FootballHD.ru ijodkorlari terma jamoalarning ertangi kuni hisoblangan yosh iqtidor sohiblari haqida hikoya qiladilar. E'tiboringizni amaldagi jahon chempioni - Germaniya terma jamoasining bo'lajak yulduzlariga qaratamiz.
Dennis OTTO
Darvozabon, 17 yoshda, «Barselona»
Terma jamoaga jalb etilish ehtimoli: past
Nemis futboli azaldan mohir darvozabonlari bilan dovrug' qozongan. Shu bois, mazkur pozitsiya uchun raqobat doimo o'ta kuchli bo'lardi. Yaqin 5-6 yil ichida Manuel Noyer va ter Shtegendek «aslar»ni tarkibdan chiqarish oson bo'lmasligini hisobga olgan holda ro'yxatga yosh, lekin noyob iqtidor sohibi bo'lgan Ottoni kiritdik. Otasi Ispaniyada sayyohlik biznesi bilan shug'ullangani sababli, Dennis bolalik paytidan Pireneyda o'sdi. Futbol bilan shug'ullanishni u «Malorka»da boshlagandi. Lekin tez orada «Barselona» uni o'z akademiyasiga jalb etdi. Hozirda kataloniyaliklar noyob iqtidor egasi sifatida e'tirof etishayotgan Ottoni Luis Enrike «Barsa» mashg'ulotlariga jalb etmoqda.
Joshu KIMMIX
Himoyachi, 21 yoshda, «Bavariya»
Terma jamoaga jalb etilish ehtimoli: yuqori
Aslida, tayanch yarim himoyachisi chizig'iga ixtisoslashgan Kimmix Badshtuber, Boateng va Benetiya jarohat olishganidan keyin markaziy himoyachi vazifasini bajarishga majbur bo'lmoqda. Mudofaa chizig'idagi sherigi - Xabi Alonso uning harakatlaridan mamnun, Joshuani Xaver Maskerano bilan tenglamoqda. Xaver ham tayanch yarim himoyachisi pozitsiyasidan himoya markaziga o'tgandi. Qolaversa, Xosep Gvardiola unga to'la ishonch bildirib, Joshuani o'z o'g'lidek ko'rishini e'tirof etdi.
Jonatan TA
Himoyachi, 20 yoshda, «Bayer»
Terma jamoaga jalb etilish ehtimoli: yuqori
«Dorishunoslar» yozda «Gamburg»ga 7 million evro to'lab, universal himoyachiga ega bo'lishdi. Bo'yi 194 sm. bo'lgan 90 kilogrammli Jonatan chinakam bahodir. Uning terma jamoada Jerom Boatengning o'rnini egallashi taxmin qilinmoqda. Joriy mavsumni «Bayer»da barqaror o'tkazayotgan himoyachi Evro-2016 ishtirokchisiga aylanish uchun zarur barcha xususiyatlarga ega.
Mark-Oliver KEMPF
Himoyachi, 21 yoshda, «Frayburg»
Terma jamoaga jalb etilishi ehtimoli: past
Bundan ikki yil avval «Frayburg» «Borussiya» D.ga o'tib ketgan Mattias Ginterning o'rnini to'ldirish maqsadida Kempfni xarid qilgandi. «Ayntraxt» himoyachisida «Yuventus»ga o'tish varianti ham yo'q emasdi. Biroq Mark-Oliver dongdor jamoaning zaxira o'rindig'idan ko'ra, o'yin amaliyotini afzal ko'rdi. Joriy mavsumda Kempf risoladagidek to'p surmoqda. Lekin «Frayburg» 2-bundesligada ishtirok etayotgani bois, bundestim orzusini keyinroqqa qoldirishga majbur.
Yulian VAYGL'
Yarim himoyachi, 20 yoshda, «Borussiya» D.
Terma jamoaga jalb etilishi ehtimoli: yuqori
Hozirda Yulian nafaqat bundesliga, balki Evropada mavsum kashfiyoti bo'lib turibdi. Yozda dortmund­liklar uni arzimagan 2 million evro evaziga jamoaga qo'shib olganlarida, yosh iqtidor sohibining qisqa muddatda asosiy tarkib a'zosiga aylanishini hech kim xayoliga keltirmagandi. Axir Sven Bender, Ilkay Gyundogan, Mattias Ginter, Gonsalo Kastro va Nuri Shaxindek mahorat sohiblaridan o'zib ketish oson emas-da. Ammo Tomas Tuxel bu borada umuman boshqacha fikrda edi. U yosh iqtidor egasiga ishonch bildirdi. Vaygl esa yoshiga xos bo'lmagan etuk o'yinlari bilan javob qaytarmoqda. «Borussiya»ning barcha hujumlarida Yulianning ishtiroki bor, aniqlik borasida u etakchilar safida.
Davomi InterFUTBOL gazetasi blogida.
— deya xabar beradi uff.uz nashri.