Evropa ligasi musobaqasining yarim finalidan o'rin olgan “Liverpul” hamda “Vilyarreal” klublari o'rtasidagi javob uchrashuvi o'z nihoyasiga etdi. Unda 3:0 hisobi qayd etilib, mersisaydliklarning g'alabasi bilan yakunlandi. Klopp jamoasi qo'shimcha vaqt va penalti sinovisiz finalga chiqishi uchun kamida ikkita to'p farqi bilan g'alaba qozonishi kerak edi va germaniyalik mutaxassis shogirdlari bu vazifasini besh bahoga barajadi. O'yinning ilk daqiqalaridanoq “Liverpul“ raqibni o'z jarima maydoniga qamab qo'ydi va birin-ketin hujumlar uyushtirdi va 7-daqiqadayoq Sorianoning avtogoli qarama-qarshilikdagi muvozanatni teng holatga olib keldi. Ikkinchi bo'limning 63-daqiqasiga kelib esa Daniel Starrijning goli mersisaydliklarni “overtaym” sinovidan qutqarib qoldi. Boz ustiga, 71-daqiqada Ruis maydondan chetlatilgach, oradan 10 daqiqa o'tib, Adam Lallana Areolya darvozasiga uchinchi golni kiritib, yakuniy natijani o'rnatdi. Shu tariqa, “Liverpul” “Enfild”da “Vilyarreal”ni yirik hisobda englib, finalga yo'llanma oldi. Evropa ligasi. Yarim final Liverpul Angliya – Vilyarreal Ispaniya 3:0 (1:0, 2:0)
Gollar: 1:0 – 7, avtogol Soriano, 2:0 – 63 Starrij, 3:0 – 81 Lallana.
Liverpul – Minole, Ture, Moreno, Klayn, Lovren, Koutino (Allen, 83), Jan, Lallana, Milner, Firmino, Starrij.
Vilyarreal – Areolya, Musakko, Kosta, Mario Gaspar, Ruis, Dos Santos (Bonera, 73), Pina (Trigeros, 60), Soriano, Suares, Soldado (Adrian, 69), Bakambu.
Ogohlantirishlar: Ruis (30), Klayn (35), Soldado (40).
Chetlatish: Ruis (71).
Dastlabki uchrashuv: 0:1
— deya xabar beradi uff.uz nashri.