Portugaliyaning Funchal shahrida suzish bo'yicha o'tkazilayotgan Evropa ochiq chempionatining dastlabki kunidayoq mamlakatimiz paralimpiyachilari ko'pchilik e'tiborini qozondilar.
Gap shundaki, mazkur musobaqada Vatanimiz sharafini himoya qilayotgan uch nafar sportchimizning barchasi sovrinli o'rinlarni egallash bilan birga, Jahon va Osiyo rekordlarini ham yangilashga muvaffaq bo'ldilar.
Jumladan, 100 metr masofaga batterflyay usulida suzish musobaqasida ishtirok etgan hamyurtimiz Muslima Odilova belgilangan masofani 1:04,98 soniyada bosib o'tib, Jahon rekordini yangiladi. Avvalgi rekord natija (1:05,03) amerikalik Mayers Rebekaga tegishli bo'lib, 2015 yil Buyuk Britaniyaning Glazgo shahrida o'tkazilgan musobaqada o'rnatilgan edi.
Xuddi shu masofaga bo'lib o'tgan musobaqada yana bir hamyurtimiz Shohsanam Toshpo'latova 1:05.81 natija bilan yaponiyalik Kasomoto Akariga tegishli bo'lgan (01:22,00) natijani sezilarli darajada yaxshilay oldi. Yaponiyalik sportchi shu paytga qadar o'ziga tegishli bo'lgan rekord natijani 2010 yilda qayd etgan va ana shu rekord ko'rsatkich 6 yil davomida o'zgarmay kelayotgan edi. Agarda avvalgi rekord ko'rsatkich hamyurtimiz tomonidan katta farq bilan yangilaganligini inobatga olsak, endilikda Shohsanamga tegishli bo'lgan Osiyo rekordi uzoq yillar saqalanib turishiga ishonchni oshiradi.
Erkaklar o'rtasida 100 metr masofaga batterflay usulda suzish bo'yicha o'tkazilgan musobaqada ham yangilangan Osiyo rekordi O'zbekiston terma jamoasi a'zosiga tegishli bo'ldi. Tajribali sportchimiz, Paralimpiya hamda Paraosiyo o'yinlarida rekord ko'rsatkichlarni yangilash hadisini olgan Kiril Pankov Portugaliyada ham an'anani davom ettiryapti. U belgilangan masofani 00:57,97 soniyada suzib o'tib, yaponiyalik Tomita Uchuga tegishli bo'lgan Osiyo rekordini (01:04,73) katta farq bilan yangilashga muvaffaq bo'ldi.
Evropa ochiq chempionati bahslari 7 mayga qadar davom etadi va navbatdagi musobaqalarda ham paralimpiyachilarimizga omad va zafarlar tilab qolamiz. Shavkat Jalilov O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.