Xabaringiz bor, Evropa qit'asi ayni kunlarga kelib, qaysidir sabab bilan o'z yurtlarini tark etishga majbur bo'lgan muhojirlar uchun asosiy manzilga aylandi. Shubhasiz, ko'psonli kishilarning bunday ko'chishlari «ko'hna qit'a» mamlakatlariga turli muammolarni keltirib chiqaradi. Lekin futbol borasida bunday deyishga asos yo'q. Aksincha, aynan muhojirlar oilalarida ulg'aygan iste'dodlar tufayli evrofutbol go'zallashib bormoqda, qit'a klublari va terma jamoalari o'zgacha ijrochilarga ega bo'lishyapti. FootballHD.ru saytining quyidagi maqolasida bunga eng yorqin misollar keltirilgan.
David Alaba
Ochig'ini aytish kerak, «qora tanli avstriyalik» iborasi tilimizda biroz g'alizroq aylanadi. Ammo gap Myunxenning «Bavariya»sida to'p surayotgan himoyachi haqida borganida, mazkur «e'tirof»ni o'zgacha to'lqinlanib aytamiz. Zero, futbolchining o'yini har qanday kishida beixtiyor hurmat hissini uyg'otadi. Tana rangi Davidga otasidan meros. Katta Alaba - Jorj yoshlik paytlari azbaroyi iqtisodiyot ilmini egallash uchun Nigeriyadan Avstriyaga keladi va Venadagi universitet talabasiga aylanadi. Jorj tahsil mobaynida tungi klublardan birida «didjey» (musiqachi)lik vazifasini ham bajaradi va o'zida musiqaga alohida qiziqish borligini payqaydi. Ammo nigeriyalik muhojir san'at yo'nalishida aytarli muvaffaqiyatga erisholmaydi.
Aniqrog'i, Jorj umuman kutilmagan boshqa bir hodisa tufayli birdan tanilib ketadi - uni Avstriyada harbiy xizmatga chaqirishadi. Shu tariqa katta Alaba Avstriya qo'shinlari safida xizmat qilgan birinchi qora tanli fuqaroga aylanadi. Bu unga tabiiyki, katta mashhurlikni olib keldi. Hattoki, Jorj Alaba haqida film ham ishlandi. 80-yillar oxiriga kelib, Jorj harbiy xizmatdan iste'foga chiqdi va turli ko'ngilochar kechalarni tashkil qila boshladi. Ana shunday shou-kechalarning birida bo'lajak turmush o'rtog'i - hamshiralik diplomi va «Filippin go'zali» maqomiga ega qiz bilan tanishdi. David tug'ilgan payt yosh oila o'zini ancha tiklab olgandi. Chunonchi, Jorj shaxsiy tungi klubini ishga tushirgandi. Bugunga kelib, Jorj o'g'lining shaxsiy agentiga aylangan. David esa ajdodlari tarixi qanday kechganini doimo yodida tutadi:«Filippinda ham, Nigeriyada ham bir necha bor bo'ldim. U erdagi odamlar hayotini ko'rsang, hayot senga in'om etgan tuhfalarning qadriga eta boshlaysan».
Zlatan Ibragimovich
Ibraning Shvetsiyada tug'ilishi tarixi quyidagicha: 70-yillar oxirlarida Bosniyaning Bielin shahrida serblar g'alayon ko'tarib, yuzlab musulmonlar joniga qasd qilishadi. Zlatanning otasi Shafiq esa bunday noxushliklardan uzoqroq yurish ilinjida qochqin sifatida Shvetsiyaga yo'l oladi va mamlakat fuqaroligiga ega bo'lish maqsadida shu erda uylanadi. Aytgancha, Shafiqning rafiqasi ham o'zga yurtdan edi - u Xorvatiya­dan kelgan muhojirlar oilasida voyaga etgan. Juft­lik o'rtasidagi nikoh atigi fuqarolikni olish uchun tuzilgan bo'lsa-da, tez orada oilada chaqaloq dunyoga keldi. Zlatan 2 yoshga to'lganida esa, uning ota-onasi ajrashishga qaror qilishdi. Chunki Shafiq kun bo'yi televizor qarshisiga mixlanib, faqat Bosniya haqidagi yangiliklarni kuzatar, jonajon shahridan bo'ladigan telefon qo'ng'iroqlarini kutib, ayoli va oilasiga umuman e'tibor qaratmasdi.
Boshqacha aytganda, u urush tufayli tushunarsiz fe'l-atvorli kishiga aylangandi. Shunga qaramay, Shafiq ajrashishdan keyin ham farzandlariga mehribon otaligicha qoldi. U har yakshanba kuni Zlatan va singlisini xiyobonlarga olib borib, attraktsionga tushirar, muzqaymoq bilan siylardi. Bolalarni tarbiyalash ona zimmasiga tushgach, u keskin o'zgarib, jahldor va berahm ayol bo'lib qoldi. Deylik, Zlatanni arzimagan aybi tufayli yog'och qoshiqlar bilan ayovsiz savalardi.«Ba'zida u juda shavqatsiz insonga aylanib, men va singlimni qoshiq bilan urishga tushardi. Gohida zarbaning kuchidan qoshiq boshimda sinardi va men yangisini sotib olish uchun do'konga jo'nardim. Xuddi hammasiga men aybdordek», - deya eslagandi Ibra o'z bolaligini.
Pol Pogba
Antuan va Yeo Pogba Frantsiyaga 1991 yili ko'chib o'tishgan. Bungacha Polning otasi Gvineyada telekommunikatsiya sohasida ishlardi va bu yo'l bilan hayotda hech narsaga erisholmasligini anglab, Frantsiyaga yo'l oladi. U shu erda texnikaga ixtisoslashgan o'quv yurtlarilaridan birida ish boshlaydi. O'z o'rnida ta'kidlash lozim, Polning onasi - Yeo aslida kongolik hisoblanadi. Xullas, Pol endigina 2 yoshga to'lgan payti Antuan oilasini tark etishga qaror qiladi. Ammo u farzandlarini o'z holicha tashlab qo'ymaydi. Aksincha, shaxsan o'zi Pol va uning ikki akasida futbolga o'zgacha mehr uyg'otadi. Buning uchun Maradona, Pele va Papenning o'yinlari yozilgan videokassetalardan foydalanadi.
Boz ustiga, lavhalarni tomosha qilish jarayonida o'g'illariga futbolning oddiy o'yin emas, balki yorqin kelajak garovi ekanligini ham uqtiradi. Eng muhimi, otaning bunday yondashuviga Yeo hech qanday e'tiroz bildirmaydi. Shuning uchun ham Pol onasidan cheksiz minnatdor ekanligini qayta-qayta takrorlaydi. Masalan, aksariyat futbolchilar «Oltin to'p»-2015 taqdirlash marosimiga qalliqlari bilan borgan bir payt Pogba o'ziga hamroh sifatida volidasini tanladi.
Mahmud Doud
Bu yigitcha ilk bor butun mavsum davomida faol to'p surmoqda. Lekin shunisi e'tiborliki, hozirdanoq ko'pchilik tinchini buzishga ulgurdi. Harqalay, Menxen­gladbaxning «Borussiya»si sharafini himoya qilayotgan 20 yoshli iqtidorni muntazam ravishda Germaniya yoshlar terma jamoasiga jalb etishyapti. Qolaversa, uning «Yuventus», har ikki «Manchester» va «Borussiya» (Dortmund) kabi klublar «nishoni»ga tushganini aytish lozim. Tarixga qaytsak, Mahmud Suriyaning asosan kurdlar istiqomat  qiladigan Amuda shahrida dunyoga kelgan. O'sha paytlar ham Suriyada turli mojarolar avjiga chiqqan bo'lib, kurdlar kamsitilishi tufayli Doudlar oilasi mamlakatdan bosh olib ketishga qaror qiladi.
Bu vaqtda Mahmud 10 oylik chaqaloq edi. Oila Germaniyaga etib olgach, Dyusseldorf shahriga o'rnashadi. Bolakay esa bu erda esini taniboq futbolga qiziqib qoladi. Shu tariqa 14 yoshigacha «Fortuna» klubi maktabida futbol sir-asrorlarini o'rgangan o'smir rivojlanishning keyingi bosqichini «Borussiya» safida o'tadi va 17 yoshida «Bavariya»ga qarshi o'yinda ishtirok etdi. Ayni payt mish-mishlar kurd yigitini turli top-klublarga bog'lamoqda. Mahmud esa ularga zarracha e'tibor qaratmay, bosh maqsadi - Germaniya terma jamoasi sari intilmoqda.
Davomi InterFUTBOL gazetasi blogida.
— deya xabar beradi uff.uz nashri.