O'zbekistonda o'q otish sport turini rivojlantirish borasida amalga oshirilayotgan ishlar bilan yaqindan tanishish maqsadida mamlakatimizga tashrif buyurgan Osiyo o'q otish konfederatsiyasi prezidenti Shayh Ali Bin Abdulla Bin Hamad Al Halifa boshchiligidagi delegatsiya bugun O'zbekiston Milliy olimpiya qo'mitasida bo'lib, bu erda yaratilgan sharoitlar hamda MOQ qoshidagi Respublika sport tibbiyoti ilmiy-amaliy markazi faoliyati bilan tanishdi.
Mehmonlar dastavval O'zbekistonda olimpiya harakatini ifodalovchi muzeyga tashrif buyurib, bu erda o'rnatilgan turli eksponatlar, kubok hamda medallarni, shuningdek, mamlakatimiz sportchilarining Olimpiada o'yinlaridagi ishtirokidan olingan fotosuratlarni ko'zdan kechirdilar.
Osiyo o'q otish konfederatsiyasi rahbari Respublika sport tibbiyoti ilmiy-amaliy markazi faoliyati bilan yaqindan tanishar ekan, bu erda yaratilgan sharoit har qancha taxsinga sazovor ekanligini bildirdi.
Shundan so'ng, Shayh Ali Bin Abdulla Bin Hamad Al Halifa boshchiligidagi delegatsiya a'zolari Madaniyat va sport ishlari vazirining birinchi o'rinbosari Murod Aliev, O'zbekiston Milliy olimpiya qo'mitasi Bosh kotibi Oybek Kasimov, Respublika o'q otish federatsiyasi rahbariyati bilan muzokara o'tkazdi.
Suhbat chog'ida O'zbekistonda jismoniy tarbiya va sportga, xususan, bolalar sportini rivojlantirishga Davlatimiz hamda xukumatimiz rahbariyati tomonidan qaratilayotgan alohida e'tibor, yaratilayotgan shart-sharoitlar haqida atroflicha ma'lumot berildi.
O'z navbatida mehmonlar ham O'zbekistonda sport sohasiga qaratilayotgan e'tibor, shu bilan birga Olimpiya harakatini rivojlantirish borasida amalga oshirilayotgan sa'y-harakatlar ularda katta ta'surot qoldirganligini mamnuniyat bilan ta'kidlab o'tdilar.
“Avvalo taklif uchun O'zbekiston xukumatiga o'z minnatdorchiligimni bildirmoqchiman. Osiyo o'q otish konfederatsiyasi rahbari sifatida yurtingizga birinchi marotaba tashrif buyuryapman. Tashrifdan ko'zlangan asosiy maqsad O'zbekiston o'q otish federatsiyasi bilan o'zaro hamkorlik rishtalarini yangi bosqichga olib chiqish. E'tiborlisi, O'zbekistonda o'q otish sportini rivojlantirish borasida olib borilayotgan sa'y-harakatlar har qancha taqsinga sazovor. O'zbekistonlik sportchilar har qanday nufuzli musobaqada ham o'z oldilariga yuqori maqsadlarni qo'yadilar. Bu juda katta ahamiyatga ega. Shu bilan birga, menda O'zbekiston Milliy olimpiya qo'mitasining muhtasham binosi, qo'mita qoshidagi Respublika sport tibbiyoti ilmiy-amaliy markazi katta ta'surot uyg'otdi. Bu ham o'z navbatida mamlakatingizda Olimpiya harakatini rivojlantirishga qay darajada ahamiyat qaratilayotganligidan dalolat beradi. Fursatdan foydalanib, joriy yil Braziliyaning Rio-de-Janeyro shahrida o'tkaziladigan Olimpiada va Paralimpiya o'yinlarida ham sportchilaringizga omad va zafarlar tilayman - dedi Shayh Ali Bin Abdulla Bin Hamad Al Halifa.
Tashrif so'ngida mehmonlarga O'zbekiston Milliy olimpiya qo'mitasi hamda Respublika o'q otish federatsiyasining esdalik sovg'alari topshirildi.
Shavkat Jalilov
O'zbekiston Milliy Olimpiya qo'mitasi
matbuot xizmati
— deya xabar beradi uff.uz nashri.