan hayron bo'lmadim. Yaxshi murabbiylardan olingan saboqlar bejiz ketmaydi. Agar yuqori saviyada ko'p o'ynasangiz, ko'p o'qisangiz, boshqalardan ko'ra bu sohaga ko'proq tayyor bo'lasiz. Ularning ikkisiga ham kelajakdagi faoliyatlarida omad tilayman.
- Endi navbat Brokkiga keldi. Uning «Milan» bosh murabbiyi bo'lishini kutganmidingiz?
- Kristian o'ta aqlli inson. Yaqinda Milanga borganimda ko'rishdik. Lekin u meni ajablantirmadi. Brokkining barcha bilan til topishib ketish qobiliyati esimda. Uning jamoasi yaxshi o'ynagani va o'z uslubiga ega bo'lganini bilaman. Bir so'z bilan aytganda, Kristian jamoani qanday boshqarish kerakligini biladigan inson.
Davomi InterFUTBOL gazetasi blogida.
— deya xabar beradi uff.uz nashri.