«Barselona» himoyachisi Jerar Pike yaqinda Nike Tiempo Vetta krossovkalari taqdimot marosimida ishtirok etdi va tadbir yakunida maxsus intervyu ham berdi. Aniqroq gapirsak, Kataloniya klubi a'zosi Ispaniya milliy jamoasining tobora start chizig'iga yaqinlashayotgan Evro-2016ga bog'liq maqsadlariga to'xtalib, turnirda chempionlik unvonini himoya qilish uchun imkoniyatlari chakki emasligini ta'kidladi. Shuningdek, Kataloniya oldidagi mas'uliyati to'g'risida gapirdi.
- Jerar, yaqinlashayotgan qit'a birinchiligini qanday niyatlar bilan kutyapsiz?
-  Ispaniya termasida ketma-ket 3-marta chempion bo'lish imkoniyati bor. Frantsiyada o'z unvonimizni himoya qila olsak, katta natijaga erishgan hisoblanamiz. To'g'ri, men 2008 yilgi turnirda ishtirok etgan emasman - juda yosh edim, qolaversa, «Barselona»ga endigina qaytgandim. Evro-2012da esa terma jamoaning to'laqonli a'zosiga aylanib ulgurgandim va o'sha musobaqa men uchun eng yaxshilaridan biri bo'ldi. Deylik, final o'yinida Italiya termasini 4:0 hisobida engganimiz hech yodimdan ko'tarilmaydi. Ochig'i, buni aqlga sig'dirish ham qiyin. Umuman, butun mavsum yuqori saviyada o'ynagandik. Muhimi, barcha futbolchilar yagona maqsad yo'lida yaxlit kuchga aylanishgandi. Zafarli chempionatdan so'ng esa sezilarli o'zgarishlar ro'y berdi - bir qator asosiy futbolchilar jamoa bilan xayrlashdilar. Lekin hozirgi tarkibda yaxshi sport formasiga kirgan yigitlar ko'p. Shunday ekan, qit'a chempionatini faqat g'alabaga chanqoq holda kutayotganim tayin. Zero, qaytaraman, bizda yana bir salmoqli sovrin yutish imkoni bor.
- Jahonda nafaqat jonajon klubi, balki yana o'z shahri jamoasi uchun o'ynashda davom etayotgan futbolchilar oz. Aytingchi, Barselonada o'tgan bolaligingiz hozirgi darajaga chiqishingizda qanchalik ahamiyat kasb etgan?
- Shaxsiy hayotimning katta qismi aynan shu er - Kataloniya yuragida kechdi. Xullas, butun bir tarix va madaniyatni qamrab olgan shaharda tug'ulib, shu erda ulg'aydim. Xarakterimda ham kataloniyaliklar, ham ispanlarga xos xilqatlarni payqash qiyin emas. Aytishim joiz, menga birinchi navbatda, ota-onam kuchli ta'sir o'tkazishgan. Aynan ularning e'tiborlari tufayli  hozirgi Jerar Pikega aylandim.
- Futbol hayotingizning mazmuni ekanligini qachon yaqqol his qilgansiz?
- Bolaligimdayoq. Onam doimo bitta gapni takrorlardi: «Sen o'qishing kerak. Mabodo futbolda omading yurishmasa, bemalol boshqa biror ish bilan shug'ullanaverasan». Lekin juda kichikligimdayoq o'zim uchun barchasi aniq-tiniq edi. Ya'ni futbolning bir umrlik ehtirosim bo'lib qolishiga shubhalanmaganman. Mana, butun hayotim futbolga bog'liq va men bunday taqdirdan g'oyat xursandman. Chunonchi, o'yinning har bir lahzasidan rohatlanishni bilaman. Sizga aytsam, haligacha o'rganishga ishtiyoqim baland - mudom yanada yaxshiroq o'ynash harakatidaman. Hozir 29 yoshda bo'lsamda, qachondir futbolsiz qolishimga to'g'ri kelishi haqida o'ylamayman ham. Umid qilamanki, faoliyatimni imkon qadar uzaytirish uddasidan chiqaman.
- Futbolchi uchun o'zi tug'ilib-ulg'aygan shahri jamoasi sharafini himoya qilish nimani anglatadi?
- O'z misolimda ochiq tan olib aytaman, bu chinakam orzuning ro'yobidir, shubhasiz. Lekin ikkinchi tomondan olsak, beqiyos bosim bor. Tushunarliki, muxlislar senga boshqacha mehr va ishonch bilan qarashadi. Shuning ortidan zimmangga katta mas'uliyat tushadi. Sen kataloniyaliksan, demak, «Barselona»ning shahar uchun nechog'li muhimligi, muxlislar jamoa mag'lubiyati yoki g'alabasini qanday qabul qilishlarini hammadan yaxshiroq his etishing muqarrar. Chunonchi, vaqtida o'zing ham shu klubga muxlis sifatida qayg'urganingni esingda tutasan. Misol uchun, men har ikki haftada stadionga tushishni kanda qilmasdim, sevimli jamoamning o'z maydonidagi  o'yinlarini o'tkazib yubormasdim. Qisqasi, mahalliy futbolchi klub tarixiyu, yo'lini yaxshi biladi. Endi shu tarixning bir qismiga aylanish - e'tirofi yo'q voqelik.
- Butsalaringizni mixga ilgach, muxlislar xotirasida qanday qolishni istardingiz?
- Niyatim bitta - meni o'yinlarini kuzatish qiziqarli bo'lgan futbolchi sifatida esga olishsa, bas. Harqalay, shunchaki, ism-familiyamni tilga olib, «Falon yigit» qabilida eslashlarini aslo xohlamayman. Jonajon jamoam menga hamma narsani berdi va endi bor kuchimni uning ravnaqi yo'lida sarflashim shart. Odamlar meni eslashganida, «O'z ishini chin yurakdan sevgan yaxshi inson edi», deyishlari ham juda muhim.
- Barselonada bo'sh vaqtni o'tkazish - bu masalada ham avvalgiga nisbatan farq bormi?
- Ha, hozir bitta oila egasiman va odatda farzandlarim davrasida hordiq chiqaraman. To'g'ri, uydan chiqish imkoni tug'ilsa, bolalikdagi do'stlarimiz bilan uchrashib, qaergadir borishimiz mumkin. Shuningdek, oilaviy tushlik ushtirishni yoqtiraman. Bunday holatda barchamiz biror shinam joyda yig'ilamiz. Yana nima? Ba'zan kino yoki kontsertga tushamiz. Barselonada tug'ilganim va shu erda yashayotganimning o'zi baxt. Axir shahar ulkan, demakki, bo'sh vaqtga mazmun olib kirishning turli variantlari ko'p.
- Barselonada sizni hamma taniydi. Bunday mashhurlik xalaqit bermaydimi?
- Mashg'ulotlar va o'yinlar chog'i chetdagi voqealarga  chalg'imaslikka urinaman. Ya'ni e'tiborimni bir joyga jamlab, faqat o'z harakatlarimni o'ylayman. Tabiiyki, maydonda stadiondagi o'n minglab, teleekran qarshisidagi millionlab ko'z nigohida bo'lamiz. Futboldan tashqarida esa, shu e'tibor birdan pasayishini istayman. Tabiatan uyda o'tirishga moyilman, har holda, oilam davrasida o'zimni juda erkin sezaman. Mabodo uydan uzoqda bo'lsam ham, uzlat maskan yoki sokin muassasada yolg'iz dam olishni ma'qul ko'raman. Xullas, olomon e'tiborini tortishga xushim yo'q.
Davomi InterFUTBOL gazetasi blogida.
— deya xabar beradi uff.uz nashri.