Joriy yil hali ekvatoridan o'tmagan bo'lsada, Sosser.ru «Oltin to'p»­ning navbatdagi da'vogarlari kimlar bo'lishini taxmin qilib ko'rdi: agarda yil oxirigacha Luis Suares kimnidir tishlab olishdan o'zini tiya olsa, uch nafar nomzodning biriga aylanishi mumkin. Chunki u joriy mavsumda sermahsullik va ko'tarinki kayfiyat borasida Messi va Neymardan ancha o'zib ketdi, «Barsa»ning suyangan tog'iga aylandi.
Albatta, musobaqalarga boy bo'lgan 2016 yil yana ko'plab qahramonlarni kashf etishi mumkin. Oldinda Evropa chempionati, Kopa Amerika va Olimpiada turnirlari kutib turibdi. Biroq FIFAdagilar «Oltin to'p» sohibini aniqlashda asosan individual natijalarga e'tibor qaratishadi. Urugvaylik hujumchi esa to'rt oy ichida alohida e'tirofga munosib bo'lgan futbolchilar qatoridan munosib joy egallamoqda. Hatto, «Barselona»ning ChL turniridan chiqib ketgani ham Suaresning yorqin o'yinlariga soya sololmaydi.
Qolaversa, klub miqyosida yuksak sermahsullikni namoyish etayotgan merganning qit'a birinchiligida ham porlashi kutilmoqda. To'purarlar bahsida Luisga faqat Krishtianu Ronaldu munosib raqobatchi bo'lib turibdi. Xullas, nomzodlar ro'yxatiga hozirda Luis bilan Krishtianuni bemalol qo'shish mumkin. Messining uchlikka kirishi ancha qiyin. Boz ustiga, yirik turnirlar va ChLning hal qiluvchi bahs­lari yangi da'vogarlarni aniqlab berishi hech gap emas. Masalan, «Bavariya» ChLda g'olib chiqsa, Germaniya esa Frantsiyadan chempion maqomida qaytsa, Tomas Myuller yoki Manuel Noyer, agarda bu muvaffaqiyatlar «Atletiko» hamda Frantsiya terma jamoalariga nasib etsa, Antuan Grizmann ajoyib imkoniyatga ega bo'ladi.
«Oltin to'p»ga da'vogarlar uchligi xususida yozgi musobaqalar yakunida bafurja fikr bildirish mumkin. Lekin Suaresning bugungi sport formasi, baribir, kishini hayratga soladi. Faoliyatidagi eng sermahsul mavsumni o'tkazayotgan to'purar yaqinda «Barselona»da afsonaviy Ronaldo tomonidan o'rnatilgan rekordni yangiladi. Bundan tashqari, so'ng­gi 66 yil ichida bir uchrashuvning o'zida 7 ballga ega bo'lgan yagona hujumchiga aylandi: primeroning 34-turida «Deportivo» darvozasini 4 marta ishg'ol etib, uchta samarali uzatmani amalga oshirdi.
Futbol olamidagi boshqa reytinglarda vaziyat qandayligidan bexabarmiz. Lekin aynan «Barsa» xususida fikr yuritadigan bo'lsak, Suares jamoaning eng yorqin yulduzi. Hatto, aprel oyidagi sust o'yinlarida ham Luis raqiblar uchun dahshatli goleador maqomida qolaveradi, mag'lubiyatda uning hech qanday aybi yo'q. Messi esa xuddi Xavi va Inesta rolini bajarayotgandek: o'z vaqtida o'ta sermahsul o'yinlar ko'rsatib, «Oltin to'p»dan kollektsiya yaratishga ulgurgan, ispanlarning turli musobaqalardagi g'alabalari esa Xavi bilan Inestaning individual ko'rsatkichlariga ta'sir ko'rsatmagandi.
Davomi InterFUTBOL gazetasi blogida.
— deya xabar beradi uff.uz nashri.