Oxirgi yillarda Qarshining «Nasaf» jamoasidagi yorqin o'yinlari bilan muxlislar e'tiborini qozongan Hamza Karimov shu yilning 16 aprel kuni Germaniyaning Myunxen shahridagi tibbiy klinikada jarrohlik stoliga yotqizilgan. Jarrohlik amaliyoti muvaffaqiyatli o'tgach, kuni kecha futbolchi yurtimizga qaytib keldi.
Himoyachi Hamza Karimovning qarshiliklar bilan tuzilgan amaldagi shartnomasi aslida 2015 yilning 31 dekabrida nihoyasiga etgan. Garchi, u «Nasaf» jamoasi erishgan so'nggi yutuqlarga munosib hissa qo'shgan bo'lsa-da, futbol klubi futbolchining xorijdagi tibbiy muolajalari uchun borish-kelish hujjatlarini rasmiylashtirishga ko'mak berishni istamadi. Shunday vaziyatda «Qizilqum» futbol klubi mohir futbolchiga qo'lidan kelgan o'z yordamini ayamadi.
Kecha esa xorijdan qaytgan Hamza Karimov  «Qizilqum» futbol klubi rahbariyati bilan uchrashdi. Uchrashuv chog'ida u chempionatimiz ikkinchi davra o'yinlarini konchilar libosida boshlashga tayyor ekanligini rasman bildirdi.
Ayni paytda Hamza Karimov yakka tartibda mashg'ulotlarni boshlagan. Hozirda trenajyor zalidagi maxsus mashqlar bilan kifoyalanayotgan tajribali himoyachi yana o'n besh kundan so'ng, jamoaning umumiy mashg'ulotlariga qo'shilishi kutilmoqda.
— deya xabar beradi uff.uz nashri.