Mavsum boshlanganiga hali hech qancha vaqt bo'lmadi, ammo ba'zi jamoalar uchun jo'ja sanaladigan fasl kelib qolgandek. OChL guruh bosqichidagi jamoalarning saragi sarakka, puchagi puchakka ajraladigan vaqt keldi. O'tgan hafta beshinchi tur o'yinlari o'tkazildi va unga ko'ra jamoalarimizning saragini ko'rmagan bo'lsak-da, biroq hozirdanoq puchagi ajralib qolganiga guvoh bo'ldik.
Mavsum boshida ko'pchilikka umid ulashgan «Bunyodkor»ning o'z maydonidagi so'nggi uchrashuvda ham mag'lubiyatga uchrashi jamoalarimizdan biri musobaqani rasman tark etganidan dalolat. «Lahviya»ni sira ham «Bunyodkor»dan kuchli, demagan bo'lardik. Aslida, bu bahsda toshkentliklar g'alaba qozonishlari ham mumkin edi. Ammo eng kerakli lahzada iroda etishmadi. Endi «qaldirg'ochlar» Chempionlar Ligasining so'nggi o'yinini shunchaki rasmiyatchilik uchun o'tkazishadi. Shundan so'ng Sergey Lushan aytmoqchi, e'tiborni ichki musobaqalarga qaratishsa ham bo'laveradi. Turnirni birinchi boshlagan klub ham «Bunyodkor» bo'ldi, eng avval yakunlaga ham u...
Xo'sh, klub muammolari nimada, qanday qilib bu ahvolga tushib qoldi? Axir «qaldirg'ochlar» yaqingacha xalqaro o'yinlarda eng nomdor jamoalarimizdan hisoblanishardi-ku? Bu savolga dabdurustdan javob qaytarish qiyin. Boisi, «Bunyodkor»da hech bir jabhada muammo ko'rmayapmiz - yaxshi tarkib, barqaror moliyaviy ta'minot, stadion, baza, maosh... Bularning hech biri noliydigan darajada emas. Demak, qaysidir qaror borasida xato qilinganki, «Bunyodkor» mana ikki yildan buyon o'ziga kela olmayapti. Qarorni esa kim qabul qiladi? Ha, yashang - rahbariyat!
«Bunyodkor»ning ayni vaqtdagi murabbiylar shtabi ish boshlagan damlarda O'zbekiston chempionatidagi eng barqaror o'yinni aynan «qaldirg'ochlar» namoyish etishayotgandi. Ammo so'nggi ikki yil mobaynida klubda pasayish kuzatildi. Bir qarasangiz, undan yaxshi jamoa yo'q, yana bir qaraganda esa, undan-da yomonini topa olmaysiz. Albatta, asosiy e'tibor yoshlarga qaratilarkan, bunday holat yuzaga kelishi turgan gap. Shu sababli ham, balki Sergey Lushanga qayta va qayta ishonch bildirilayotgandir. Ammo hamma narsaning ham chek-chegarasi bo'lganidek, qachondir bu ishonchga ham putur etadi. O'ylaymizki, bu voqea bugun, erta yoki indinga ro'y bersa, «Bunyodkor» muxlislari orasida qarshi chiqadiganlar ko'p topilmasa kerak.
Jamoaga islohotlar qay darajada kerakligini Chempionlar Ligasida ko'rdik. Magarki, klub avvalgi mavqeini tiklashni istar ekan, qandaydir o'zgarishlar qilishi shartligiga ham guvoh bo'ldik. Aks holda, «Paxtakor»ning qismati takrorlanishi hech gap emas. Yodingizda bo'lsa, «sherlar» ham besh-olti yil burun asosan yoshlarni tarbiyalayotganlarini ta'kidlash bilan band edilar. Shu sababli, jamoa o'yini ortga ketganiga e'tibor qaratmaslik, g'alabalar, albatta, kelishini ta'kidlashdan charchamasdilar. Agar «Paxtakor» rahbariyati «g'alabalar» degan jumla orqali oliy ligadagi g'oliblikni nazarda tutgan bo'lsa, ular o'z va'dalarini bajardilar, deyish mumkin. Ammo xalqaro o'yinlarga nazar tashlasak, bir vaqtlari butun qit'ani titratgan klubning hozir guruhdan chiqishga ham qiynalayotganini ko'ramiz. «Paxtakor» tarbiyalayotgan yoshlar esa yil o'tgani sari o'rtamiyona futbolchiga aylanib borishmoqda. Axir faqat oliy ligadagi ishtirok bilan xalqaro darajadagi futbolchini tarbiyalab bo'lmaydi-ku!
Hozirgi «Bunyodkor» ham o'sha stsenariy bo'yicha «rivojlanayotgandek». Klubning hozirgi rahbariyati yoshlar haqida gapirishni xush ko'radi. Buning nima bilan yakunlanishiga «Paxtakor» timsolida ishonch hosil qilib ulgurganmiz. Demak, «qaldirg'ochlar» shu yo'ldan ketishni istashmasa, hozirdanoq chora ko'rishlari lozim. Klubning ichki muhiti qanday ekanidan bexabarmiz, ammo namoyish etayotgan o'yiniga qarab ham bir gapni bemalol aytish mumkin - «Bunyodkor»ga, eng avvalo, yaxshi saviyadagi tajribali murabbiy kerak.
Davomi InterFUTBOL gazetasi blogida.
— deya xabar beradi uff.uz nashri.