Yaqinda o'tkazilgan futzal bo'yicha Osiyo chempionatida hamyurtlarimizning jozibali o'yin ko'rsatishdan tashqari, chiroyli libosda o'ynashgani ham diqqatimizni tortdi. Bunga qadar olimpiyachilarimiz ham xuddi shunday ko'rinishda maydonga tushishgandi. Aynan shu omil Sports.ru saytining «Uzbekskaya kuxnya» blogini terma jamoalarimizning turli davrlarda kiygan liboslari bilan tanishib chiqishga undadi. Quyida ana shu mavzuga oid tahlillar va futbolchilar libosi bilan tanishishingiz mumkin.
O'sha tarixiy musobaqa - 1994 yilgi Osiyo o'yinlari yarim finalida Janubiy Koreya termasiga qarshi bahsda hamyurtlarimizni Andrey Fyodorov sardor sifatida maydonga boshlab tushgandi. O'sha kezlari «oq bo'rilar» (termamiz avvallari bunday nom bilan atalmasdi) «Adidas» firmasida ishlab chiqarilgan libosda o'ynashgandi.
1996 yilning 11 sentyabrida O'zbekiston termasi Yaponiya futbolining yubiley uchrashuviga taklif etildi. O'shanda «kunchiqar yurt» federatsiyasi 75 yoshini nishonlayotgandi. Mazkur bahsda Bahodir Ibrohimov shogirdlarining sariq rangli libosda maydonga tushishgani ko'pchilikni ajablantirdi: bu tusning O'zbekistonga qanday aloqasi borligi mavhum edi. Suratga nazar tashlab, libosni ishlab chiqargan kompaniya nomini aniqlash qiyin. Shunga qaramay, avvalgi dizaynning ayrim qismlari saqlab qolingandi. O'z navbatida, sariq fonda O'zbekiston gerbi ham yaqqol ko'zga tashlanib turardi. Ikkinchi suratdagi futbolchini tanigandirsiz? Albatta, bu Oleg Shatskix.
O'sha yil. O'sha raqib. Faqat turnir boshqa - Osiyo kubogi. Mazkur bahsda O'zbekiston termasi yaponlarga 0:4 hisobida yutqazdi. Libosni «adidaschilar» tikishgan, dizayn esa 90-yillarda urf bo'lgan keng ko'rinish olgandi. Yashil va oq chiziqlar o'zaro uyg'unlashgani holda milliy bayroqdagi ranglarni eslatadi.
1998 yilgi JCh saralashi. Ellik to'rt mingga yaqin yaponiyalik (ha, yana o'shalar) ishqibozlar Tokiodagi qadrdon stadionlarida o'z milliy termalarining o'zbekistonlik mehmonlardan 3ta to'p o'tkazib yuborgani guvohiga aylanishdi. To'g'ri, bu ularni zarracha ranjitmadi, chunki mezbonlar ushbu o'yinda 6ta gol urishgandi.
Yana sariq libos. Yana «Adidas». Germaniyalik tikuvchilar bu safar qora chiziqlarni qo'shishdi. E'tiborlisi, futbolkaning old qismida raqam paydo bo'ldi. Tashqi ko'rinishi «Real» (Madrid)ning o'tgan yilgi raqam dizaynini eslatib yuboradi.
Saralashning Toshkentda kechgan javob o'yini. Yaponlar kutilmaganda yutqazishayotgandi. Ammo 54-daqiqadan boshlab maydonda mehmonlarning mahalliylashtirilgan futbolchisi Vagner Lopes hamda mashhur «samuray» Xidetoshi Nakata paydo bo'lgach, vaziyat tamomila o'zgardi. Aynan shu o'yinchilar Yaponiyani mag'lubiyatdan qutqarib qolishdi. O'zbekiston termasi shu tariqa, ilk marta Yaponiyadan ochko tortib olishni uddaladi.
Bu safar «adidaschilar» dizaynning ayrim detallari - chiziqlar va raqamlarni o'zgarishsiz qoldirishga qaror qilishdi. Faqat sariq rangdan voz kechishdi. Oq-ko'k-oq uyg'unlashgan, qora chiziqli ajoyib libos yaratildi.
Oradan bir yil o'tib, O'zbekiston termasi Buyuk Britaniyaning «Admiral» kompaniyasida ishlab chiqarilgan ekipirovkalarda ko'rinish berdi. O'sha paytlardagi jahon tendentsiyalari yaqqol ko'zga tashlandi: darvozabon libosida rang-baranglik kuzatildi, umumiy futbolkalar esa biroz tor qilib tikildi.
1999 yilning noyabri. Osiyo kubogi saralash bosqichi. Tailandning «Grand Sport» firmasida tayyorlangan liboslar avvalgi yillardagiga nisbatan o'zgacharoq chiqqandi. To'g'ri, sardorning futbolkasida gerbning yo'qligi tushunarsiz.
2000 yilgi omadsiz Osiyo kubogida O'zbekiston termasi yana «Adidas»ga qaytdi. O'sha yilgi libos ko'p jihatdan hozirgi paytdagisiga o'xshab ketadi.
Davomi InterFUTBOL gazetasi blogida.
— deya xabar beradi uff.uz nashri.